Փաստ ինֆո

Օրերս Արցախի Հանրապետության նախագահ Արայիկ Հարությունյանը Անվտանգության խորհրդի ընդլայնված նիստ հրավիրելով Աժ քաղաքական ուժերի և վարչակազմերի ղեկավարների մասնակցությամբ՝ շատ վտանգավոր թեզեր է առաջ քաշել, որոնք, ըստ էության, կարող են դիտարկվել արցախցիների վրա հոգեբանական ազդեցության համատեքստում։

Մասնավորաբար, ազարբայջան սարքովի պետության ներկայացուցիչների հետ երկրորդ հանդիպման ժամանակ, վերջինս փաշինյանական մոտիվներով՝ ասես ազարբայջանի դեսպանի դերն է ստանձնել։

Հասկանում եք, մարդը հավաքել է երկրի քաղաքական ուժերին և յուրահատուկ «նաղլ» է արել այն մասին, թե՝ արցախյան կողմն ինչպես է իրեն դրսևորել ազարբայջանական կողմի հետ հանդիպման ժամանակ։ Իրազեկել է քաղաքական ուժերին, թե ինչ օրակարգով են հավաքվել առաջին հանդիպման ժամանակ՝ Լաչինի միջանցքի ապաշրջափակում, ՀՀ-ից Արցախ էլեկտրամատակարարման վերականգնում, բնական գազի անխափան մատակարարում և Կաշենի հանքավայրի վերաշահագործում։

Հետո՝ տեղեկատվություն է տվել երկրորդ հանդիպման մասին, որի ընթացքում, դատելով ԱՀ նախագահի խոսքից՝ ազարբայջանի ներկայացուցիչն օգտագործելով «ինտեգրացիա» բառը, արդեն փորձել է քաղաքական թեմաների քննարկման մեջ ներքաշել իրենց, սակայն Արցախի ԱԽՔ Շահրամանյանն, ըստ պատմողի՝ կանխել է նրան, թե բա՝ եթե պետք է քննարկեն քաղաքական հարցեր, դա պետք է լինի Ադրբեջանի կողմից Արցախի անկախության ճանաչման թեման:

Շարունակելով «նաղլը»՝ ԱՀ նախագահի պաշտոնն զբաղեցնող անձը արդեն հանդես է եկել «ա տեպեր յա ալիև» տոնայնությամբ՝ արցախցիներին փոխանցելով ազարբայջանական կողմի խողովակներով իրեն փոխանցածը /իսկը՝ փչացած՝ հեռախոս/, որը «նաղլ անողի» խոսքով՝ «կամ-կամ»-ի մոտիվով է եղել։ Այն է՝ «կամ՝ ընդունում եք ինտեգրացիոն քաղաքականությունը, կամ ՝առկա խնդիրներին որևէ լուծում չի լինելու, հակառակը՝ լինելու են ավելի կոշտ և կտրուկ քայլեր»։

Չէ, պատկերացնու՞մ եք՝ ամիսներ շարունակ աննկուն պայքար մղող արցախցուն ինչ «տուպիկ» է ուզում մտցնել պետության ղեկավարի աթոռն զբաղեցնող այս կատարածու անձը, ժողովրդական խոսքով ասած՝ «մեկ մեխին, մեկ նալին է խփելով», մեկ արցախյան տեսակետը, մեկ էլ՝ ազարբայջանական «հաթաթաները» հնչեցնելով։ Բայց սա էլ ամբողջը չէ, քանզի Արցախի Հանրապետության նախագահի բերանով հնչում է նաև Արցախի և արցախցու շահերին դեմ՝ այլընտրանքային «սարքովի, շինծու» տեքստ, որի միտք բանին շատ վտանգավոր է։

Հոգեբանական ազդեցության հանգույն․․․

Վտանգավոր է, քանզի այն շոշոփում է անպատկերացնելի, աներևակայելի «կամ-կամ»-ի տարբերակ։ Սա ոչ միայն վտանգավոր, այլև միտումնավոր քայլ է, քանի որ Արցախի նախագահի կողմից խորամանկ փորձ է արվում քննարկում, դիսկուրս ծավալել անպատկերացնելիի, աներևակայելիի շուրջ։

Այսինքն, «կամ-կամ»-ի տարբերակի մասին խոսելու անուղղակի առաջարկ է անում փաշինյանայան ենթակայական ու պարտվողական նոտաների տակ պար եկող սույնը։

Արցախցին այդ խորամանկ կուտը մերժելով պիտի մերժի՝ ուղղակի մոտ չգալով դրան՝ անտեսելով, արհամարհելով։

Ա․Ե․

Աղբյուր` Փաստինֆո