Փաստ ինֆո

Գեղարքունիքի մարզի Ազատ գյուղի տարածքում տեղակայված զորամասի ինժեներասակրավորային վաշտի կացարանում 15 զինծառայողի մահվան պատճառ դարձած հրդեհի գործով մեղադրյալ, կապիտան Եղիշե Հակոբյանը ցուցմունք է տվել ու պատմել հրդեհի բռնկման ամբողջ պատմությունը։ Այս մասին «Փաստինֆո»-ի հետ զրույցում հայտնեց փաստաբան Հովսեփ Սարգսյանը։

Կապիտանն, ըստ էության, ընդունել է, որ հրդեհը բռնկվել է, երբ փորձել է միացնել վառարանը, սակայն նաեւ նշել, որ այն անմիջապես չի տարածվել, ավելին՝ բղավել է, որ զինվորները դուրս գան, ու թերեւս արդեն նախաքննական մարմինը պետք է փորձի պարզել, թե ինչու զինվորները չեն արձագանքել կապիտանին։

Քննության շրջանակներում մահացած զինծառայողների նկատմամբ նշանակվել է թմրաբանական փորձաքննություն, սակայն փորձաքննության եզրակացությունը դեռևս չի ստացվել։ Փոխարենը արդեն հաստատվել է, որ կապիտանը թմրամիջոցի ազդեցության տակ չի եղել. Նրա նկատմամբ նշանակված փորձաքննության եզրակացությամբ նրա արյան մեջ թմրանյութ չի հայտնաբերվել։

«Այրվածքաբանության ազգային կենտրոն»-ում գտնվող կապիտան Եղիշե Հակոբյանը, որը վիրահատվել էր նախօրեին, երեկ չորս ժամ ցուցմունք է տվել և մանրամասներ հայտնել կացարանում բռնկված հրդեհի դեպքի մասին։ Մասնավորապես, Հակոբյանը պատմել է, որ կեսգիշերն անց վառարանն անջատված է եղել, ցանկացել է միացնել, բայց փայտը չի վառվել, քանի որ թաց է եղել, կպչան չի եղել, ինչի պատճառով դուրս է եկել և վերցրել տնակից քիչ հեռու գտնվող՝ տեխնիկան գործարկելու համար նախատեսվող ավտոբենզինի պլաստմասե տարաներից մեկը, որը կիսատ է եղել, այնուհետև, կափարիչի մասից մեկ սուրճի գավաթի չափով լցրել փայտի վրա։

«Ասում է՝ «կրակը չկպավ, մտածեցի՝ սպասենք կպնի, բայց փայտը չի վառվել։ Առաջ եկա, բենզինով տարան ձեռքիս էր, աջ կողմով առաջ եկա դեպի վառարանը, կռացա կլոր մասի վրա , տեսնեմ ինչի չի վառվել, այդ ժամանակ բոցը տվեց դեմքիս, ես վառվեցի»,- ասաց փաստաբանը՝ փոխանցելով Եղիշե Հակոբյանի խոսքերը։ Վեսրջինս։ նաեւ պատմել է, որ տարայի՝ ծորացած հատվածից բռնկվել է նաև տարան, Հակոբյանը փորձել է հանգցնել կրակը, սակայն արդեն այրվածքներ էր ստացել, ցավից ուժեղ գոռացել է, այդ ժամանակ էլ նկատել է, որ կրակն անցել էր նաև տարայի ներս, որպեսզի այն չպայթի, Հակոբյանը փորձել է այն դուրս նետել, բայց այդ ընթացքում, ամենայն հավանականությամբ, մի փոքր բենզին է կպել նաև մուտքի դռանը, ինչի հետևանքով այն նույնպես հրդեհվել է։ Եղիշե Հակոբյանը զինծառայող Լյովայի հետ փորձել են հանգցնել կրակը, ընդ որում՝ բուշլատներով, քանի որ այլ բան չի եղել հանգցնելու, սակայն կրակը հանգցնել չի հաջողվել։ Հակոբյանը պատմել է, որ այդ ընթացքում Լյովան մտել է ննջարան, ինքն ու Լյովան բղավել են, որ ննջասենյակում գտնվող զինծառայողները դուրս գան, եւ տարակուսած է, թե ինչու զինծառայողները չեն կարողացել դուրս գալ, առավել ևս, որ ննջասենյակում գտնվող երկու զինծառայող դուրս են եկել։ Մինչև հրդեհը կհասներ ննջարանին՝ մոտ 15-20 րոպե ժամանակ է եղել։

«Իր համար շատ մեծ հարց էր, թե ինչու նրանք դուրս չեկան, ինչն էր պատճառը։ 15-20 րոպե առնվազն անընդմեջ գոռացել են, որ դուրս գան»,- նշեց փաստաբանը։

Իսկ թե արդյո՛ք զինծառայողներն արդեն քնած էին, փաստաբանը հայտնեց, որ, ըստ Հակոբյանի, զինծառայողները ժամը 22.30-ի սահմաններում պառկել են, դրանից հետո անընդհատ ելումուտ են արել, այդ ընթացքում ինքն էլ է դուրս եկել, վերադարձել. «Պառկել էին, բայց ելումուտ էին անում»։

Հրդեհը մարել Հակոբյանին օգնել է միայն զինծառայող Լյովան։ Ինչ վերաբերում է զինծառայողների հետ փոխհարաբերությանը, փաստաբանը վստահեցրեց, որ կապիտանը նրանց հետ խնդիր չի ունեցել։ Զինվորական ծառայությունը, հերթապահությունը, սակայն, պատշաճ կանոնակարգված չի եղել։ Եղիշե Հակոբյանի հարցաքննությունը դեռևս չի ավարտվել, քանի որ մեղադրյալին չորս ժամից ավելի անընդմեջ հարցաքննել չի կարելի, բացի այդ, նա նախօրեին ենթարկվել էր վիրահատության և ինքնազգացությունն այդքան էլ լավ չէր։

Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։ Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից երկուսը կալանքի տակ են։ 4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու գտնվում է հիվանդանոցում։ Տուժող կողմը հայտարարել է, որ չի վստահում պաշտոնական վարկածին ու սկսել են սեփական հետաքննությունն իրականացնել։

Հեղինակ՝ Իզաբել Սահակյան

Աղբյուր` Փաստինֆո