Փաստ ինֆո

Արցախի պետնախարարի պաշտոնից Ռուբեն Վարդանյանի ազատման համար անհաջող պահ է ընտրվել։ Դա կարելի էր անել Ադրբեջանի կողմից Արցախի պաշարումը վերացնելուց հետո և ոչ թե հիմա։ Վարդանյանի ազատումը հիմա սխալ էր թեկուզ միայն այն առումով, որ նման պահանջ բազմիցս հնչեցրել է Ադրբեջանը։ «Փաստինֆո»-ի հետ զրույցում նման տեսակետ հայտնեց ռազմական պատմաբան Արմեն Այվազյանը։

«Այստեղ մեկ այլ կարևոր հանգամանք կա․ ի՞նչ է նշանակում կարևոր պետական պաշտոնում նշանակել մեկին ու երեք ամիս անց ազատել։ Նման կադրային քաղաքականությունն արդեն իսկ խախուտ և անլուրջ է։ Նման դեպքում կասկածներ են առաջանում, որ Վարդանյանի թե՛ նշանակումը, թե՛ ազատումն ինչ-որ ծրագրի մաս է՝ մշակված արտաքին ուժերի կողմից։ Բայց թե ինչ ծրագիր է, ինչ սցենար է մշակվել, որը ՀՀ և Արցախի իշխանություններն իրականացնում են, կարող ենք ընդամենը ենթադրել»,-ասաց Այվազյանը։

Այս ամենով հանդերձ, ըստ մեր զրուցակցի, Վարդանյանի հեռացումն Արցախի բռնած ուղուց, պետք է որ, հետքայլ չենթադրի, եթե հավատալու լինենք Արցախի նախագահի հավաստիացումներին։

«Եթե դատենք Արայիկ Հարությունյանի ելույթից, ապա որևէ շեղում Արցախի բռնած ուղուց Վարդանյանի հրաժարականով չի լինելու։ Այսինքն՝ Արցախը շարունակելու է մնալ որպես հանրապետություն, որևէ պարագայում չի լինելու Ադրբեջանի մաս։ Մանրամասն ներկայացված է ելույթում, որ Ադրբեջանի հետ շփումները, ինչպես և հիմա, միայն տեխնիկական, առօրեական հարցերի շուրջ են լինելու, բայց ոչ երբեք՝ հիմնարար հարցերի շուրջ։ Արցախի նախագահը նաև ընդգծել է, որ Ադրբեջանի հետ կարող ենք բանակցել միայն իրավահավասարության սկզբունքի հիման վրա»,-նկատեց Այվազյանը՝ հավելելով, որ այլ հարց է այն, որ Ադրբեջանը նման ձևաչափով բանակցությունների չի գնալու։

Աղբյուր` Փաստինֆո