Փաստ ինֆո

Ես շատ շնորհակալ եմ Արդարադատության նախարար պարոն Մինասյանին, որ հնարավոր է համարել ինձ ԲԴԽ-ի առջև կանգնեցնել այս ծիծաղելի մեղադրանքներով: Ինձ մեղադրել նրա մեջ, որ ես փորձել եմ հեղինակազրկել դատական իշխանությունը, ուղղակի զավեշտ է, սա նշանակում է, որ ես եղել եմ արդար դատավոր, որ ես փորձել եմ ժամկետներ չխախտել, սա նշանակում է, որ մինչ այդ տված իմ բոլոր հարցազրույցները, բոլոր ելույթները արդար են եղել ու ազնիվ։ ԲԴԽ-ում նման հայտարարությամբ է հանդես եկել Երևանի ընդհանուր իրավասության դատարանի դատավոր Զարուհի Նախշքարյանը՝ իր եզրափակիչ ելույթում։

«Փաստինֆո»-ի թղթակցի հաղորդմամբ՝ այսօր ԲԴԽ-ում ավարտվեց դատավոր Զարուհի Նախշքարյանին կարգապահական պատասխանատվության ենթարկելու մասին միջնորդության քննությունը։ Վերջինիս արձանագրմամբ՝ դատավորի խոսքը դիտվել է որպես կարգապահական խախտում ոչ թե ինքնին, այլ՝ արդարադատության նախարարության մատուցած ընկալումներով և մեկնաբանություններով, մինչդեռ, դատավորը չի կարող պատասխանատվություն կրել նախարարության ընկալումների և մեկնաբանությունների համար, մանավանդ, այն պայմաններում, երբ ընկալումների և մեկնաբանությունների հեղինակ հաստատությունը չի կարող դիտվել որպես անկողմնակալ դիտորդ՝ հենց ԲԴԽ-ի սահմանած չափորոշիչներով:

«ԱՆ նախարարը ԲԴԽ սահմանած չափորոշիչներին ակնհայտորեն չի համապատասխանում, քանի որ հանդիսանում է կարգապահական վարույթ հարուցող մարմին, այդ թվում, դատավոր Աննա Փիլոսյանի նկատմամբ, այսնինքն, անվիճելիորեն շահագրգռված է գործի ելքով, մինչդեռ, իրեն անվանում է անկողմնակալ դիտորդ, ինչը չի կարող լրջորեն ընկալվել»,- նշել է դատավորը:
Նրա փոխանցմամբ՝ ԱՆ միջնորդության մեջ նշված է, թե դատավոր Նախշքարյանը անօրինական է հայտարարել ԲԴԽ տվյալ դատական ակտը։ «Խնդրում եմ ԲԴԽ յուրաքանչյուր անդամի կարդալ տեքստը, ես նման բան չեմ ասել, եթե նախարարությունն ինչ- որ խնդիր ունի անմիջականորեն համատեքստում և խոսքի ընկալման հարցում, դա ինձ չի հետաքրքրում, Խորհրդին էլ չպետք է հետաքրքրի, ԲԴԽ-ին պետք է հետաքրքրի, թե ինչ եմ ասել բառացի»,- նշեց դատավորը։

Ներկայացնելով միջազգային պրակտիկան՝ դատավորը հիշեցրեց, որ Եվրոպայի դատավորների միությունների ընդհանուր ժողովում անդրադարձ է եղել դատավորների խոսքի ազատության սկզբունքին, նախագահողը մեջբերելով ՄԻԵԴ-ի նբախադեպային որոշումներ, որոնցից բխեցրել է, որ դատավորները չեն կարող զրկլվել խոսքի ազատությունից, որը կապված կլինի դատական իշխանության ընդհանուր գործունեության հետ:

«Կոչ ենք անում բոլոր դատական և գործադիր իշխանության ներկայացուցիչներին՝ զերծ մնալ ԶԼՄ-ների՝ որպես գործիք օգտագործման միջոցով դատավորների նկատմամբ ազդեցություն թողնելու գործընթացներից, քանի որ դա ստեղծում է մթնոլորտ պօատժման գործընթացի՝ չենթարկվող դատավորների և վախի մթնոլորտի ձևավորում՝ դատական իշխանությունում»,- ԲԴԽ-ում ԵԴՄ ընդհանուր ժողովի դիտարկումից մեջբերեց Զարուհի Նախշքարյանը՝ նշելով, որ եթե դրան ենք գնում՝ շատ լավ:
Դատավորի ներկայացուցիչ Սիրանուշ Սահակյանն էլ նկատեց՝ դատավորներն ունեն բարոյական պարտք՝ բարձրացնելու որոշակի խնդիրներ:
Նրա խոսքով՝ վիճահարույց գնահատականը տրվել է դատական ակտի հրապարակումից հետո եւ այն որևէ կերպ չի վերազանցել ԲԴԽ հրապարակված որոշման սահմանները, այսինքն, անհամաձայնությունները եղել են անհամաչափության տեսանկյունից և վիճահարույցությունը մատնանշել է հենց համաչափության տեսանկյունից, գործ ունենք ավելի շատ փաստի արձանագրման, այլ ոչ թե՝ գնահատողական դատողության հետ։

Ինչպես արդեն հաղորդել ենք՝ ԱՆ-ն դատավորի նկատմամբ կարգապահական վարույթ է հարուցել հարցազրույցների ու ֆեյսբուքյան գրառումների կապակցությամբ։ ԲԴԽ-ի այսօրվա նիստում ՀՀ ԱՆ ներկայացուցիչ Արտյոմ Սուջյանը նախ հետաքրքրվեց, թե ինչու է դատավորն իր ֆեյսբուքյան գրառումը սահմանափակել, արդյո՞ք գրառումը կատարելուց հետո գիտակցել է իր գործողությունների ոչ իրավաչափ բնույթը, սակայն պարզվեց, որ գրառումը երբեւէ հասանելի չի եղել հանրության համար, իսկ ԱՆ ներկայացուցիչները դատավորի հետ ֆեյսբուքյան ընկեր չեն, ոչ էլ՝ ընկերոջ ընկեր են: Դատավոր Զարուհի Նախշքարյանը պարզաբանեց, որ մամուլի քարտուղարը հավանաբար իր ընկերների ընկերներից է, հետևաբար, նա կարող է մուտք գործել, իսկ նախարարությունն իրեն ընկեր չէ ոչ մի կերպ, հետևաբար, նախարարության ներկայացուցիչների համար գրառումը կարող է սահմանափակ լինել: Բացի այդ՝ դատավորն ընդգծեց, որ բացի Նախարարությունից ոչ ոք չի կարծում, որ ինքը վարքագծի որևէ խախտում է կատարել, հետևաբար, բացարձակապես նման գիտակցության չի եկել:

Առավել ուշագրավ էր նախարարության ներկայացուցիչ Արտյոմ Սուջյանի այն հարցը, թե, եթե գործի քննության ավարտից հետո դատավորի լիազորությունները չդադարեցվեն, նա շարունակի պաշտոնավարել՝ արդյո՞ք շարունակելու է իր գործելաոճը՝ տարբեր ֆեյսբուքյան գրառումներ կատարել, տարբեր հարցազրույցներ տալ, ինչին արձագանքեց նախագահող Նաիրա Հովսեփյանը՝ նշելով, որ արդեն ուզում են որոշել, թե ինչ կորոշի ԲԴԽ-ն, ապա՝ հանեց հարցը:

Հարցուպատասխանից հետո ԲԴԽ-ում հետազոտվեցին գործում առկա ապացույցները, մասնավորապես, դատավորի հարցազրույցները ԶԼՄ-ներին, ինչից հետո եզրափակիչ ելույթով հանդես եկավ ՀՀ ԱՆ ներկայացուցիչ Հայկ Սանոյանը՝ պնդելով, որ միջնորդությունը ենթակա է բավարարման:

Լսելով կողմերի դիրքորոշումը՝ ԲԴԽ-ն հեռացել է խորհրդակցական սենյակ՝ որոշում կայացնելու: Որոշումը կհրապարակվի փետրվարի 27-ին, ժամը՝ 11։30-ին։

Հեղինակ՝ Իզաբել Սահակյան

Աղբյուր` Փաստինֆո