Փաստ ինֆո

Միասնականությունը պետք է լինի արժեքի և գաղափարի շուրջ, չկա գաղափար, չկա միասնականություն, վերացական միասնականություն գոյություն չունի։ Այս մասին լրագրողների հետ զրույցում ասաց Տավուշի թեմի առաջնորդ Բագրատ արքեպիսկոպոս Գալստանյանը։

«Միասնականությունը պետք է տեղի ունենա գաղափարի և արժեքների շուրջ։ Մենք այսօր ապրում ենք այնպիսի մի ժամանակաշրջանում, որ մարդը մարդուն չի վստահում, բայց մարդը ամենաշատը մարդու կարիքն ունի, հատկապես մեր այսօրվա հասարակության մեջ, երբ մենք պարտված իրավիճակում ենք. ոչ ոք ոչ ոքի չի վստահում պարզ, հորիզոնական հարաբերության մեջ, ընտանիքներում, շրջապատում»,- նշեց սրբազանը։

Նրա խոսքով՝ հասարակության պառակտվածության հիմքում ընկած է գաղափարական խզումը։ Օրվա իշխանությունները խոսում են հայրենիքի փոքրացած սահմանների, արցախահայությանը զոհաբերելու և թուրք-ադրբեջանական տանդեմի ստրկությանը հանձնվելու մասին, և այստեղ է, որ առաջանում է այդ գաղափարական խզումը. ազգայինն ու հոգևոր արժեքները չգնահատող ցանկացած անհատի հետ նույն խրամատում գտնվելն անհնարին է։

«Որքան էլ սիրեմ, հարգեմ իմ հայրենակցին, բայց գաղափարական իմաստով ես չեմ կարող այդ նույն խրամատում գտնվել, որտեղ խրամատ գոյություն չունի։ Ինչպե՞ս կարող եմ ճամփա գնալ մեկի հետ, ով խոսում է հանձնվելու մասին, ով խոսում է 120.000 հային 3 միլիոնով փոխարինելու մասին, ով խոսում է հայրենիքի սահմանների այս կամ այն թվի մասին»,- ընդգծեց Գալստանյանը։

Սրբազանը այսօրվա անվստահության մթնոլորտը համեմատեց սուրբգրային մի իրողության հետ. «Երբ մանուկները կառավարում են, փոքրերը դառնում են մեծերին անարգող, անարժանները՝ արժանավորին և խառնվում է ամբողջ հասարակությունը. սա Եսայի մարգարեի խոսքն է, և երբ ես այն բերում եմ մեր դաշտ, դա մեր այսօրվա պարզ անվստահության մթնոլորտն է. ոչ ոք խոսք չունի, անելիք չունի, որովհետև բոլորը ինչ-որ կերպով ինչ-որ բանից պիտակավորված են, խոցված են, թիրախավորված են, կապ չունի՝ ով է այդ մարդը, այլևս լսելն էլ է դարձել խնդիր»,- ասաց սրբազանը։

Աղբյուր` Փաստինֆո