Փաստ ինֆո

Հասարակական-քաղաքական գործիչ Ավետիք Չալաբյանի պաշտպանները պնդում են, որ դատավոր Մնացական Մարտիրոսյանի նախագահությամբ գործի քննության սկզբնական փուլից խախտվել են պաշտպանության կողմից մի շարք իրավունքներ։ Այս մասին դատական նիստի ընթացքում հայտարարեց Չալաբյանի պաշտպան Արմեն Անդրիկյանը։

Երևանի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, շարունակվում է Ավետիք Չալաբյանի գործով դատական նիստը, որի ընթացքում պաշտպանության կողմը ինքնաբացարկի միջնորդություն ներկայացրեց դատավոր Մնացական Մարտիրոսյանին՝ հայտարարելով, որ վերջինս խախտել է պաշտպանության կողմի իրավունքները։

«Այդպես էլ գաղտնիք մնաց, թե ինչպես է սույն գործը մակագրվել Ձեզ։ Այդ հարցն այդպես էլ չպարզաբանվեց, այս խնդիրը չէր առաջանա, եթե պաշտպանական կողմից կարծիքով, ինչպես նաև, բազմաթիվ հրապարակումների միջոցով դիրքորոշումներ են արտայատվել, որ Դուք՝ որպես դատավոր գործունեության ընթացքում քննել եք քաղաքական գործեր, ընդ որում, քաղաքական գործեր ասելով նկատի ունեմ օրվա քաղաքական իշխանության ուշադրության կենտրոնում գտնվող քաղաքական գործեր, որոնցով կայացրել եք խնդրահարույց դատական ակտեր, որոնք ՄԻԵԴ-ի վճիռների հիման վրա՝ ճանաչվել են ոչ իրավաչափ, արձանագրվել է Ձեր կողմից դատապարտված անձանց իրավունքների խախտում։ Մեզ համար նաև Ձեզ սույն գործով որպես նախագահող դատավոր ընտրելը խնդրահարույց էր այն իմաստով, որ պարոն Չալաբյանը քաղաքական-հասարակական գործիչ, ՀՀ-ն այդ փուլում գտնվում էր քաղաքական և հասարակական գործընթացների կենտրոնում և պատահական չէր, որ խնդիր էր դրված ամեն գնով պարոն Չալաբյանին զրկելու ազատությունից, այդ կերպ փորձել ազդել նրա հասարակական-քաղաքական գործունեության վրա»,- նշեց պաշտպանը՝ հիշեցնելով նաև, որ դատարանը Չալաբյանին կալանավորելու որոշում էր կայացվել, թեև Չալաբյանն արդեն ազատության մեջ էր, ավելին, դատախազն ինքն էր միջնորդել, որ Չալաբյանի նկատմամբ գրավ կիրառվի։

Մյուս հանգամանքը, որին պաշտպանն անդրադարձավ, վերաբերում է հանրային պաշտպանի ներգրավմանը, որի նպատակը, ըստ պաշտպանի, նպատակ էր հետապնդում Չալաբյանին շարունակական կալանքի տակ պահելը։ Բացի այդ, պաշտպանը հիշեցրեց, որ գործող քրեական օրենսգրքով հետադարձ ուժի կիրառման հնարավորություն կա և, եթե անգամ դատարանը կգտնի, որ Չալաբյանը մեղավոր է, ապա վերջինիս նկատմամբ պատիժը հետադարձ ուժի կիրառման հիմքով չի կարող լինել մեկ տարի ազատազրկումից ավելին, ընդ որում, Չալաբյանը նախաքննության ընթացքում արդեն չորս ամիս կալանքի տակ է եղել, Մնացական Մարտիրոսյանն էլ որոշում էր կայացրել երեք ամսով երկարացնելու կալանքը։

«Այսինքն, դատարանը գտել է, որ մեկ տարի առավելագույն պատժի պայմաններում պարոն Չալաբյանը պետք է գտնվեր կալանքի տակ յոթ ամիս։ Ձեր գործողությունները ոչ իրավաչափ էր, ինչը հաստատվել է նաև վերաքննիչ դատարանի որոշմամբ»,- նշեց Անդրիկյանը՝ հավելելով, որ գտնում են, որ դատարանը կանխակալ վերաբերմունք ունի կողմի նկատմամբ։
Մնացական Մարտիրոսյանը մերժեց միջնորդությունը՝ անհիմն լինելու պատճառաբանությամբ։ Նշենք, որ գործը գտնվում է հիմնական դատալսումների փուլում և այսօրվա նիստին նախատեսված էր վկաների հարցաքննությունը, որոնք, սակայն չեն ներկայացել, ըստ այդմ դատական նիստը հետաձգվեց։

Հիշեցնենք, որ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում հարուցվել է քրեական գործ՝ ընդդիմության հավաքներին Հայաստանի ազգային ագրարային համալսարանի ուսանողների մասնակցության դիմաց նույն համալսարանի ուսանողական խորհրդի նախագահին նյութապես շահագրգռելու դեպքի առթիվ: Ենթադրյալ դեպքի վերաբերյալ 2022 թվականի մայիսի 9-ին լրատվական կայքերից մեկում ձայնագրություն է հրապարակվել՝ «1000 դրամ յուրաքանչյուր ուսանողի համար, Ագրարային համալսարանի դասախոսը դրդում է ուսխորհրդի նախագահին գումարի դիմաց կազմակերպել, որպեսզի ուսանողները մասնակցեն ընդդիմության հավաքներին՝ յուրաքանչյուր ուսանողի դիմաց առաջարկելով 1000 դրամ» վերտառությամբ:

Ըստ նախաքննական մարմնի՝ քաղաքական ընդդիմության կողմից կազմակերպվող հավաքներին մասնակցելու և որոշակի գործողություններ կատարելու դիմաց Հայաստանի ազգային ագրարային համալսարանի ուսանողական խորհրդի նախագահին նյութապես շահագրգռել են՝ առաջարկելով երկու հազար ուսանողի հավաքներին ներգրավելու դիմաց տրամադրել 2.000.000 ՀՀ դրամ գումար:

Հեղինակ՝ Իզաբել Սահակյան

Աղբյուր` Փաստինֆո