Փաստ ինֆո

Հաագայի դատարանի որոշումը Հայաստանի կողմից օգտագործվելու է միջազգային բոլոր ատյաններում։ Այս մասին այսօր՝ փետրվարի 28-ին, ԱԺ-ում լրագրողների հետ զրույցում նշեց ԱԺ նախագահ Ալեն Սիմոնյանը՝ ավելացնելով. «ես առնվազն խոստանում եմ, որ ադրբեջանցիները դրանից երջանիկ չեն լինելու»:

Հիշեցնենք, որ ՄԱԿ-ի Արդարադատության միջազգային դատարանը փետրվարի 22-ին միջանկյալ որոշում է կայացրել՝ պարտավորեցնելով Ադրբեջանին ապահովել Լաչինի միջանցքով մարդկանց, մեքենաների եւ բեռների երկկողմանի անխափան տեղաշարժը, սակայն առ այս պահը Հաագայի դատարանի որոշումը չի կատարվել։

Անդրադառնալով Ալիեւի հայտարարությանն այն այն, որ 2023-ը բեկումնային է լինելու Հայաստանի հետ հարաբերությունների կարգավորելու հարցում, ԱԺ նախագահը անշնորհակալ գործ համարեց նրան մեկնաբանելը։ «Ես չգիտեմ՝ ինքն ինչ նկատի ունի, որովհետեւ նա մի օր մի բան նկատի ունի, հետո պարզվում է՝ ուրիշ բան նկատի ուներ, հետո պարզվում է ինքը ներքին լսարանի համար էր ասում: Անշնորհակալ գործ եմ համարում մեկնաբանել իր ասածները: Մենք մեր երկրի շահերն առաջ տանելու, մեզ համար լավ պայմաններ ստանալու ուղղությամբ պետք է աշխատենք»,- ասել է Ալեն Սիմոնյանը:

Միաժամանակ նա դժվարացավ ասել, թե արդյոք Ադրբեջանը արձագանքել է, այսպես կոչված, «Խաղաղության պայմանագրի» վերաբերյալ Հայաստանի ներկայացրած տարբերակին։ «Այս պահին տեղեկություն չունեմ, որ որեւէ արձագանք կա, իսկ հնարավոր հանդիպումների քննարկումներ մշտապես կան, բազմաթիվ առաջարկներ կան բոլոր հնարավոր տեղերից»,- ասել է Ա. Սիմոնյանը։ Լրագրողի դիտարկմանը, թե ո՞վ պետք է լինի այն միջազգային երաշխավորը, որը պետք է ապահովի ԼՂ ժողովրդի իրավունքների իրացումը՝ ԱԺ նախագահն ընդունել է մեխանիզմի սահմանման անհրաժեշտությունը։

«Հիմա ձեւական ինչ-որ բան կնքել, հետո ասել՝ չի գործո՞ւմ... Միանշանակ է, որ բոլոր պայմանավորվածությունները պետք է ինչ-որ երաշխիք ունենան: Հիմա մենք ունենք նոյեմբերի 9-ի համաձայնագիր, որի իրականացումից մենք էլ ենք դժգոհ, ադրբեջանական կողմն էլ է դժգոհություն հայտնում: Պետք է հասկանանք՝ արդյոք մեխանիզմ անհրաժեշտ է: Մենք կարծում ենք, որ մեխանիզմը միանշանակ անհրաժեշտ է»,-հայտարարել Ալեն Սիմոնյանը:

Հիշեցնենք, որ կառավարության փետրվարի 16-ի նիստում Նիկոլ Փաշինյանը հայտարարել է, որ ավարտել են Ադրբեջանի հետ խաղաղության և հարաբերությունների հաստատման պայմանագրի նախագծի հերթական փուլի աշխատանքները, և մեր առաջարկները փոխանցել ադրբեջանական կողմին։

Աղբյուր` Փաստինֆո