Փաստ ինֆո

Սյունիքի մարզի Խնածախ գյուղում թշնամու ներկայությունը զգում են ամեն քայլափոխի։ Գյուղացիներն անհոգ ու ապահով չեն ապրում առնվազն երկու տարի։ 44-օրյա պատերազմից հետո սահմանապահ են դարձել Սյունիքի բազմաթիվ գյուղեր, իսկ Խնածախը հայտնվել ուղիղ սահմանին։

«Իմ տնից ուղիղ գծով 150-200 մետր այն կողմ թշնամու դիրքերն են։ Համակերպվել ենք, քանի որ այլ բան այս պահին չենք կարող անել, իսկ մեր հողից, մեր օջախներից էլ չենք պատրաստվում դուրս գալ։

Որոշները հեռացել են, բայց կարևորը՝ երիտասարդները չեն լքում գյուղը։ Եթե խաղաղ պայմաններում էլի հնարավոր է՝ ինչ-որ մեկը դուրս գա գյուղից, ապա վիճակը սրված ժամանակ դ բացառվում է։ Հիմա ահագին երիտասարդներ աշխարհազոր են գրվել ու զինվորների հետ մեկտեղ պահում են մեր դիրքերը»,- «Փաստինֆո»-ի հետ զրույցում ասում է Խնածախի նախկին վարչական ղեկավար Կարո Թավադյանը։

Գյուղի նախկին վարչական ղեկավարը նկատում է՝ վաղը եթե պատերազմը լինի, ավտոմատի չի լինելու, բայց գոնե զենքից օգտվել կարողանալը, զենք ունենալը ինչ-որ չափով ապահովության զգացում է առաջացնում։

«Որ տեղն ընկնի, գոնե երիտասարդները զենք կունենան։ Չես կարող ասել, թե վաղն ինչ կարող է լինել։ Բոլորս էլ, հասկանալի է, որ տևական խաղաղություն ենք ուզում, բայց խաղաղությունը մուրալով կամ միջնորդներ մեջտեղ գցելով չի լինում։ Խաղաղ ապրելու համար ուժեղ պետք է լինենք, բայց ցավոք, հիմա չունենք այդ ուժը։ Ամեն մեկս էս օրով ենք ապրում, յոլա ենք գնում՝ մինչև տեսնենք, թե ինչ է լինում»,-ասում է Թավադյանը։

Գյուղում անասնապահությունից բացի, այլ զբաղմունք չկա։ Մարդիկ այդ հնարավորությունից էլ ենք զրկված։ Արոտավայրերի զգալի մասը հիմա թշնամու տիրապետության տակ է, մնացած մասն էլ գրեթե ամբողջությամբ դիրքերի երկարությամբ է ձգվում․ այնտեղ ևս, ինչպես Թավադյանն է ասում, չեն թույլատրում անասուններին արածեցնել։ Գյուղացիները ստիպված անասնագլխաքանակն են կրճատել նաև։

Գյուղում յուրաքանչյուրի մտահոգության կարևորագույն առարկան անվտանգությունն է․ մարդիկ երանի են տալիս ոչ վաղ անցյալին, երբ իրենց հողում ազատ, անկախ ու անհոգ ապրում ու արարում էին։

Աղբյուր` Փաստինֆո