Փաստ ինֆո

Վարչական դատարանը՝ դատավոր Ռոբերտ Մաքեյանի նախագահությամբ, հեռացել է խորհրդակցական սենյակ՝ Արցախյան երրորդ՝ 44-օրյա պատերազմում զոհված զինծառայող Մխիթար Գալեյանի հոր՝ Գարիկ Գալեյանի դեմ ոստիկանության հայցադիմումի վերաբերյալ որոշում կայացնելու։

Հիշեցնենք, որ սեպտեմբերի 21-ին՝ ՀՀ Անկախության օրը՝ վաղ առավոտյան ոստիկանության ծառայողներն անհամաչափ բռնի ուժի գործադրմամբ «Եռաբլուր»-ից բերման են ենթարկել 37 քաղաքացու՝ զոհված զինծառայողների ծնողներին, որոնք ցանկանում էին թույլ չտալ Նիկոլ Փաշինյանին՝ մուտք գործել պանթեոն՝ նշելով, որ նա է իրենց որդիների մահվան մեղավորը։ Ոստիկանությունից հայտնել են, որ նրանք բերման են ենթարկվել՝ Վարչական իրավախախտումների վերաբերյալ օրենսգրքի 182-րդ հոդվածի հիմքով՝ ոստիկանների օրինական պահանջը չկատարելու համար, թեեւ տեսանյութերում պարզ երեւում է, որ ոստիկանները որեւէ պահանջ չեն ներկայացրել, նախ ուժի գործադրմամբ բերման են ենթարկել հայրերին, ապա նաեւ՝ մայրերին։ Ոստիկանների գործողությունների հետևանքով զոհված զինծառայողների մայրերից մի քանիսը ստացել են տարբեր աստիճանի մարմնական վնասվածքներ, որը հետագայում հաստատվել է նաև դատաբժշկական փորձաքննության եզրակացությամբ։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 441-րդ հոդվածի 2-րդ մասի 1-ին կետի հատկանիշներով, այն է՝ պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը, որը կատարվել է բռնություն գործադրելով։
Քրեական գործին զուգահեռ ոստիկանությունը հայցադիմումներ է ներկայացրել Վարչական դատարան՝ պահանջելով վարչական պատասխանատվության ենթարկել զոհված զինծառայողների ծնողներին։

«Փաստինֆո»-ի թղթակցի հաղորդմամբ՝ Վարչական դատարանում այսօր ավարտվել է Ոստիկանությունն ընդդեմ Գարիկ Գալեյանի ներկայացված հայցադիմումի քննությունը։ Դատարանում Գալեյանի ներկայացուցիչ Ներսես Հարությունյանը հայտնեց, որ Գարիկ Գալեյանը, ինչպես նաև՝ 44-օրյա պատերազմում զոհված զինծառայողների մյուս ծնողների հետ գտնվել է «Եռաբլուր» զինվորական պանթեոնում, գիշերել մինչև սեպտեմբերի 21-ը։ Ծնողները, ըստ փաստաբանի, նպատակ են ունեցել իրենց որդիների տոնը նշելու այնտեղ։

«Առավոտյան ժամը 05.30-06.00-ի սահմաններում եկել են ոստիկանները, լկտի, բռնի ուժ կիրառելով, անմարդկային, արժանապատվությունը նսեմացնող հանգամանքներով ինչպես Գալեյանին, այնպես էլ՝ մյուս ծնողներին տեղափոխել են ոստիկանության բաժին»,- նշեց Հարությունյանը՝ հավելելով, որ ոստիկանության կողմից որևէ օրինական պահանջ չի ներկայացվել, որևէ զգուշացում, ժամկետի տրամադրում չի եղել, ավելին, ծնողներն այնտեղ հանրահավաք չեն իրականացրել, ծնողները գտնվելիս են եղել իրենց որդիների շիրիմներին, ապօրինի մուտք չեն գործել չթույլատրելի տարածք և այլն։ Փաստաբանը նաև տեղեկացրեց, որ ոստիկանների լկտի պահվածքի, բիրտ ուժի առնչությամբ քրեական գործ կա հարուցված, որով Գալեյանը տուժող է։

Դատարանը հեռացել է խորհրդակցական սենյակ՝ որոշում կայացնելու։ Դատական ակտը կհրապարակվի մարտի 7-ին։

Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո