Փաստ ինֆո

Քաղաքապետարանում գործում է քաղաքական թիմ, որը խնդիրների լուծման արդյունավետությունից ելնելով՝ տարբեր տեղերում տարբեր մարդիկ են աշխատում։ Ես երեք տարի աշխատել եմ փոխվարչապետ, շատ լավ պատկերացնում եմ, թե ինչպես է աշխատում նախարարությունները, կառավարությունը։ Քաղաքապետը կառավարությունում չի աշխատել, չի եղել փոխվարչապետ երեք տարի՝ հենց այս շենքում, միգուցե ավելի քիչ է պատկերացնում ներսի պրոցեսներից, ընդամենն արդյունավետություն ենք ապահովում։ Այս մասին կառավարության նիստից հետո լրագրողների հետ զրույցում ասաց Երևանի փոխքաղաքապետ Տիգրան Ավինյանը՝ անդրադառնալով հարցին, թե ինչու է կառավարության նիստին մասնակցում ինքը, ինչու է Երևանի քաղաքապետը մղվել երկրորդ պլան։

Դիտարկմանը, որ նախկինում քաղաքապետերին չէր խանգարում, որ իրենք մասնակցեին նիստերին, թեև կառավարությունում չեն աշխատել, Ավինյանը հայտարարեց, թե կառավարության նիստին շատ ավելի շատ հարցեր են գալիս քաղաքապետարանի նախաձեռնությամբ, ինչը նաև պայմանավորված է նաև այն հանգամանքով, որ քաղաքապետարանի թիմն ավելի լավ է պատկերացնում։

Ավինյանը չցանկացավ մեկնաբանել իր վարկանիշի նվազման վերաբերյալ ուսումնասիրությունը։ Լրագրողի դիտարկմանը՝ հիմա խոսում է, որ իր ռեյտինգը բարձրանա, որովհետև Ապարանի հարցն էլ է ինքը քննարկում, Ավինյանն արձագանքեց. «Այո, այո, այո։ Ես չեմ խոսում, ես գործում եմ։ Ապարանի հարցը ես եմ խոսում, որովհետև նույն ներդրողն առաջարկել է Երևանում նախագիծ և ես տեղյակ եմ։ Ես չեմ խոսում»։

Լրագրողի հակադարձմանը, որ այնքան է խոսում, որ արդեն Երևանի փոխքաղաքապետարան են ասում, Ավինյանը նշեց, որ հումորներին նորմալ է վերաբերում, խնդիր չի տեսնում, պետք է ուշադրություն դարձնել գործին, ոչ թե՝ խոսքին։

Աղբյուր` Փաստինֆո