Փաստ ինֆո

Միայն խելագարը կարող է դեմ լինել խաղաղությանը և խաղաղության պայմանագրի կնքմանը։ Նման հայտարարությամբ է հանդես եկել «Հայրենիք» կուսակցության նախագահ Արթուր Վանեցյանը՝ միաժամանակ նշելով, որ շատ կարեւոր է հասկանալ, թե ինչ գին պետք է վճարել այդ խաղաղության պայմանագրի դիմաց։

«Արդյոք այդ խաղաղության պայմանագրի ստորագրումից հետո լինելու է Հայաստան, լինելու է Արցախ և կարողանալու են հայրերն ապրել իրենց հայրենիքում՝ անկախ, ինքնիշխան և անվտանգ»,- նշել է Վանեցյանը։

Ըստ նրա, շատ կարևոր է ֆիքսել մի փաստ, այն է՝ Հայաստանն ասում է, որ արդեն մշակել է խաղաղության պայմանագրի իր տարբերակը և փոխանցել Ադրբեջանին։ «Հիմա հարց եմ տալիս՝ ինչ է գրված այդ պայմանագրում։ Որևէ մեկս դրա մասին չգիտենք, բայց մենք փաստացի ականատես ենք եղել, որ այսօրվա իշխանություն կոչվածը մշտապես հակահայկական թղթեր են ստորագրել, մշտապես հակահայկական քայլեր են արել, մշտապես անգամ չեն պահպանել փաստաթղթերում գրվածը, այլ ասել են՝ նաև ունենք բանավոր պայմանավորվածություններ, որի արդյունքում հանձնել են տարածքներ»,- հայտարարել է Արթուր Վանեցյանը ու նշել, որ ոչ թե դեմ է խաղաղության պայմանագրին, այլ հակառակը՝ կողմ, բայց խաղաղության պայմանագրի կետերը պետք է իմանալ, դրանք պետք է հանրայնացնեն, թող հանրայնացնեն և դրա մասին հետո խոսենք։

Արթուր Վանեցյանը վստահեցրել է, որ ինքն ու իր գործընկերները, հայ ժողովրդի ճնշող մեծամասնությունը թույլ չեն տա ստորագրել մի փաստաթուղթ, որը կվտանգի Հայաստանի եւ Լեռնային Ղարաբաղի ապագան։

Նրա խոսքով, ղարաբաղյան խնդիրը Հայաստանում փորձում են հետին պլան մղել, սակայն հայերի ճնշող մեծամասնությունը չի մոռացել եւ մեծ նշանակություն է տալիս դրան։

«Երկար տարիներ աշխատելով ազգային անվտանգության մարմիններում՝ ես միշտ ասել եմ, որ ինձ համար առաջնահերթ է Հայաստանի եւ Լեռնային Ղարաբաղի անվտանգությունը, Ղարաբաղի, որը ավելի քան երկու ամիս շրջափակման մեջ է»,- հավելեց նա։
Վանեցյանը վստահություն հայտնեց, որ Լեռնային Ղարաբաղը բախվել է այնպիսի վտանգի, որը երբեք չի եղել․ ոչ Ղարաբաղյան շարժման սկզբում, ոչ էլ վերջին 30 տարիների ընթացքում նման իրավիճակ չի եղել։

Նա նշեց, որ այսօր վտանգի տակ է ոչ միայն Լեռնային Ղարաբաղը, այլեւ Հայաստանը։ «1991 թվականի ձմռանը Լեռնային Ղարաբաղը նույնպես շրջափակման մեջ էր, եւ թվում էր, թե ամեն ինչ կորած է, բայց հայերը ընդհանուր ջանքերով հասան հաղթանակի։

Դա տեղի ունեցավ ինքնավստահության պատճառով։ Այսօր այդ վստահությունը պակասում է, վստահություն չկա նաեւ նրանց հանդեպ, ովքեր որոշում են կայացնում։ Այսօր վիճակն ավելի վատ է, քան 90-ականներին, քանի որ չկա միասնականություն»,- ընդգծեց ԱԱԾ նախկին տնօրենը։

Նա հիմնական մեղավոր անվանեց Հայաստանի իշխանություններին՝ հիշեցնելով, որ նման իրավիճակի է հանգեցրել Նիկոլ Փաշինյանի հետեւողական քաղաքականությունը։ «Այսպես կոչված խաղաղության գինը վճարելու են ոչ թե իշխանությունները, այլ ողջ հայ ժողովուրդը։ Ուստի անթույլատրելի է ժողովրդի մեջքի հետեւում որեւէ փաստաթուղթ ստորագրել»,- եզրափակեց Արթուր Վանեցյանը։

«Մենք իշխանություն չենք, մենք զինված խումբ չենք, մենք ահաբեկչական խումբ չենք, որ փորձենք այդ կերպ կանխել, այսինքն՝ պետք է խոսենք, հանրությանը ներկայացնենք այն վտանգները, որոնք կարող են վրա հասնել և փորձենք բոլորս կանխել այդ հավանական հակահայկական փաստաթղթի ստորագրումը»,- ընդգծել է ԱԱԾ նախկին ղեկավարը։

Աղբյուր` Փաստինֆո