Փաստ ինֆո

Ադրբեջանական քարոզչամեքենան վայնասուն է բարձրացրել ընդդեմ Հարավային Կովկասում Եվրամիության հատուկ ներկայացուցիչ Տոյվո Կլաարի։ Պարզվում է նրանց դուր չի եկել Լեռնային Ղարաբաղի բնակիչների անվտանգության հարցը կարեւորելու Կլաարի դիտարկումները։

«Փաստինֆո»-ն տեղեկացրել է, որ Բաքվում ն տված հարցազրույցում Կլաարը իրավաչափ էր համարել Լաչինի միջանցքով փոխադրումների թափանցիկության մասին Բաքվի բարձրացրած հարցը, բայց նշել, որ դա ապահովելու համար կան բազմաթիվ տարբերակներ՝ ըստ էության չպաշտպանելով անցակետեր տեղակայելու առաջարկը։

«Իհարկե, թափանցիկության պահանջն իրավաչափ է։ Կարծում եմ՝ այդ թափանցիկությանը հասնելը բանակցելու հարց է։ Դա անելու մի քանի տարբերակներ կան, որոնցից մի քանիսը նախկինում քննարկվել են։ Դրանցից մեկն է, օրինակ, այն, որ անցակետում լրացուցիչ սարքավորումներ լինեն, որպեսզի ռուսները կարողանան վերահսկել այնտեղով իրականացվող փոխադրումներ»,- ասել էր Կլաարն ու ավելացրել, որ միևնույն ժամանակ կարևոր է ղարաբաղահայության համար, որ նրանք ունենան անվտանգ տեղաշարժի հնարավորության զգացում։

Այս հայտարարությունը դուր չի եկել ադրբեջանցիներին եւ այսօր արթնանալով լծվել են Կլաարի դեմ հակաքարոզչական արշավին՝ վերջինիս մեղադրելով ընդհուպ մինչև Կրեմլի գործակալ լինելու մեջ, ինչի վերաբերյալ ծավալուն հոդված են գրել։

«Պարոն Կլաարն իր մակարդակով որոշել է կամուրջներ կառուցել Ռուսաստանի հետ՝ վճարելով Ադրբեջանի շահե՞րով»,- նշել է ադրբեջանցի հոդվածագիրը։

Հետաքրքրական է, որ ադրբեջանցիների համար հաճելի է եղել լսել «Լաչինով տեղափոխումների թափանցիկության» պահանջի «օրինաչափ լինելու» մասին Կլաարի հայտարարությունը, սակայն տրամադրության կտրուկ անկում են ունեցել, երբ պարզել են, որ Կլաարը նկատի ուներ ռուս խաղաղապահների հնարավորությունների ընդլայնումը, որպեսզի մեծացնեն իրենց հսկողությունն ու անհրաժեշտ սարքավորումներ ունենալով՝ ապահովեն փոխադրումները Լաչինի միջանցքով։

Աղբյուր` Փաստինֆո