Փաստ ինֆո

Արցախում հումանիտար ճգնաժամին զուգահեռ խորանում է նաև ներքաղաքական ճգնաժամը։ Ռուբեն Վարդանյանի հնարավոր պաշտոնանկության լուրերը, նոր դերակատարների ակտիվացումը պայամանվորված են որոշակի գործոններով և առնվազն մտահոգիչ են։ Այս մասին «Փաստինֆո»-ի հետ զրույցում ասաց քաղաքագետ Սուրեն Սուրենյանցը։

Քաղաքական համապարփակ ճգնաժամի առաջին և հիմնական պատճառն, ըստ քաղաքագետի, Արցախի էլիտայի ներսում առկա գզվրտոցն է, որտեղ ոչ մի ծրագրային խնդիր չկա, մենք տեսնում ենք հակամարտություն, բայց չենք նկատում՝ հակամարտող կողմերից որն ինչ տեսլական ունի Արցախի զարգացման կամ ստեղծված իրավիճակի հաղթահարման շուրջ։ Բացի այդ՝ կարող է անհիմն տպավորություն ստեղծվել, որ Ռուբեն Վարդանյանի պաշտոնանկության օրակարգը Բաքուն է թելադրում, մինչդեռ սա ոչ այլ ինչ է, եթե ոչ ադրբեջանական քարոզչամեքենայի տեխնոլոգիական հնարք, որը պաշտոնական Բաքուն առավելագույնս կփորձի հրամցնել ինչպես ներքին, այնպես էլ հայաստանյան լսարանին։ Սուրենյանցի խոսքով՝ Ադրբեջանում շատ արագ որսացին Արցախիի էլիտայում եղած տարաձայնությունները և ամեն գնով կփորձեն պատրանք ստեղծել, որ Արցախում օրակարգ թելադրողն իրենք են։

«Վարդանյանի պաշտոնանկությունը Ալիևի միջամտության հետևանքը չէ։ Սա ավելի շատ պատրվակ է, քան իրական բովանդակություն, բայց նաև այլ խնդիր կա, այնուամենայնիվ, Վարդանյանը ֆինանսական ռեսուրսներ ու միջազգային կապեր ունեցող անձ է, որը կարող է որոշակի սուբյեկտություն հաղորդել Արցախին, իսկ Ադրբեջանի քաղաքական գծի մեջ դա չի տեղավորվում, որովհետև Ադրբեջանը համարում է, որ ԼՂ խնդիրը իր ներքին հարցն է և չի հանդուրժում, որ Արցախում ազդեցություն ունեցող մեկը կարող է օրակարգ թելադրել»,- նշեց քաղաքագետը։

Սուրենյանցը համոզված է՝ Վարդանյանը «Մոսկվայի մարդը» չէ, եթե այդպես լիներ պաշտոնական Մոսկվան ամեն ինչ կաներ, որ նա շարունակեր պաշտոնավարել։ Ստացվում է, որ Վարդանյանի նշանակման, և հնարավոր պաշտոնանկության մոտիվները շարունակում են մնալ անհայտ, հետևաբար՝ կարելի է ասել, որ Արցախի պետնախարարի դեմ Բաքվի քարոզչությունը պատրվակային է, Բաքուն շատ հարմար թիրախ է ընտրել և Արևմուտքում կարողանում է ներկայացնել, թե իբր Վարդանյանը «Ռուսաստանի մարդն է»։

Հիշեցնենք, որ «Փաստինֆո»-ի տեղեկություններով՝ վաղը Արցախի նախագահ Արայիկ Հարությունյանը պատրաստվում է հայտարարել ԱՀ պետնախարար Ռուբեն Վարդանյանին պաշտոնից ազատելու մասին, թեեւ վերջինս մերժել է հրաժարականի դիմում գրելու Արայիկ Հարությունյանի առաջարկը։

Աղբյուր` Փաստինֆո