Փաստ ինֆո

Ադրբեջանի համար Լաչինի միջանցքի հարցը դարձել է շատ մեծ խնդիր. Ալիևն, ըստ էության, հայտնվել է փակուղային վիճակում։ «Փաստինֆո»-ի եթերում ասել է միջազգայնագետ Գրիգոր Բալասանյանը։

Նրա դիտարկմամբ՝ Ադրբեջանը, փակելով Լաչինի միջանցքը, հույս ուներ կարճ ժամանակահատվածում ստիպել հայկական կողմին՝ գնալ զիջումների և համաձայնվել ցանկացած պայմանների հետ։ «Արդեն տևական ժամանակ է անցել, հայկական կողմը նշաններ ցույց չի տալիս այդ պայմաններով միջանցքը բացելու ուղղությամբ, և Ալիևը այսօր հայտնվել է բավականին անհասկանալի և հիմար իրավիճակում, որովհետև միջանցքի փակումը չեն ողջունել ոչ միայն ռուսական կողմը, այլև նույն Եվրոպական Միությունը և Միացյալ Նահանգները»,- նշել է նա՝ ընդգծելով, որ Ալիեւի համար հիմա խնդիր է Լաչինի միջանցքը եւ՛ բացելը, եւ չբացելը։

«Եվ այս պարագայում հայկական կողմը պետք է շարունակի ճնշումները Ալիևի վրա, որպեսզի նա սեփական նախաձեռնությամբ բացի միջանցքը՝ առանց հայկական կողմից լրացուցիչ զիջումներ կորզելու»,- նշել է նա։

Փորձագետի դիտարկմամբ՝ Արցախի Հանրապետության տարածքում Ադրբեջանի վերջին դիվերսիան հերթական անգամ ապացուցեց այն թեզը, որ Ադրբեջանի հետ այս պահին գոնե Խաղաղության պայմանագիր ստորագրելն անհնար է։ «Հայկական կողմը այս պահի դրությամբ պետք է ընդհանրապես որևէ բանակցություններ չվարի ադրբեջանական կողմի հետ, դուրս գա այդ բանակցային գործընթացից այնքան ժամանակ, մինչև Ադրբեջանը չհասկանա, որ նման վարքագծով չի կարելի և հնարավոր չէ շարունակել բանակցություններ և ստորագրել Խաղաղության պայմանագիր»,- ասել է Գ.Բալասանյանը։

Մանրամասները՝ տեսանյութում։

Աղբյուր` Փաստինֆո