Փաստ ինֆո

Արցախի ու Ադրբեջանի ներկայացուցիչների՝ ռուսաստանյան խաղաղապահ զորակազմի հրամանատարության միջնորդությամբ նորերս կայացած հանդիպումներն ադրբեջանական կողմը լայնորեն օգտագործում է քարոզչական նպատակներով, շրջանառելով իր ապակառուցողական քարոզչական թեզերը ու կատարվածը բնորոշելով որպես հանդիպումներ «Ադրբեջանի Հանրապետության Ղարաբաղյան տեղաշրջանում ապրող հայերի ներկայացուցիչների հետ»։ Այդ մասին ֆեյսբուքյան գրառում է արել լրագրող, «Անալիտիկոն» ամսագրի խմբագիր Գեղամ Բաղդասարյանը։ «Ու հավելում է, որ իբր նախնական քննարկումներ են եղել հայերին Ադրբեջանում ինտեգրելու շուրջ՝ Ադրբեջանի սահմանադրության ու օրենսդրության համապատասխան։

Ինչ խոսք, Արցախի նախագահը, նախագահի աշխատակազմը, ինչպես նաև արցախյան ԱԳՆ-ն փաստարկված մեկնաբանություններ են տվել այս առնչությամբ, ու այդ շրջանառված տեքստերը բավականին հաջող են։ Սակայն դրանք որոշակիորեն ուշացած են, քանի որ պաշտոնական Բաքուն արդեն հասցրել էր տեղեկատվական նախաձեռնությունն իր վրա վերցնել, ավելին՝ նույնիսկ եվրոպական որոշ պաշտոնյաների դրական արձագանքը կորզել։

Քանի որ այս խմորը դեռ շատ ջուր է տանելու՝ կարծում եմ, որ կարելի է արցախյան կողմից հատուկ ներկայացուցիչ նշանակել ու հստակ ձևակերպել նրա առաքելությունը, ասենք՝ Ադրբեջանի Հանրապետության հետ պաշտոնական բանակցությունների գծով Արցախի Հանրապետության հատուկ ներկայացուցիչ։ Ու որպեսզի ներկայիս՝ տնտեսական հարցերով քննարկումները չներկայացվեն որպես կողմերի համապարփակ շփումներ՝ կարծում եմ, որ կարելի է երկու հատուկ ներկայացուցիչ նշանակել, մեկը՝ տնտեսական հարցերով, մյուսը՝ քաղաքական։

Բնականաբար, պաշտոնական Բաքուն չի համաձայնվելու մեր նշանակած՝ քաղաքական գծով հատուկ ներկայացուցչի հետ շփվել, բայց խնդիրն այն է, որ մեզ համար ևս առկա ձևաչափով ու ռուսաստանյան խաղաղապահ զորակազմի միջնորդությամբ քննարկումները, մեղմ ասած, լավագույն տարբերակը չեն։ Պիտի ձգտենք, որպեսզի քաղաքական բանակցություններ լինեն միջազգային կառույցի հովանու ներքո, ավելին՝ պիտի խստորեն հետևողական ու անզիջում լինենք այս հարցում։ Մեր նշանակած՝ տնտեսական հարցերով հատուկ ներկայացուցիչը կզբաղվի առկա ձևաչափով օրախնդիր հարցերով, իսկ քաղաքական ներկայացուցիչը կնախապատրաստվի միջազգային հովանու ներքո բանակցություններին ու այդ ընթացքում հստակ ուղերձներ կհղի միջազգային կառույցներին։
Ու մի բան էլ։ Կարծում եմ, որ Արցախի Հանրապետության ներկայացուցիչները չպիտի բարձրաստիճան պաշտոնյաներ լինեն, կարելի է նշանակել պետական կառավարման համակարգի միջին օղակներից։ Համեմատության համար նշեմ, որ Ադրբեջանի ներկայացուցիչն այդ երկրի Միլլի մեջլիսի պատգամավոր Ռամին Մամեդովն է»,-գրել է նա։

Աղբյուր` Փաստինֆո