Փաստ ինֆո

Վրաստանի վարչապետ Իրակլի Ղարիբաշվիլին հարցազրույց է տվել կառավարամետ «Իմեդի» հեռուստաալիքին, որտեղ փորձել է բացատրել, թե ով է կանգնած Թբիլիսիում զանգվածային ցույցերի հետևում։

Վրաստանի կառավարության ղեկավարը չի զլացել ևս մեկ անգամ մեղքը բարդել «արմատական ընդդիմության» վրա։

«Մենք բազմաթիվ քննադատություններ լսեցինք, որ ոստիկանությունը չափն անցել է։ Սա սուտ է և անհեթեթություն։ Ո՞վ է սկսել բռնությունը։ Բռնությունը սկսել է Ազգային շարժման երիտասարդական թևը, բոլորս նրանց անուններով գիտենք։ Բռնությունը սկսել են այսպես կոչված «Գիրչի» շարժումը, Ջաֆարիձեի շարժումը և Ֆրանկլինի ակումբի «անարխիստները». ես տեսա մի քանի ցուցարարների լուսանկարները, ես ապշեցի, նրանք ինչ-որ սատանիստների տեսքով էին»,- ասել է Ղարիբաշվիլին։

Միևնույն ժամանակ Վրաստանի վարչապետը ևս մեկ անգամ շեշտել է, որ ուկրաինացի քաղաքական գործիչները ձգտում են Վրաստանը ներքաշել պատերազմի մեջ։

«Երբ պատերազմի մեջ գտնվող մարդը ժամանակ է գտնում մեկնաբանելու Վրաստանում մի քանի հազար մարդու մասնակցությամբ ավերիչ գործողությունը, սա ուղղակի ապացույց է, որ այդ մարդը ներգրավված է և ցանկանում է, որ ինչ-որ բան տեղի ունենա այստեղ: Հետևե՛ք ձեր երկրին, մենք կնայենք մերին»,- ասել է Ղարիբաշվիլին։

Աղբյուր` Փաստինֆո