Փաստ ինֆո

Վարչական դատարանը՝ դատավոր Ռոբերտ Մաքեյանի նախագահությամբ, մերժել է ՀՀ ոստիկանության հայցադիմումն ընդդեմ Արցախյան երրորդ՝ 44-օրյա պատերազմում զոհված Մխիթար Գալեյանի հոր՝ Գարիկ Գալեյանի։

Հիշեցնենք, որ սեպտեմբերի 21-ին՝ ՀՀ Անկախության օրը՝ վաղ առավոտյան ոստիկանության ծառայողներն անհամաչափ բռնի ուժի գործադրմամբ «Եռաբլուր»-ից բերման են ենթարկել 37 քաղաքացու՝ զոհված զինծառայողների ծնողներին, որոնք ցանկանում էին թույլ չտալ Նիկոլ Փաշինյանին՝ մուտք գործել պանթեոն՝ նշելով, որ նա է իրենց որդիների մահվան մեղավորը։ Ոստիկանությունից հայտնել են, որ նրանք բերման են ենթարկվել՝ Վարչական իրավախախտումների վերաբերյալ օրենսգրքի 182-րդ հոդվածի հիմքով՝ ոստիկանների օրինական պահանջը չկատարելու համար, թեեւ տեսանյութերում պարզ երեւում է, որ ոստիկանները որեւէ պահանջ չեն ներկայացրել, նախ ուժի գործադրմամբ բերման են ենթարկել հայրերին, ապա նաեւ՝ մայրերին։ Ոստիկանների գործողությունների հետևանքով զոհված զինծառայողների մայրերից մի քանիսը ստացել են տարբեր աստիճանի մարմնական վնասվածքներ, որը հետագայում հաստատվել է նաև դատաբժշկական փորձաքննության եզրակացությամբ։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 441-րդ հոդվածի 2-րդ մասի 1-ին կետի հատկանիշներով, այն է՝ պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը, որը կատարվել է բռնություն գործադրելով։
Քրեական գործին զուգահեռ ոստիկանությունը հայցադիմումներ է ներկայացրել Վարչական դատարան՝ պահանջելով վարչական պատասխանատվության ենթարկել զոհված զինծառայողների ծնողներին։ Վարչական դատարանը՝ դատավոր Մհեր Պետրոսյանի նախագահությամբ, ավելի վաղ մերժել էր զոհված զինծառայող Դավիթի Ուզունյանի հորը՝ Բագրատ Ուզունյանի դեմ ներկայացված ոստիկանության հայցը։

Նույն դատարանի մեկ այլ դատավոր՝ Ռոբերտ Մաքեյանը, երեկ մերժել է Գարիկ Գալեյանի դեմ ներկայացված հայցադիմումը։ Դատարանն արձանագրել է, որ վարույթի շրջանակներում չի ներկայացվել որևէ ապացույց, որ ոստիկանության ծառայողների կողմից որևէ պահանջ է ներկայացվել Գարիկ Գալեյանին, ինչն իբրև չկատարել Գալեյանը։ Ըստ այդմ, դատարանում չի հիմնավորվել, որ Գալեյանը թույլ է տվել Վարչական իրավախախտումների վերաբերյալ օրենսգրքի 182-րդ հոդվածով նախատեսված արարքը՝ օրինական պահանջի չկատարումը։

Դատարանը մերժել է հայցադիմումը՝ արձանագրելով, որ այն անհիմն է։

Հեղինակ՝ Իզաբել Սահակյան

Աղբյուր` Փաստինֆո