Փաստ ինֆո

Արցախի ներկա իշխանությունը չի կարողանում որոշել, թե երբ ու ինչ պետք է անել։ Ակնհայտ է, որ և՛ Ադրբեջանից, և՛ ՀՀ-ից ճնշումներ են գործադրվում, բայց անկախ դրանցից՝պետք է առաջնորդվել բացառապես արցախահության շահերով և անկեղծ խոսել ժողովրդի հետ։ Այդ մասին «Փաստինֆո»-ի հետ զրույցում ասաց Արցախի ԱԺ «Արդարություն» խմբակցության ղեկավար Դավիթ Գալստյանը։

 «Թե՛ դեկտեմբերի 25-ի համաժողովրդական հանրահավաքը, թե՛ Օպերատիվ շտաբի ներկայացուցիչների հետ շրջաններում բնակչության հետ ունեցած հանդիպումներն ապացուցեցին, որ Արցախի բնակչությունը միաձայն կողմ է ընտրված՝ Ադրբեջանի պահանջները չկատարելու, ճնշումներին տեղի չտալու ճանապարհին։ Չգիտեմ՝ ինչու Արայիկ Հարությունյանը որոշեց զիջումների գնալ՝ այն էլ միակողմանի։  Փետրվարի 23-ի որոշումը (նկատի ունի Ռուբեն Վարդանյանին պետնախարարի պաշտոնից ազատելը,-խմբ․) և Ադրբեջանի հետ շփումները վերսկսելու որոշումը Արցախի մնացած քաղաքական ուժերի հետ չի քննարկվել․ Արայիկ Հարությունյանը միանձնյա է այդպես որոշել, և հիմա դրա դառը պտուղներն ենք քաղում»,-ասաց Գալստյանը։

Պատգամավորի խոսքով՝ 2020թ․ նոյեմբերի 10-ից հետո Կառավարության հետ հարցուպատասխանի ժամանակ գրեթե ամեն անգամ իր ներկայացրած ուժը հնչեցրել է հստակ ռազմավարություն մշակելու անհրաժեշտությունը, որով կհստակեցվեր, թե մինչև 2025թ․ և դրանից հետո ինչ ճանապարհով է գնալու Արցախը։

Պետական մակարդակով նման ռազմավարություն չունենալն է, որ հուսահատեցնում է արցախցուն։  Հիմա հրշեջային քաղաքականություն է վարվում․ Կառավարությունը պարենային խնդիրն է փորձում հնարավորինս մեղմել, բայց քաղաքական ու դիվանագիտական ուղենիշներ չկան։ Երբ դեկտեմբերի առաջին կեսին՝ շրջափակումից օրեր անց անվտանգության  խորհրդի ընդլայնված նիստի ժամանակ որոշվեց, որ գնում ենք պայքարի ճանապարհով, պետք  է նախանշվեին անելիքները։ Համարյա երեք ամիս է՝ Արցախը շրջափակված է, բայց Գործադիրը մինչև հիմա չի մշակել ճանապարհային քարտեզ»,-նշեց պատգամավորը։

Անդրադառնալով հնչող կարծիքներին, թե ճնշումների ու պարտադրանքների պայմաններում Հարությունյանը գուցե և հրաժարական տա, Գալստյանը նշեց՝ Արցախի գործող Սահմանադրությունն ունի համապատասխան կարգավորում, բայց եթե անգամ նման քայլ արվի, ապա շատ ուշացած կլինի։ Ըստ մեր զրուցակցի՝ պատերազմին հաջորդած ամբողջ ժամանակահատվածում Արցախը բացառապես հետընթաց է ունեցել։

Աղբյուր` Փաստինֆո