Փաստ ինֆո

Պետությունից և պետական կառավարումից կիլոմետրերով հեռու, պետականությունը բիզնեսի առարկա դարձրած՝ կառավարության շենքում քննարկում են ծավալում իրավական ոլորտի պետական շենք-շինությունները քաղաքի կենտրոնից դուրս հանելով՝ գետտոյանման ինչ-որ արդարադատության թաղամաս կառուցելու մասին։

Պետք չէ հատուկ տրամաբանություն փնտրել այս ողորմելի նախագծի մեջ։ ՈՒղղակի մանկության ընկերոջը՝ ՆԳ նորանշանակ նախարարին քաղաքի կենտրոնից Դավիթաշենում գտնվող Արտակարգ իրավիճակների՝ արդեն նախկին նախարարության համալիր գործուղելու ընթացքում իջևանյան կլանի «պայծառ» ուղեղները շատ ու մեծ պարգևավճարների նոր հորիզոններ են հայտնաբերել։

Առանց այն էլ արդարադատության ոլորտը կոկորդին է կանգնած իշխանության, մեկումեջ տհաճ անակնկալներ է մատուցում, ինքնուրույնությունն իր շեշտելով, ճիշտ ժամանակն է՝ կենտրոնից հանելու, մանավանդ, արդեն առաջին քայլով ընկերոջն ու թիմակցին Նալբանդյան փողոցից այլ վարչական շրջան է ուղարկել, իսկ ինչու՞ մյուսներին ևս չուղարկել նույն կերպ։ Ասենք՝ արդարադատության նախարարությունը, դատախազությունը, ԲԴԽ-ն, ընդհուպ՝ կարող է հերթը հասնել նաև՝ ՍԴ-ին։

Մի օր ԲՈՒՀ-երը, հաջորդ օրը՝ ԳԱԱ ինստիտուտները, ՊԵԿ-ը, հիմա էլ՝ արդարադատության թաղամաս։ Ոչ ասֆալտին փռելով, պատերին ծեփելով, ոչ էլ , բնականաբար, հատուկ թաղամասերով չէ, որ արդարադատություն է հաստատվելու երկրում։

Պետության և պետականության կործանումը ներսից է միշտ լինում․ արդեն օրենքի և իրավունքի բնագիծը ներկայացնող պետական կառույցներն ու կառուցվածքներն են արտաքսվում։ Հայաստանի պետական շենքերի փոխարեն կլինեն օտար և բազմաստղ հյուրանոցներ, ռեստորաններ, բիզնես-կենտրոններ, կազինոներ և բազում այլ ծառայություններ․․․

Այսպես՝ Երևանը Բաթում դարձնելու իրենց երազանքն են բարձրաձայնում ոմանք՝ անունը դնելով՝ դատաիրավական համակարգի համար աշխատանքային պատշաճ, սոլիդ պայմանների ստեղծում։ Նույն կերպ նաև՝ բուհական թաղամաս են պարբերաբար ուզում ստեղծել, քանի որ, ասենք՝ ագրագային համալսարանին պլանտացիաներն են պակասում՝ միչուրինյան նոր սորտեր կյանքի կոչելու համար, իսկ կոնսերվատորիական կրթություն ստացողներին բաց տարածություն է պետք՝ ամբողջ կոկորդով կերգեն ու կնվագեն բարձր ու զիլ․․․

Ընդհանրապես, Ենոքավանն՝ իր բիզնեսներով կարելի է կենտրոն տեղափոխել, ինչ կա որ․․․

Կարևորը՝ մասնավոր բիզնեսն է, ոչ թե՝ պետությունն ու պետականությունը։ Իսկ վերջում, հերթը կհասնի նաև կառավարության շենքին․․․

Հ․Գ․

Թերևս, այս՝ Ջորջ Օրուելի գրչին արժանի խորհրդակցություն կոչվածը կարելի է դիտարկել նաև որպես կարևոր թեմաներից հասարակությանը շեղելու հերթական քայլը։ Այնպես որ, սադրանքի պետք չէ տրվել․․․

Աղբյուր` Փաստինֆո