Փաստ ինֆո

Եվրոպական բարձրաստիճան պաշտոնյան ասել է, որ Նիկոլ Փաշինյանը վաղուց բանակցություն չի տանում Արցախի կարգավիճակի վերաբերյալ։ Այս մասին Ազգային ժողովում ճեպազրույցում հայտարարեց «Պատիվ ունեմ» խմբակցության ղեկավար Հայկ Մամիջանյանը՝ մանրամասներ ներկայացնելով իր և եվրոպացի բարձրաստիճան պաշտոնյայի երկխոսությունից։

«Իմ ելույթից հետո, որը վերաբերում էր Արցախի կարգավիճակին, ինքնորոշման իրավունքին և մեր երկու պետությունների համար այլ կարևոր անվտանգային կետերին, նա՝ ուղիղ տեքստով, նայելով աչքերիս մեջ, ասաց՝ պարոն Մամիջանյան, մենք ձեր դիրքորոշումը գիտենք, բայց դրանք այս պարագայում ռելեվանտ չեն, որովհետև Նիկոլ Փաշինյանը վաղուց բանակցություն չի տանում Արցախի կարգավիճակի վերաբերյալ և բանակցային տրամաբանությունն ամբողջությամբ հիմնված է Ադրբեջանի կազմում Արցախի ապագային»,- նշեց Մամիջանյանը։

Նրա խոսքով`հանդիպմանը ներկա են եղել նաև այլ պատգամավորներ՝ զգուշացնելով, որ եթե գործող իշխանությունները փորձեն ինչ-որ կերպ հերքել այս տեղեկությունները, ինքը պատրաստ է անուններ հնչեցնել։ Մամիջանյանը խոսեց նաև Արմեն Աշոտյանի հրապարակած փաստաթղթի մասին, որը գաղտնազերծում է տվյալ պահին ՀՀ իշխանությունների բանակցային տրամաբանությունը։

Նրա փոխանցմամբ՝ ներկայացված լինելով միջազգային տարբեր հարթակներում երբևէ իշխանական պատգամավորների շուրթերից չի լսել «Արցախի ինքնորոշման իրավունք»-ի մասին, իսկ մնացած բոլոր ձևակերպումները՝ մարդու իրավունքներ, արցախահայության հետագա անվտանգություն եզրույթները «լղոզոցի են», որոնցով փորձում են խաբել Արցախի և ՀՀ–ի ժողովրդին։
«Արցախի անվտանգության երաշխիք կարող է լինել բացառապես ինքնորոշման իրավունքի իրացումը և կարգավիճակի ապահովումը»,- հավելեց պատգամավորը

Նշենք, որ Արմեն Աշոտյանն ֆեյսբուքյան իր էջում հայ-ադրբեջանական բանակցություններից հրապարակել էր փաստաթուղթ, որտեղ նշվում էր, որ խաղաղության պայմանագրի դրույթներից մեկով նախատեսվում է ճանաչել միմյանց տարածքային ամբողջակնությունը։

Փաստաթղթում խոսվում է նաև Ղարաբաղի հայերի անվտանգության և իրավունքների մասին՝ Ադրբեջանի Սահմանադրությանն ու նրա միջազգային պարտավորություններին համապատասխան։

Մանրամասները՝ տեսանյութում։

Աղբյուր` Փաստինֆո