Փաստ ինֆո

Դա պետության ղեկավարի խոսելու տոն է՞, ինչպե՞ս կարելի է 120 հազար մարդու սարսափի մեջ պահել։ ԱԺ-ում տեղի ունեցած ճեպազրույցի ժամանակ նման դիտարկմամբ է հանդես եկել ՀՀ ԱԺ «Հայաստան» խմբակցության պատգամավոր Գեղամ Նազարյանը՝ արձագանքելով Արցախի նախագահ Արայիկ Հարությունյան երեկվա հայտարարությանը։

«Փաստինֆո»-ն տեղեկացրել է, որ մարտի 6-ին Արցախում տեղի է ունեցել անվտանգության խորհրդի նիստ, որի ժամանակ Արայիկ Հարությունյանը հայտարարել է, թե ադրբեջանական կողմը իր խողովակներով փոխանցել է, որ կամ ընդունում եք ինտեգրացիոն քաղաքականությունը, կամ առկա խնդիրներին որևէ լուծում չի լինելու, հակառակը՝ լինելու են ավելի կոշտ և կտրուկ քայլեր:

«Մենք չենք ընդունել, չենք ընդունում և այսօր ուզում եմ նորից հայտարարել՝ այն միայն Անվտանգության խորհրդի որոշում չէ, այլ մեր ժողովրդի գերակշիռ մեծամասնությունն ընդունում է, որ մենք մեր անկախության իրավունքից, ինքնորոշման իրավունքից չենք շեղվելու»,- ասել էր Արայիկ Հարությունյանը՝ ավելացնելով, որ եթե կան այնպիսի տրամադրություններ հանրության մեջ, որ պետք է ընդունել Ադրբեջանի կողմից ներկայացված առաջարկությունը, ապա հնարավորություն ունեն իրենց քաղաքացիական իրավունքների շրջանակում բարձրաձայնել։

Գեղամ Նազարյանը հայտարարեց, որ Արայիկ Հարությունյանը պետք է պարզաբանի, թե ինչու է բարձրաձայնում Ադրբեջանի երազանքի մասին։ «Ես կուզեմ, որ այդ հարցին հենց Արայիկ Հարությունյանը պատասխանի ինչու է այդ մասին ինքը բարձրաձայնում ու հիմա։ Ինքն այնտեղ է, որ այդ խնդիրները կարգավորի։ Ինքը Արցախի հանրապետության նախագահն է եւ ոչ թե Ադրբեջանի ինչ-որ շրջանի հայերի միության ղեկավարը, այդ հարցադրումը անելու փոխարեն պետք է սուսուփուս անվտանգային խնդիրները լուծեր»,- ասել է Գեղամ Նազարյանը։

Համեմատություն կատարելով մեկ այլ հակամարտության հետ՝ Գ.Նազարյանը նկատել է, որ անգամ դժվար է պատկերացնել, որ, օրինակ, Պաղեստինի ղեկավարը, դիմելով ժողովրդին հայտարարի, թե Իսրայելի նպատակն է Պաղեստինը ընդգրկել Իսրայելի մեջ, հակառակ պարագայում ուժ կկիրառեն։

«Դա պետության ղեկավարի խոսելու տոն է՞, ինչպես կարելի է 120 հազար մարդու սարսափի մեջ պահել, եթե չհամաձայնեք ուժ է գործադրելու, դա ասելու բա՞ն է»,- ասել է Գ.Նազարյանը՝ ընդգծելով, որ այդպիսով հոգեբանական ճնշում է գործադրում արցախցիների վրա։

Ընդդիմադիր պատգամավորն արձանագրել է, որ  30 տարի Ադրբեջանը շատ ավելի վատ վիճակի մեջ էր, բայց իրենց պաշտոնյաները չէին ասում՝ գիտեք, հայերը պահանջում են Գանձակը, ասում էին՝ հայեր, հետ վերադարձրեք Ֆիզուլին:

«Ամեն հարթակ օգտագործում էին, ասում էին՝ Հայաստանն օկուպացրել է Ադրբեջանի 20 տոկոսը: Մենք ինչո՞ւ չենք ասում, որ Ադրբեջանն օկուպացրել է Հադրութի ամբողջ շրջանը, Մարտունու, Շուշիի շրջանների մի մասը: Արցախի իշխանության խնդիրը ո՞րն է, մարդկանց հուսահատության հասցնե՞լը, որ շուտով ճանապարհը բացվի, հաշվեն, թե մեկ օրում քանի մեքենա է դուրս գալու: Ես վստահ եմ, որ արցախցիները ամուր կմնան իրենց հողում, եւ Արցախը կապրի, կլինի հայկական»,- նշել է Գեղամ Նազարյանը:

Աղբյուր` Փաստինֆո