Փաստ ինֆո

Սեյրան Օհանյանի, Գրիգորի Խաչատուրովի վերաբերյալ վարույթի շրջանակներում ենթադրյալ փողերի լվացմանն իբրև օժանդակելու հատկանիշներով այսօր մեղադրանք է առաջադրվել նաև Գրիգորի Խաչատուրովի ընկերոջը՝ Էդգար Արշակյանին: Նրա նկատմամբ որպես խափանման միջոց է կիրառվել բացակայելու արգելքը: Էդգար Արշակյանի պաշտպան Միհրան Պողոսյանը լրագրողների հետ զրույցում արձանագրեց, որ օժանդակությունը և արարքը նույն ձևաչափով են պատիժ կրում, ուստի, հասկանալի չէ, թե ինչու են Գրիգորի Խաչատուրովին ներկայացրել կալանքի:

«Եթե օրենքը նույն արարքի հետ կապված տարբեր անձանց վերաբերյալ տարբեր դրսևորումներ է ունենում, մենք կարծում ենք նաև, որ այստեղ խտրական վերաբերմունք կա Գրիգորի Խաչատուրովի հետ կապված: Այսինքն՝ խնդիրը ոչ թե ինչ որ ենթադրյալ գործարքն է, ենթադրյալ ինչ-որ քողարկումներ իրականացնելն է, որն այս գործով բացակայում է, այլ՝ Գրիգորի Խաչատուրովի անձն է, որ ամեն կերպ ցանկանում են կալանքի հասնել, ինչը համոզված եմ, որ դատարանը թույլ չի տա, քանի որ իրավական առումով փողերի լվացման հոդվածն այս պարագայում ներառելն այս հանցակազմի մեջ, մեղադրանք ներկայացնելն աբսուրդ չէ, աբսուրդից այլ բնորոշումներ ունի, որը եթերային չէ»,- նշեց Միհրան Պողոսյանը:

Հիշեցնենք, որ Գրիգորի Խաչատուրովը ձերբակալվել է՝ ԱԱԾ-ում քննվող՝ Սեյրան Օհանյանին առնչվող քրեական վարույթի շրջանակներում: Գրիգորի Խաչատուրովի նկատմամբ քրեական հետապնդում է հարուցվել՝ պաշտոնեական դիրքի օգտագործմամբ հանցավոր ճանապարհով ձեռք բերված առանձնապես խոշոր չափերով անշարժ գույքն օրինականացնելու (փողերի լվացում) հատկանիշներով: Նրան մեղադրանք է ներկայացվել, քննիչը միջնորդություն է ներկայացրել դատարան՝ նրա նկատմամբ կալանավորումը որպես խափանման միջոց ընտրելու մասին:

Նկատենք, որ ըստ դատախազության, գործարքի առարկան չգործող զորամասի տարածքն է, որը պաշտպանության նախարար Սեյրան Օհանյանի պաշտոնավարման տարիներին, իբր, վաճառվել է Գրիգորի Խաչատուրովին, ինչը ձեւակերպվել է երրորդ անձի անվամբ։

Պողոսյանն ընդգծեց, որ նշված տարածքը 90-ականների կեսերից երբեք որպես զորամաս չի ծառայել, ՀՀ-ում ՊՆ հատկացված բոլոր տարածքները, բոլոր ենթակառուցվածքները հատուկ նշանակության հողամասերի տակ են ընդգրկված եղել, դրանից հետո դրանք իրավական հիմք ստացել են 2005թ, ինչից հետո որպես զորամաս երբեք չեն եղել: Նրա խոսքով՝ տարածքների օտարելիության պայմաններ նախատեսում է օրենքը, առկա են մի շարք հիմնավորումներ, թե որ պայմաններում տվյալ տարածքները կարող են օտարվել:

Բացի այդ, պաշտպանն ընդգծեց, որ տվյալ գույքի համար 18 միլիոն դրամ գրավ վերցնելը իրականությանը չհամապատասխանող տեղեկություն է:

«Գլխավոր դատախազն ԱԺ-ում զբաղված էր մանիպուլյացիաներով: Տվյալ գույքի համար երբևիցե 18 միլիոն դրամ գումար չի վերցվել. 2016 թվականի օգոստոսի 12-ին Գրիգորի Խաչատուրովը ձեռք է բերել բնակարան Վանաձորում, այդ բնակարանը ձեռք բերելու ժամանակ կնքվել է առքուվաճառքի պայմանագիր, որի պայմաններում միայն այդ բնակարանը գրավադրելու համար Խաչատուրովին տրամադրվել է 18 միլիոն 484 հազար դրամի վարկային գիծ, հետո բանկը Խաչատուրովին խնդրել է ներկայացնել լրացուցիչ գրավ, Խաչատուրովն իր ընկերոջը՝ Էդգար Արշակյանին խնդրել է լրացուցիչ գրավով օգնել ու, քանի որ այդ տարածքն այդ պահին Արշակյանը օգտագործելիս չի եղել, տարածքը որպես լրացուցիչ գրավ գրավադրվել է բանկում, սակայն գումարային առումով վարկային գիծը ոչ մի դրամով չի ավելացել, այսինքն՝ կոնկրետ այդ տարածքի համար ոչ մի դրամ վարկ չի ստացվել»,- մանրամասնեց Միհրան Պողոսյանը:

Աղբյուր` Փաստինֆո