Փաստ ինֆո

Հաագայի դատարանի նման կառույցները, չնայած դրանք միջազգային իրավական բարձր հեղինակություն ունեցող կառույցներ պիտի որ լինեին, և գուցե կան, բայց քաղաքականացված են: Այն հանգամանքը, որ Հայաստանը նոր գործիքակազմ է որդեգրել, այսինքն երրորդ, չորրորդ ինստիտուտներն են ներգրավվում Լաչինի միջանցքի շուրջ տեղի ունեցող պրոցեսի մասով, ոչ միայն իրավական խնդիր է, այլ, հատկապես քաղաքական: Դա կապված է այն հանգամանքի հետ, որ գործող իշխանությունները փոխում են Հայաստանի արտաքին քաղաքական ուղեգիծը: «ՓաստԻնֆո»-ի եթերում ասել է քաղաքագետ, ք.գ.թ. Ալեն Ղևոնդյանը:

Փորձագետի խոսքով, ցանկացած ուղեգիծ փոփոխելը ունի որոշակի գին: Հաագայի դատարանի վճիռը արձանագրում է հետևյալը, որ առնվազն հայկական կողմը չի կարողացել հիմնավորել Լաչինի միջանցքի բլոկադայի հանգամանքը: Էստեղ կարմիր գծով կա մի անտեսանելի կողմ, որի մասին չեն խոսում՝ ռուսական խաղաղապահների մասին է խոսքը: Ակնհայտ է, որ խնդիրը ոչ թե Ադրբեջանի մեջ է, ոչ թե Հայաստանի մեջ է, այլ խնդիրը ռուսական խաղաղապահներին, միգուցե ամենամեծ գնով, դուրսմղելն է:

«Ես աշխարհում չեմ տեսել էդպիսի դեպք, երբ որ ինչ որ մեկը փորձի բացահայտ ասի ես իմ պետությունը սարքելու եմ մարտադաշտ՝ էս երկու գերպետությունների և գերբևեռների միջև, որոնք Ուկրաինայում իրար դեմ են պատերազմում: Արևմուտքը չի ցանկանում Ռուսաստանի փլուզումը: Արևմուտքը ցանկանում է թույլ, կառավարելի, հումքային պահեստ հանդիսացող Ռուսաստան: Նույն մոտեցմամբ փորձում են Իրանի հետ աշխատել»,- հավելեց Ա. Ղևոնդյանը:

Բանախոսը այն կարծիքին է, որ եվրոպական դիտորդները մի խնդիր լուծելու համար չի, որ գալիս են: Նրանք գալիս են մի շարք խնդիրներ լուծելու, և մի շարք «գործընկերների» հետ հարաբերվելու համար: Եվրամիությունը չի ցանկանում սանձարձակ Ադրբեջան ունենալ:

Անդրադառնալով Արցախի պետնախարարի հնարավոր պաշտոնանկությանը, քաղաքագտետը նշեց, որ, երբ Արցախում նախագահական ընտրություններ նշանակվեն հին ընտրական կարգով, այսինքն տեղերում նախագահ ընտրվի, այդ օրվանից հետո Արցախը էլ նախագահ չի ունենա: Այսինքն, իրավունքի առումով և տեխնիկապես, Արցախը հանձնելու են Ադրբեջանին: «Արցախում բազմաթիվ պրոցեսներ են տեղի ունենալու: Ռ. Վարդանյանը կպաշտոնազրկվի, իշխանության կբերվեն այլ շրջանակներ, որոնք իշխանամերձ են հայկական գործող շրջանակներին, բայց ոչ թե քպ-ական, այլ սորոսական թևի ներկայացուցիչներ են: Բայց դա վերջնական չի լինի: Արցախը չի լինի Ադրբեջանի մաս, բայց չի լինի նաև Հայաստանի մաս»,- եզրափակեց բանախոսը:

Մանրամասները՝ տեսանյութում:

Աղբյուր` Փաստինֆո