Փաստ ինֆո

2014թ ներդրվեց պետական հատվածում վարձատրության միասնական համակարգը։ Հիմա քաղաքական կամ այլ շարժառիթներով համակարգն անընդհատ հարվածներ է ստանում, հիմքերը խարխլվում են, վաղուց արդեն դա չի կարելի համարվել միասնական համակարգ։ Հիմա դուք առաջարկում եք, որ սովորական դատախազը ստանա նախարարի, ԱԺ հանձնաժողովի նախագահի չափ պաշտոնային դրույքաչափ կամ՝ էապես ավել, քան, օրինակ մարզպետը։ Այս մասին ԱԺ-ում հայտարարեց ԱԺ «Հայաստան» խմբակցության պատգամավոր Թադևոս Ավետիսյանը՝ դիմելով արդարադատության փոխնախարար Լևոն Բալյանին։

«Բերում եք ստանդարտ hիմնավորումներ՝ ծանրաբեռնվածություն և այլն, բայց այս բոլոր հիմնավորումները բազմաթիվ այլ ծառայությունների դեպքում էապես ավել են, օրինակ, զինվորական ծառայությունը։ Այսինքն՝ այս հիմնավորումները, որ էապես ավելի նվազ են, դատախազների համար աշխատում են, իսկ մյուս ծառայություններում, որ էապես բարձր են, չեն աշխատում։ Սա է խնդիրը, ոչ թե՝ աշխատավարձերի բարձրացումը»,-նշեց պատգամավորը, ինչին արձագանքելով Արդարադատության փոխնախարար Լևոն Բալյանը նշեց, որ դատախազության համակարգում աշխատավարձների բարձրացման ընդհանուր մոտեցումը չի գնացել ընդհանուր գործակիցների բարձրացմամբ, որ մնացած պետական ծառայությունների հետ էական տարբերություն չլինի և անհավասար պայմաններ չստացվեն, իսկ թե ինչու է հավասարվում՝ այս կամ այն պաշտոնյայի աշխատավարձին, չի կարող ասել։

Ավետիսյանն արձագանքեց՝ նշելով, որ կան առաջնահերթություններ։
«Մոտեցումը որն է՝ որ ծառայությունն ավելի շատ է պետք օրվա իշխանությանը, բերենք դրա աշխատավարձերը բարձրացնենք։ Սա՞ է մոտեցումը։ Հիմա ասում եք՝ ճնշումների են ենթարկվում, է մի ճնշեք, ով է ասում ճնշեք դատախազներին, աշխատավարձը բարձրացնելով այդ մարդկանց ոչ անվտանգությունը կավելանա, ոչ՝ ճնշումները կնվազի։ Այսինքն՝ խնդիրը պարզ է։ Նեղ քաղաքական նպատակադրմամբ ծառայության դիմաց կամ ավելի լավ ծառայելու ակնկալիքով էապես թռիչքային՝ 92 տոկոսով բարձրացնում եք դատախազի աշխատավարձը, սովորական դատախազի աշխատավարձը հավասարվում է կառավարության անդամի, էլ չասեմ, որ էական տարբերություն է լինում զինծառայության հետ համեմատ»,- նշեց նա։

Բալյանը, պատասխանելով պատգամավորի դիտարկմանը, ըստ էության վերահաստատեց, որ սոցիալական վիճակի բարելավման առաջնահերթություններից գուցե կային, որ ավելի առաջնահերթ էին, քան՝ սա, բայց հիմա սա է բերվել քննարկման։

Մանրամասները՝ տեսանյութում։

Աղբյուր` Փաստինֆո