Փաստ ինֆո

Կառավարության հերթական նիստում խաղաղության պայմանագրի վերաբերյալ ՀՀ վարչապետ Նիկոլ Փաշինյանի ասածները որևէ կերպ մեկնաբանելու համար նախ անհրաժեշտ է հասկանալ՝ խաղաղության պայմանագրում արված երկկողմ առաջարկությունները որտեղ և ում ձեռամբ են հաստատվում։ Այս մասին «Փաստինֆո»-ի հետ զրույցում ասաց «Ազգային անվտանգություն» կուսակցության նախագահ Գառնիկ Իսագուլյանը։

Նա կասկածներ ունի, որ խաղաղության պայմանագրի փոփոխություններն ու առաջարկները ոչ թե Հայաստանում և Բաքվում են վավերացնում, այլ ասենք՝ Լոնդոնում, Փարիզում Պրահայում, Վաշինգտոնում, Ադրբեջանի դեպքում՝ Անկարայում, Պակիստանում, Իսրայելում։
«Չգիտեմ՝ որոշումը որտե՞ղ է կայացվում և ո՞վ է կայացնում։ Արդյո՞ք երկու երկրների ղեկավարները, որոնք աշխատում են այդ փաստաթղթի վրա իրենք են որոշում կայացնողը, թե իրենց համար դրանք կայացվում են ու ուղարկում են այդ որոշումներն՝ ի կատարումն, այնքան պարզ չէ.... հիմա ի՞նչ՝ կարծում եք՝ շատ հարցեր Արմեն Գրիգորյա՞նն է որոշում կայացնում, կամ Արարատ Միրզոյա՞նը»,- նշեց Իսագուլյանը։

Նրա կարծիքով՝ խնդիրը պետք է դիտարկել ամբողջության մեջ, այդ թվում՝ ԵՄ դիտորդների տարածաշրջանային առաքելության համատեքստում։ Իսագուլյանը մտավախություն ունի, որ ԵՄ-ն երկու տարի անց, երբ ռուսական խաղաղապահ առաքելության 5-ամյա ժամկետը լրանա, ռուսական բազաների հարցը Հայաստանում կդառնա խնդրո առարկա։

«Շատ խնդիրներ կան, օրինակ, ինչո՞ւ են ԵՄ դիտորդները տարածաշրջան եկան 2 ամսով, հետո միանգամից 2 տարով, ի՞նչ նպատակ կա, վերջը խաղաղապահներին այստեղից պետք է հանեն, թե ոչ։ 2 ուղղություններով էլ՝ և՛ Բաքվի ուղղությամբ, և Երևանի ուղղությամբ Արևմուտքն այդ աշխատանքը տանո՞ւմ է, թե՞ ոչ, կոորդինացնո՞ւմ է, թե՞ ոչ։ Միայն համակցության մեջ կարելի է այս ամենը հասկանալ»,- ընդգծում է մեր զրուցակիցը։

Նրա խոսքով՝ Հայաստանն անուղղակի կերպով կարող է վերածվել կոնֆլիկտային գոտու, հակառակ դեպքում մեր երկիրը որպես սուբյեկտ առաջիկա հարյուրամյակում Արևմուտքի համար կարևոր դերակատար չի կարող լինել։ Մյուս կողմից՝ Հայաստանին 4 կողմից սպառնում է թուրքական շրջափակումը։ Արևմուտքի ու Թուրքիայի նպատակն է թուրքական աշխարհ ստեղծել, որը կպատերազմի Ռուսաստանի, Չինաստանի ու Պարսկաստանի հետ, ու ամենևին էլ պատահական չէ, որ այդքան խոսվում է Սյունիքի մասին։

«Հայաստանը Իրանին է շատ պետք, դրա համար էլ Իրանն ասում է՝ թույլ չի տա ոչ մի փոփոխություն, Ռուսաստանին է պետք, որը վերջին պահին մտավ, գոնե Ղարաբաղի վերջին կտորը պահեց, Չինաստանին է պետք, այդ նույն թուրքական խնդիրը Չինաստանն ունի, Հնդկաստանին է պետք, որովհետև Պակիստան-Հնդկաստան լուրջ հակամարտություն կա։ Խնդիրներ կան, որ պետք է կարողանանք նստել այդ բոլորը ընդհանրական քննարկել, բայց չի ստացվում համախմբվել»,- նկատեց Իսագուլյանը։

Համախմբվել չի հաջողվում, որովհետև Հայաստանը (այս դեպքում իշխանությունը), իրեն չի կարողանում դրսևորել որպես միավոր, որը հստակ գիտի՝ ով է իր դաշնակիցը, ում շահերի հետ է իր շահերն համընկնում։ Այսպես շարունակվելու դեպքում, ըստ Իսագուլյանի, Հայաստանը որպես պետություն վերանալու է, իսկ այդ ամենի ֆոնին խաղաղության պայմանագրերն ու մյուս բոլոր խոսակցությունները երկրորդական են դառնում։ Եթե հայ ժողովուրդը ուզում է պետություն ունենալ, պետք է Ղարաբաղյան շարժման օրինակով հապճեպ ու սեղմ ժամկետներում համախմբվի ու առաջնահերթ փոխի ՀՀ ներքաղաքական իրավիճակը։

Հիշեցնենք, որ ՀՀ կառավարության այսօրվա՝ փետրվարի 16-ի նիստում, ՀՀ վարչապետ Նիկոլ Փաշինյանը հայտարարել է, որ Հայաստանը երեկ ավարտել է Ադրբեջանի հետ խաղաղության և հարաբերությունների հաստատման պայմանագրի նախագծի հերթական փուլի աշխատանքները, և մեր առաջարկները փոխանցել ադրբեջանական կողմին։

Աղբյուր` Փաստինֆո