Փաստ ինֆո

Մրգավետ համայնքի ղեկավարի որդին՝ Նարեկ Սարգսյանի, որը մեղադրվում է կնոջը խեղդամահ անելու մեջ, շարունակում է ցուցմունք չտալ, իսկ նրա պաշտպանը պնդում է, որ գործի նյութերով հաստատվում է այլ սուբյեկտի՝ դեպքի վայրում լինելու հանգամանքը։

Հիշեցնենք, որ 2022թ. մայիսի 5-ին Երևանի բնակարաններից մեկում հայտնաբերվել է 35-ամյա Տաթևիկ Աբրահամյանի դին՝ պարանոցի և դեմքի շրջանում բռնության հետքերով։ Վերջինս ոստիկանության Կոտայքի մարզային վարչության նախկին պետ, ոստիկանության գնդապետ Ավետիք Աբրահամյանի դուստրն էր, աշխատում էր ԵՊՀ-ում՝ որպես դասախոս։ Քրեական վարույթի շրջանակներում ձերբակալվել, ապա՝ կալանավորվել է Տաթևիկի ամուսինը՝ Նարեկ Սարգսյանը։ Նրան մեղադրանք է առաջադրվել ՀՀ նախկին քրեական օրենսգրքի 104-րդ հոդվածի առաջին մասով՝ սպանության հատկանիշներով։ Նարեկ Սարգսյանը Մրգավետ համայնքի ղեկավարի որդին է, որն ըստ մեղադրանքի՝ խեղդամահ է արել կնոջը։

Մեղադրյալի պաշտպան Աննա Ծառուկյանը «Փաստինֆո»-ի հետ զրույցում ասաց, որ քրեական վարույթի շրջանակներում նշանակված բոլոր փորձաքննությունների եզրակացությունները ստացվել են, որոնք, ըստ նրա, Նարեկ Սարգսյանի օգտին են և հիմնավորում, որ նա դեպքի հետ չի կարող առնչություն ունենալ։

«Նախաքննության գաղտնիքից ելնելով՝ չեմ կարող ասել, թե որ փորձաքննությունների եզրակացություններն են եկել, միայն կարող եմ նշել, որ դեպքի վայրում եղել է այլ սուբյեկտ, ինչը հիմնավորվում է։

Ավելին, պաշտպանության կողմի այն կասկածներն առ այն, որ այն պահի դրությամբ, որ տուժողը կարող էր արդեն կենդանության նշաններ չունենալ, այդ պահի դրությամբ, հիմնավորվում է, որ Նարեկ Սարգսյանն այլ վայրում է եղել։ Սա անվիճելի է, աներկբա։ Ուղղակի ուղղորդված նախաքննության հետ գործ ունենք, որի դեմ պայքարում ենք։ Պարզապես վարույթն իրականացնող մարմինը և դատախազությունը դիտարկել են, որ միայն Նարեկ Սարգսյանն է մեղավոր»,- նշեց Ծառուկյանը։

Փաստաբանի խոսքով՝ թեև կարողանում են հիմնավորել, որ դեպքի ժամանակ իրենց պաշտպանյալը դեպքի վայրում չի եղել, Սարգսյանի նկատմամբ ընտրված խափանման միջոց կալանավորումը որևէ կերպ չի փոխվում.պաշտպանները միջնորդել էին փոխել կալանավորումը՝ բացակայելու արգելքով, տնային կալանքով և գրավով՝ առաջարկելով բնակարանը՝ երեք հողակտոր մեծ տարածությամբ, երկու համայնքապետերի անձնական երաշխավորությունը, սակայն Սարգսյանը շարունակում է մնալ անազատության մեջ։

Ինչ վերաբերում է երեխային, ապա փաստաբանը նշեց, որ քննիչի որոշմամբ՝ արգելվել է Նարեկ Սարգսյանի և երեխայի հանդիպումը, շփումները, պաշտպանը միջնորդել է վերացնել սահմանափակումները, քանի որ, նրա փոխանցմամբ, նոր օրենսդրական կարգավորումների համատեքստում՝ բացառապես դատարանն է կալանավորման միջնորդության քննության արդյունքում կիրառում նման սահմանափակում, տեսակցությունների արգելքի վերաբերյալ միջնորդություններ դատարան չի ներկայացվել, ըստ այդմ, պաշտպանը պնդում է, որ քննիչը նման լիազորություն չունի։ Երեխայի հետ շփման բացակայությամբ պայմանավորված «Արմավիր» ՔԿՀ-ում հոգեբանն արձանագրել է երեխայի և ծնողի կապի խախտում, ինչը, ըստ պաշտպանի, խախտում է նրանց իրավունքները, այդ հարցի կապակցությամբ պաշտպանության կողմը դիմել է ՄԻՊ գրասենյակին, որտեղից խոստացել են հարցին ընթացք տալ։

Աննա Ծառուկյանը վստահեցնում է, որ Նարեկ Սարգսյանի դեմ որևէ տվյալ չկա, կան շահագրգիռ անձանց կողմից ցուցմունքներ, որոնք դեպքի հետ առնչություն չունեն, անցյալի հետ կապված խնդիրներ են արձանագրվել, սակայն հայտնի չէ, թե դրանք որքանով են համապատասխանում իրականությանը, ոչ մի ականատես վկայի հետ գործ չունեն։ Պաշտպանը նշեց, որ Սարգսյանի մեղադրանքի հիմքում դրված նյութերից մեկն էլ պայմանավորված է այն հանգամանքով, որ Սարգսյանը, ինքնակամ ներկայանալով ոստիկանություն, չի նայել, թե ինչի տակ է ստորագրում։ Հարցին՝ արդյո՞ք ի սկզբանե ինքնախոստովական ցուցմունք է տվել, Ծառուկյանը նշեց, որ այդ մասին խոսք գնալ չի կարող, Սարգսյանն ընդհանրապես ցուցմունք չի տվել։

Հեղինակ՝ Իզաբել Սահակյան

Աղբյուր` Փաստինֆո