Փաստ ինֆո

ՊՆ նախկին շենքի մոտ իրավիճակը շարունակում է լարված մնալ։ ՊՆ նախկին շենքում տարիներ շարունակ ապրող բնակիչները, որոնց երեկ հանել են իրենց տներից, գիշերել են շենքի մոտ։ Լրագրողների հետ զրույցում բնակիչներից մեկը, որը վեց ամիս է, ինչ բնակություն է հաստատել ՊՆ նախկին շենքում, պատմում է, որ ինքը աշխարհազորային է, փոտրվարի 27-ին պետք է գնար սահման, ունի չորս երեխա, վարձով է ապրում 2011թ։

«Եթե դու գիտես, որ շենքը վթարային է, դու քո ընտանիքը կբերե՞ս, եթե պայման ունենաս: Չես բերի: Գիշերը երեխաների հետ անցկացրել ենք այստեղ, դրսում: Հիմա մի քիչ տաքացել է, գնացել են քնելու: 14 օր պոստ եմ պահել, 14 հազար դրամ փող եմ ստացել, 120 հազար դրամ վարձ որտեղի՞ց տամ: Ես երեկ երեխայիս տարել եմ դպրոց, հետ եմ եկել, չեմ կարողացել տուն մտնեմ, բռնել են, տարել են բաժին: Բաժնից եկել եմ, գիշերը էստեղ եմ մնացել: Առավոտյան բարձրացել եմ իմ տուն, տեսել եմ դուռը ջարդած, գործիքներս չկա: Նվեր ունեի պատից կախած՝ չկա»,-ասաց նա՝ հավելելով, որ երբ բնակիչ կանանցից մեկը եկել է իր տուն, տեսել է, որ ոստիկանները իր տեղերի վրա պառկած են. «Ոստիկանը մտել է տուն, տան հարսն ասել է՝ դուրս արի, հագնվեմ, պատասխանել է՝ իմ ներկայությամբ հագնվի»։

Շենքի կին բնակիչներից մեկը լրագրողների հետ զրույցում պատմեց, որ գիշերը անվադող են այրել՝ տաքանալու համար, վեց ամսականից մինչև 15 տարեկան երեխեքը առանց քնելու՝ բորդյուրների վրա են եղել։

«Այս վիճակից արդեն մենք էլ ենք հոգնել։ Չեմ հասկանում՝ իրենց դուր է գալիս ամբողջ երկրով մեկ խայտառակ լինելը։ Այն թվերին, որ շենքը մնացել էր անտերության մատնված, ինչու չէին գալիս, տիրություն անում»,-նշեց նա։

Աղբյուր` Փաստինֆո