Փաստ ինֆո

Դատավորներին պատժելու համար առիթ են օգտագործել համատարած խնդիր, որը կախված է յուրաքանչյուր դատավորի գլխին, գործ ունենք ոչ թե տիկին Նախշքարյանի կամ այլ դատավորի շահերի պաշտպանության հետ, այլ՝ ողջ դատական համակարգի։ Դատավորներին պատժելու առիթ են ընտրում գերծանրաբեռնվածությամբ երևույթները, որոնք համատարած են և դատական համակարգում չկա մի դատավոր, որը չի առերեսվում և այդ սուրը կախելով՝ իրական սպառնալիքներ են ներկայացնում ողջ դատական համակարգին և այն մեխանիզմը, որը գործարկվում է, պատրաստ է ամեն պահի խժռել ողջ դատական համակարգը։ Այս մասին հրավիրված մամուլի ասուլիսին ասաց լիազորությունները դադարեցված դատավոր Զարուհի Նախշքարյանի ներկայացուցիչ Սիրանուշ Սահակյանը։

Անդրադառնալով ինստիտուցիոնալ խնդիրներին՝ Սահակյանը նախ հիշեցրեց, որ օրենսդրական փոփոխություններով ստեղծվել էր ԲԴԽ-ն, որը պետք է կանգներ դատավորների կողքին, երաշխավորեր դատական համակարգի անկախությունը, օբյեկտիվացներ կարգապահական քաղաքականությունը, մինչդեռ, ԲԴԽ-ում պարբերաբար կադրային փոփոխություններ են եղել, որոնք չեն հանգեցրել ԲԴԽ կազմի բարելավման։ Եթե գիտնական-անդամների դերում անձինք էին, որոնք ունեին ճանաչում, ընտրվել էին խորհրդարանական ընդդիմության հետ կոնսենսուսով, ապա այժմ դրանք փոխարինվել են մեկ քաղաքական ուժի կողմից ընտրված անձանցով, ավելին՝ կուսակցական անդամներ, ընդ որում, այդ փոփոխությունները եղել են հարկադիր հրաժարականներով պայմանավորված։ Ինչ վերաբերում է ԲԴԽ դատավոր-անդամներին, Սահակյանն ընդգծեց, որ դատավոր-անդամների նշանակման մեխանիզմն այնպիսին էր, որ կարող էր ապահովել նրանց անկախ որոշումների կայացումը ԲԴԽ-ում, մինչդեռ, ներկայումս այնպիսի իրավիճակ ունենք, որ բացառում է նաև նրանց կողմից պրոֆեսիոնալ որոշումների կայացումը։

«Նախ՝ ընդհանրական դեսպոտիզմի տենդենց գոյություն ունի ԲԴԽ-ում, այստեղ քաղաքական ուժի քաղաքական թեկնածուները ոչ թե անդամներից մեկն են, այլ՝ ունեն դոմինանտ և ղեկավար դիրք, ավելին, շատ գործերում իրենց պատժողական քաղաքականությունն իրականացնում են հենց այդ կազմի ձեռքերով՝ իրենք անմասն մնալով այդ գործընթացից։ Այստեղ անկախության պակաս գոյություն ունի, քանի որ լոյալություն և չեզոքություն դրսևորողների պարագայում կա առաջխաղացման հեռանկար, իսկ ընդդիմադիր կեցվածքի պարագայում նրանք ևս կարող են կարգապահական ճանապարհով հեռացվել համակարգից»,- նշեց Սահակյանը՝ հավելելով, որ ԲԴԽ դատավոր անդամները ևս ունեն խնդիրներ՝ կապված դատական ակտերի ուշ հրապարակումների, ողջամիտ ժամկետներում գործերի քննության խախտումների հետ, եթե այդ հիմքով դատավորի լիազորություն են դադարեցրել, ապա հաջորդ դատավորը կարող է լինել նաև ԲԴԽ անդամ դատավորը, հատկապես, երբ հինգ ձայնով ԲԴԽ-ն կարող է որոշում կայացնել.«ԲԴԽ դատավոր-անդամները կարգապահական գործիքի միջոցով ևս կարող են լքել դատական համակարգը, եթե չենթարկվեն ղեկավար անձնակազմի ցուցումներին, կավարտվի նրանց կարիերան, իսկ առաջխաղացման սպասումներ ունեցող դատավորների պարագայում նաև խոստումներ կտրվեն, եթե նրանք բարեխիղճ ծառայություն իրականացնեն ԲԴԽ-ում»։

Աղբյուր` Փաստինֆո