Փաստ ինֆո

ԲԴԽ կրեատիվ նախագահը, որը հայտնի դարձավ դատարաններում կաշառքի սակագների և տարբեր հարցերի լուծման ստվերային կանոնների իրազեկմամբ ու տարածմամբ, այժմ դատարանների վրա ստվերային ազդեցության և դատավորների կախվածության նոր հնարք է մտածել։ Դատական պրակտիկայի ամփոփման անվան տակ պատրաստվում են ստուգումներ անցկացնել դատարաններում, իբր թե դատավարական կանոնների պահպանման նպատակով։

Դատարաններում տիրող անտրամաբանական ծանրաբեռնվածության պայմաններում անհնար է գտնել մեկ տարուց ավելի ժամկետով աշխատած դատավորի (բացառությամբ Շիրակի մարզի դատարանի, որտեղ նշանակվելուց հետո շատ կարճ ժամկետում դատավորները տեղափոխվում են), որը չունենա դատավարական ժամկետների հետ կապված խախտումներ։

Այս հնարքը թույլ կտա հնազանդ պահել նորանշանակ դատավորներին, ցանկացած պահի արդարադատության մտերիմ նախարարի միջոցով կարգապահական վարույթ կազմակերպելու սպառնալիքով, իսկ մինչև իր ԲԴԽ նախագահ դառնալը նշանակված դատավորներին բացատրել, թե ինչպես պետք է հարցերը լուծվեն ոչ «կոռուպցիոն» եղանակներով։

Հաշվի առնելով, որ ներկայիս ԲԴԽ անդամների մի մասն ուղղակիորեն առնչվում է Վարդազարյան-Ջհանգիրյան քրեական գործին, մեկը պաշտոնեական առաջխաղացում է ակնկալում, մյուսը ԲԴԽ անդամի համար պահանջվող մասնագիտական ստաժի հարց ունի, չնայած անվանի գիտնական է և ի վերջո ընտրվել է, մեկն էլ քավորի խաթրը պահելու ավանդույթի հետ հարց կունենա, մյուս անդամն էլ Աննա Փիլոսյանի ճակատագրին կարժանանա, եթե ճիշտ չքվեարկի, ապա դժվար չէ կռահել, որ դատավորներին նոր լուրջ փորձություններ են սպասում։

Ի դեպ, չզարմանաք, եթե ԲԴԽ-ն հայտարարի, որ դատավորներն են Դիլիջանի շոու-փարթիի ժամանակ միաձայն որոշել, որ դեպարտամենտից գան իրենց ստուգելու։

Աղբյուր` Փաստինֆո