Փաստ ինֆո

«Արցախը՝ մեր սրտերում» խորագիրը կրող ցուցահանդես-վաճառքը երեկ մի հարկի տակ էր հավաքել էր տուն ու տեղ կորցրած, բայց չկոտրվող տասնյակ արցախցիների։

Շրջափակման մեջ գտնվող Արցախում նույն ճակատագրին արժանացած՝ 44-օրյա պատերազմից հետևանքով հայրենի տներից զրկված հայրենակիցների ձմեռվա հոգսը փոքր-ինչ թեթևացնելու՝ Հադրութի շրջանի Տող գյուղից տեղահանված Մարգարիտայի առաջարկին միացել էին շուրջ յոթ տասնյակ մարդիկ՝ հիմնականում Արցախից տեղահանվածներ։

«Երբ իմացա, որ նման ցուցահանդես-վաճառք կա, որից գոյացած գումարի մի մասն ուղղվելու է Արցախում վերաբնակեցված, շրջափակման մեջ գտնվող մեր հայրենակիցներին, որոշեցի մասնակցել։ Ես շատ լավ գիտեմ, թե ինչ է դա, անցել ենք դրա միջով, շատ դաժան օրեր ենք ապրել»,- «Փաստինֆո»-ի հետ զրույցում պատմում է Նարինեն, ով տեղահանվել է Հադրութի շրջանի Մեծ Թաղեր գյուղից։

Նարինեն ու ամուսինը Մեծ Թաղերում ոչ միայն տուն, այլև խանութ, ֆերմաներ, մեղուներ են թողել։ Այժմ երեք երեխաների հետ Արարատի մարզի Սիս գյողում են ապրում՝ դարձյալ գյուղացու կյանքով։

Այստեղ էլ սեփական տուն է, բակումէլ թթենու ծառեր կան։ հող ենք մշակում, մեղուներ ենք նվեր ստացել, դրանով ենք զբաղվում, բայց անընդհատ հայացքս դեպի մեր տունն է։ Կարոտը խեղդում է.

հատկապես փոքր աղջիկս՝ Մարիամը, ահագին ժամանակ սթրեսի մեջ էր. անընդհատ ասում էր՝ մեր տունն եմ ուզում, հեծանիվս ու խաղալիքներս եմ ուզում...Ընդամենը չորս տարեկան էր, որ սկսվեց պատերազմը։ Ես նրանց վերցրել, դուրս եմ եկել գյուղից, իսկ ամուսինս մեկնել էր ճակատ. մեզ միացել է նոյեմբերի 10-ին։ Սարսափելի օրեր ենք ապրել, որ անգամ թշնամուս չեմ ցանկանա»,-պատմում է Նարինեն։

Աշխատող, արարող ընտանիքը փորձում է ոտքի կանգնել՝ արցախյան ավանդույթներն ու խոհանոցը Սիսում վերարտադրելով։ Արցախյան ավանդական փախլավան, աղանձը, որ տատիկից է հուշ մնացել, Նարինեն աշխատում է ճշգրտությամբ ընդօրինակել։

«Փախլավան, որն իրականում պախլավա է, քանի որ Մեծ պահքից հետո շատ են ուտում, միայն Արցախից բերած պոպոկով ու մեղրով եմ պատրաստում։ Աշխատում եմ աղանձի բաղադրաամսերն էլ այնտեղից բերել, քանի որ այդ դեպքում ինձ այնտեղ եմ զգում, սիրտս մի քիչ թեթևանում է»,-ասում է Նարինեն։

Ամուսիններով նաև արցախյան թթի օղի են պատրաստում։ Չնայած թթի ծառեր ունեն Սիսում, բայց օղու համար թութ նաև Արցախի Թաղավարդ գյուղից են բերում։ Նարինեն նշում է՝ դե, թթի օղու թութն Արցախից պետք է լինի (ժպտում է,-խմբ.)։

Ալթունյանների ընտանիքն «Ալթունյան» բրենդի ներքո ցուցահանդեսին նաև բնական չրերով են ներկայացել։

Մանկավարժի մասնագիտությունն ինչպես Նարինեին, այնպես էլ Շուշիից տեղահանված Վերոնիկային չեն խանգարում զբաղվել ինչ-որ գործով, որը որոշ չափով կօգնի լիցքաթափվել, կտրվել դաժան իրականությունից։

Մասնագիտությամբ մանկավարժ Վերոնիկան ցուցահանդես-վաճառքին «Շուշին վերածնվելու է» խորհուրդը կրող ձեռք աշխատանքներով է ներկայացել։

Ասում է՝ սա այն միտքն ու համոզմունք է, որ օգնում է ապրել ու պայքարել։

Ցուցահանդես-վաճառքից հավաքվել է 100 հազար դրամ։ Ցուցահանդեսի կազմակերպիչը՝ Մարգարիտան, լիահույս է, որ գումարը կբավականացնի, որ տեղահանված գոնե 4 ընտանիքի համար, որոնք այսօր Արցախում հայտնվել են շրջափակման մեջ, փայտի վառարան ձեռք բերեն։ 

Աղբյուր` Փաստինֆո