Փաստ ինֆո

Ըմբո՞ստ է արդյոք Արսեն Թորոսյանը, երբ իր ՖԲ էջում գրում է՝ «Ոչ մի լավ բան անպատիժ չի մնում կամ՝ ինչու՞ լավ չի աշխատում պետական ապարատը...»:

Բնականաբար՝ ոչ։ Ըմբոստ կլիներ, եթե պետոլորտի՝ մեղմ ասած՝ ոչ լավ աշխատանքը տեսնելով և հասկանալով, էն գլխից իր տեսակետը հայտներ, էն գլխից արձանագրեր թերությունները, էն գլխից պայքարեր համակարգի արդյունավետության համար։ Ընդ որում, դա աներ բարձրաձայն, ասեր, այս ու այս գործողություններն առավել թիրախային են և արդարացված, հարկ է իրականացնել և այլն, էլ քանի որ, օրինակ իր նշած՝ վասն կորոնայի դեմ արդյունավետ պայքարի և մահացությունների նվազման ձեռնարկած քայլերն այսօր իր դեմ են ուղղվում։

ՄԻնչդեռ, իր իսկ հարցի պատասխանը նա հետին թվով տալիս է՝ մի տեսակ զգուշացնելով պետոլորտի պաշտոնյաներին՝ «հանկարծ նախաձեռնողականություն չցուցաբերեն տարբեր հարցեր լուծելիս, որոշումներ չընդունեն, անվերջ քննարկումներ անեն տարբեր հարցերի շուրջ, իրենց լիազորությունների շրջանակներում եղած հարցերը չլուծեն, այլ միշտ թույլտվություն հարցնեն վերադասից, որովհետև վաղը կարող են հանիրավի մեղադրվել «որոշում կայացնելու համարձակություն» ունենալու համար»: Այսինքն, մեղադրում է վերևում նստածներին։ Էհ, էն գլխից մեղադրեիր ու բացահայտեիր ձերոնց թերությունները։ Ի վերջո, անկարելի էր աշխատել, հրաժարական տային․․․

Ի դեպ, նրա էջում իրեն մեղադրանք ուղղվում են ոչ միայն նրա համար, որ վերին ղեկավարին ինքը չի զեկուցել /թեպետ՝ այդօրինակ մեղադրանքներ էլ հնչում են, արդեն իսկ իր ֆբ էջում «առնետների», «գլխից թռնելու» քոմենթների հանդիպեցի/, նոր մասնագիտական կամ պետական պաշտոնյային հատկանշական քայլեր կատարել, այլ՝ առավելաբար՝ կոռուպցիոն ռիսկեր պարունակող քայլերի և հենց կոռուպցիայի համատեքստում։

Իսկ թե ինչու՞ է մի տեսակ գաղտնիությամբ, կամ՝ նեղ շրջանակներում իր քայլերն իրականացվել, օրինակ, քաղպայմանագրից հեռացած ԱԺ նախկին պատգամավոր Սոֆիա Հովսեփյանն այսպես է մեկնաբանում և դա շատ բացահայտ է անում՝ ուղղակի իր էջում գրելով՝ «Կարող է մի օր նաև պարզեք, թե ո՞նց արսեն թորոսյանը` օգտագործելով զոհվածների ԴՆԹ անալիզ անելու փաստը, լկտիաբար մեծ գումարներով գնեց նոր ԴՆԹ սեկվենատոր, որի ոչ միայն կարիքը չկար, այլ նաև որևէ կերպ իրենց խոստացած ժամկետում չարեց նույնականացումը, բայց զատո 250մլ դրամ մտերիմ կազմակերպությամբ ֆռռացրեցին ...2020 թ. ից էս մասին խոսում ու խոսում եմ... հակակոռուպցիա , տո եսիմ ինչ զրթ ու զիբիլ։ Խաղալ է պետք խաղում են, մեզ էլ զբաղեցնելով ու շեղելով» ։

Նկատենք, որ Թորոսյանի գրառումը մի տեսակ՝ ինքնախոստովանական ցուցմունք է հիշեցնում։ Իսկ արդարադատության ներկա նախարարն, օրինակ՝ կորոնավիրուսի դեմ պայքարի գործի շրջանակում բացահայտումներն ու ձերբակալությունները որակում է իբրև կոռուպցիայի դեմ պայքար, վերջինս համարելով այս իշխանության բրենդը։

Իրականում այդ «բրենդ» կոչվածն էլ, ինչպես այս իշխանության ցանկացած բան, ֆեյքային է։ Սուտ, կեղծ։ Իրականությունն էլ այս պատմության մեջ գուցե այն է, որ ներկա իշխանությունների ցանկացած անդամ ունի իրեն հետևող-վերահսկող և վերին իշխանության սեղանին կոմպրոմատը դնող, նրան զեկուցող մեկ այլ անդամ, ճիշտ այնպես՝ ինչպես եհովականների մոտ է։ Հավաքում է այն վերևում նստածը և․․․ անհրաժեշտ պահին դարակից հանում։

Ի դեպ, ներկա իշխանության՝ նախկիններին մեղադրելու հիմնական ուղղությունը առանց մրցույթ հայտարարելու մեկ աղբյուրից գնումներն էին, մրցույթներն իրենց շրջանակի մարդկանցով անցկացնելը։ Սակայն, այն, ինչի մեջ մեղադրում էին, 2018-ից արագի մեջ, չտեսաբար իրականացնում են իրենք։ Բոլոր ոլորտներում իշխողը ԽԾԲ-ն է, «պոլի փետ լինի, մերը լինի» սկզբունքը։ ՈՒ եթե պոլի փետ էլ չկա, ապա՝ ավելի լավ է տեղը թափուր մնա։

Որ առաջիկայում բազմաթիվ չարաշահումների բացահայտումներ կլինեն, արդեն ակնհայտ է, մանավանդ, շատերն են տեսել ու լսել, թե՝ «մեխն էլ է մեր ձեռքին, մուրճն էլ»՝ ասող քպականները ո՜նց էին հրճվում և ձեռքերը շփում այս խոսքերն ասելիս։

Բնականաբար, ձուկը գլխից է հոտում, բայց ինչպես ժողովուրդն է ասում ՝ բռնում են պոչից․․․

Աղբյուր` Փաստինֆո