Փաստ ինֆո

Վարչական դատարանը՝ դատավոր Մհեր Պետրոսյանի նախագահությամբ, մերժել է ՀՀ ոստիկանության հանցադիմումը՝ ընդդեմ Արցախյան երրորդ՝ 44-օրյա պատերազմում զոհված զինծառայող Դավիթի Ուզունյանի հորը՝ Բագրատ Ուզունյանի: Այս մասին «Փաստինֆո»-ն տեղեկանում է «Դատալեքս» դատական-տեղեկատվական համակարգից:

Հիշեցնենք, որ սեպտեմբերի 21-ին՝ ՀՀ Անկախության օրը՝ վաղ առավոտյան ոստիկանության ծառայողներն անհամաչափ բռնի ուժի գործադրմամբ «Եռաբլուր»-ից բերման են ենթարկել 37 քաղաքացու՝ զոհված զինծառայողների ծնողներին, որոնք ցանկանում էին թույլ չտալ Նիկոլ Փաշինյանին՝ մուտք գործել պանթեոն՝ նշելով, որ նա է իրենց որդիների մահվան մեղավորը։ Ոստիկանությունից հայտնել են, որ նրանք բերման են ենթարկվել՝ Վարչական իրավախախտումների վերաբերյալ օրենսգրքի 182-րդ հոդվածի հիմքով՝ ոստիկանների օրինական պահանջը չկատարելու համար, թեեւ տեսանյութերում պարզ երեւում է, որ ոստիկանները որեւէ պահանջ չեն ներկայացրել, նախ ուժի գործադրմամբ բերման են ենթարկել հայրերին, ապա նաեւ՝ մայրերին։ Ոստիկանների գործողությունների հետևանքով զոհված զինծառայողների մայրերից մի քանիսը ստացել են տարբեր աստիճանի մարմնական վնասվածքներ, որը հետագայում հաստատվել է նաև դատաբժշկական փորձաքննության եզրակացությամբ։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 441-րդ հոդվածի 2-րդ մասի 1-ին կետի հատկանիշներով, այն է՝ պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը, որը կատարվել է բռնություն գործադրելով։
Քրեական գործին զուգահեռ ոստիկանությունը հայցադիմումներ է ներկայացրել Վարչական դատարան՝ պահանջելով վարչական պատասխանատվության ենթարկել զոհված զինծառայողների ծնողներին։

Այս ընթացքում դատարանում ավարտվել է երկու ծնողի՝ Ուզունյանի և Գարիկ Գալեյանի դեմ ներկայացված հայցադիմումների քննությունը:

Երեկ Վարչական դատարանը՝ դատավոր Մհեր Պետրոսյանի նախագահությամբ, հրապարակել է Բագրատ Ուզունյանի դեմ ներկայացված հայցադիմումի վերաբերյալ որոշումը՝ մերժելով հայցը: Դատարանն արձանագրել է, որ չեն ներկայացվել բավարար ապացույցներ առ այն, որ «Եռաբլուր»-ում այդ օրն իրականացվել է հանրահավաք և որ որևէ օրինական պահանջ է ներկայացվել պատասխանողին՝ հավաքը դադարեցնելու մասին, ինչպես նաև այն, որ ոստիկանության կողմից կրկին անգամ նախազգուշացում է եղել՝ հավաքը դադարեցնելու պահանջով: Դատարանն արձանագրել է նաև, որ տվյալ դեպքում հայցվորը ոստիկանության կողմից ներկայացված պահանջը հայցադիմումով պայմանավորել է «հասարակական անվտանգության պահպանմամբ և հասարակական կարգի պահպանության անվտանգությունից ելնելով»։

Մինչդեռ հայցվորի կողմից, նախ, չի ներկայացվել որևէ ապացույց, որով կհիմնավորվեր, որ Բագրատ Ուզունյանը ենթադրյալ հավաքին մասնակցել/կազմակերպել/իրականացրել է, ինչով որևէ կերպ սպառնացել է «հասարակական անվտանգության պահպանմանը» կամ «հասարակակակն կարգի պահպանման անվտանգությանը»։ Ավելին, ապացույց չներկայացնելուց զատ հայցվորը, բավարարվելով հայցադիմումում ընդհանրական և վերացական ձևակերպումներ նշելով, չի մասնավորեցրել, թե Բագրատ Ուզունյանի կողմից թույլ տրված և հատկապես ո՛ր գործողություններն են վտանգել հասարակական կարգը արձանագրության ։

Նշենք, որ Եռաբլուրում նշված գործողություններն ամբողջությամբ տեսանկարահանվել են ԶԼՄ-ների կողմից եւ տեսանյութերից երեւում է, որ ոստիկանները որեւէ պահանջ չեն ներկայացրել ծնողներին, այլ ուղղակի բերման ենթարկել՝ նախ հայրերին, ապա՝ մայրերին։

Հեղինակ՝ Իզաբել Սահակյան

Աղբյուր` Փաստինֆո