Փաստ ինֆո

Առնվազն երկու դրվագով ԱՆ նախարարը շփոթել է իրեն՝ դատական իշխանության հետ։ ԲԴԽ նիստում նման դիտարկմամբ է հանդես եկել դատավոր Զարուհի Նախշքարյանը, որին կարգապահական պատասխանատվության ենթարկելու արդեն 4-րդ միջնորդությունն է գործադիր իշխանության կողմից ներկայացվել ԲԴԽ-ին։

Զարուհի Նախշքարյանը նկատել է, որ իր համար կարող է քննադատելի լինել գործադիր իշխանության անգործությունը որպես դատական իշխանության դատավոր, որպես այդ խնդիրներին առնչվող դատավոր։

Նախշքարյանը հայտարարեց, որ որպես դատավոր 10 տարվա ողջ գործունեության ընթացքում արել է ամեն բան, որպեսզի փորձի ավելի բարենպաստ պայմաններ ստեղծել ողջամիտ ժամկետներում գործի քննության, արդար դատարանի ձևավորման, հեղինակության բարձրացման ուղղությամբ:

«Իսկապես զավեշտ է, որ ես կանգնած եմ այստեղ, բայց ամեն ինչն ունի իր դրական կողմերը: Մարտի 5-ին կլրանա դատավոր լինելու իմ տասը տարին: Միշտ ընկճված եմ եղել, որովհետև համարել եմ, որ ես գնահատված չեմ որպես դատավոր, որպես իրավաբան, ես ինձ բավարարված չեմ զգացել, որ այս շղարշը, որը հետևում է դատական իշխանությանը, հետևում է նաև ինձ ու կարծել եմ, որ իմ ջանքերը չեն գնահատվում, բայց պարոն Մինասյանը այս միջնորդությամբ իմ ողջ պատկերացումները հերքեց, ես շատ շնորհակալ եմ ԱՆ նախարար պարոն Մինասյանին, որ ինքը համարել է հնարավոր ինձ ԲԴԽ-ի առջև կանգնեցնել այս ծիծաղելի մեղադրանքներով: Ինձ մեղադրել նրա մեջ, որ ես փորձել եմ հեղինակազրկել դատական իշխանությունը, ուղղակի զավեշտ է, սա նշանակում է, որ ես եղել եմ արդար դատավոր, որ ես փորձել եմ ժամկետներ չխախտել, սա նշանակում է, որ մինչ այդ տված իմ բոլոր հարցազրույցները, բոլոր ելույթները արդար են եղել ու ազնիվ», - ասաց Զարուհի Նախշքարյանը՝ հավելելով, որ շատ ուրախ է, որ պարզ ճակատով է կանգնած ԲԴԽ-ի առջև:

Նա հիշեցրեց, որ ինքն արդեն չորրորդ անգամ է կանգնում ԲԴԽ առջև և բոլոր վարույթներով ԲԴԽ անդամներն իրեն հարցեր են ուղղել, որևէ վարույթով նման բան չի եղել։

«Եթե Խորհուրդը համարի, որ ես չպետք է մնամ դատավոր, չպետք է շարունակեմ իմ գործունեությունը, ես գտնում եմ, որ դա լավ գին է, որն առաջարկվում է իմ աթոռի համար: Խնդիր չեմ տեսնում, անհանգստություն չեմ ապրում։ Դեռ մեծ հարց է՝ որը ես կնախընտրեի», - ընդգծեց դատավորը, ապա, դիմելով ԲԴԽ անդամներին՝ ասաց՝ «դժվար որոշման առաջ եք կանգնած, որովհետև այս վարույթը խոսքի ազատության մասին է, չլուծած խնդիրների քննարկման մասին է ու, ի վերջո, այդ խնդիրների լուծման մասին է»։

Նա ընդգծեց, որ եթե իր լիազորությունների դադարեցումը կծառայի այն նպատակին, որ այս հարցը կլուծվի ու դատավորներին չեն զոհաբերի կարգապահական վարույթների միջոցով, ինքն իրեն շատ երջանիկ ու բավարարված կզգա:

«Մի մոռացեք, որ ձեր որոշումից է կախված շառավիղի էֆեկտը, որ կունենա ձեր որոշումը։ Հիմա մենք ինչ ենք ուզում, որ դատավորները չբարձրացնեն իրենց խնդիրները, այդ թվում՝ ԲԴԽ-ի առջև, չպետք է քննադատեն ԱՆ-ին և իր անգործությունը, օրենսդիր մարմնին, որ մեզ այս վիճակի մեջ է թողել, պետք է ձեզ դա ասենք, դուք եք այդ սահմանադրական մարմինը։ Եթե նպատակն այն է, որ չխոսենք, ուրեմն այո, նման որոշում կարող է կայացվել, իսկ եթե նպատակը դա չէ, ապա այս միջնորդությունը չի կարող բավարարվել, թող ԱՆ-ն ուրիշ պատճառ մտածի՝ իմձ հեռացնելու, եթե արդար է », - եզրափակեց Նախշքարյանը:

Դատավորի ներկայացուցիչ Սիրանուշ Սահակյանը եզրափակիչ ելույթում արձանագրեց, որ դատական համակարգում կան դատավորներ, որոնք կարող են իրենց զոհել՝ հանուն համակարգի կայացման և հակառակը՝ ՀՀ պետական համակարգում կան շատ կարևոր պետական պաշտոններ զբաղեցնող անձինք, որոնք հանուն ոչ թափանցիկ, ոչ արդար շահերի՝ կարող են զոհաբերել համակարգեր: Սահակյանը նշեց, որ չկա կրկնվող որևէ այլ դատավոր ՀՀ-ում, որի առնչությամբ այդքան կարճ ժամկետում այդ քանակով կարգապահական պատասխանատվության ենթարկելու միջնորդություններ ներկայացված լինեն ԲԴԽ՝ հենց ԱՆ-ի կողմից:

Լսելով կողմերի դիրքորոշումը՝ ԲԴԽ-ն հեռացել է խորհրդակցական սենյակ՝ որոշում կայացնելու: Որոշումը կհրապարակվի փետրվարի 27-ին, ժամը՝ 11,30-ին:

Հիշեցնենք, որ Երևանի ընդհանուր իրավասության դատարանի դատավոր Զարուհի Նախշքարյանի նկատմամբ ՀՀ արդարադատության նախարարության կողմից կարգապահական վարույթ է հարուցվել՝ իր կարծիքն ու դիտարկումները հայտնելու համար։ Ընդ որում, դատավորի դիտարկումները վերաբերում էին համակարգային խնդիրներին, ինչպիսին՝ դատարանների ծանրաբեռնվածությունն է, որի պատճառով տուժում է արդարադատությունը ու դատավորները հաճախ չեն հասցնում անգամ դատական ակտերը ժամկետների սահմանում տրամադրել։ Մասնավորապես, միջնորդության փաստական հիմքը դատավորի հրապարակային խոսքն է, որով նա «իր դրական վերաբերմունքն է արտահայտել դատավոր Աննա Փիլոսյանի առնչությամբ» և, ըստ արդարադատության նախարարի, հրապարակայնորեն կասկածի տակ է առել դատավոր Ա.Փիլոսյանի վերաբերյալ ԲԴԽ դատական ակտը։

Հեղինակ՝ Իզաբել Սահակյան

Աղբյուր` Փաստինֆո