Փաստ ինֆո

2022թ․ սեպտեմբերին ՀՀ նկատմամբ Ադրբեջանի իրականացրած ռազմական ագրեսիայից հետո Գեղարքունիքի մարզի Արեգունի գյուղի բնակիչների մտահոգությունները կտրուկ ավելացել են։ Գյուղացիների զգալի մասը, գաղթած լինելով Բաքվից ու Սումգայիթից, շատ լավ ճանաչելով թշնամուն՝ վախից վաճառել են եկամտի միակ աղբյուր հանդիսացող անասունները։

«Որ ադրբեջանցիները հարձակվեցին, մարդիկ խուճապի մեջ ընկան, շատերն իրենց անասունները վաճառեցին, որ հանկարծ թշնամին չհարձակվի ու իրենց ունեցածն էլ չտանի։ Գյուղում էլ միայն հող կարող ես մշակել կամ էլ անասուն պահել։ Ուրիշ աշխատանք չկա։ Անգամ մարդիկ կան, որ չեն կարողանում իրենց երեխայի դասագրքերի վարձավճարը տալ»,-«Փաստինֆո»ի հետ զրույցում ասում է Արեգունիի նախկին վարչական ղեկավար Սոս Հովհաննիսյանը և ցավով նկատում, որ այդքանով հանդերձ՝ ավելի քան 380 բնակիչ ունեցող գյուղին, որն ուղիղ գծով ադրբեջանական դիրքերից ընդամենը 4-5 կմ է հեռու, սահմանամերձ գյուղի կարգավիճակ չեն տալիս։

Հովհաննիսյանը շեշտում է՝ սեպտեմբերյան ռազմական ագրեսիայից հետո ադրբեջանական դիրքերից հեռավորությունը տեղ-տեղ անգամ 1 կմ էլ չկա՝ 500-600 մետր է։

«Թշնամու հետ որևէ հարաբերություն հիմա հնարավոր չի պատկերացնել։ Գուցե 150-200 տարի անց ինչ-որ եզրեր հնարավոր լինի գտնել՝ այն էլ այն դեպքում, եթե պատմության կեղծարարները վերացած լինեն։ Լավ հիշում եմ՝ 1972թ․ հրատարակության Ադրբեջանի պատմության 7-8-րդ դասարանների դասագրքերում գրված էր, որ Արցախը, Նախիջևանը հայկական են եղել և խորհրդային կարգերի հաստատումից հետո են տրվել Ադրբեջանին։ Իսկ ալիևյան կլանը եկավ ու ամբողջությամբ կեղծեց պատմությունը։ Ալիևը հոխորտում է, թե Զանգեզուրը, Սևանը մերն են, սրանք էլ (նկատի ունի ՀՀ իշխանություններին,-խմբ․) էշի ականջում քնածի պես՝ ինչ ասում է, ասում են՝ հա։ Ես չեմ հասկանում, թե ինչ է մտածում երկրի ղեկավարությունը։ Ինչպե՞ս կարելի է անձեռնխելիությունից զրկել Արցախն ազատագրած ազգային հերոսին կամ ինչի՞ համար են պարգևավճար ստանում, ի՞նչ են արել, որ հիմա էլ պարգևավճար ստանան»-վրդովված նշում է Հովհաննիսյանը։

Արեգունիի նախկին վարչական ղեկավարը նկատում է՝ իշխանության ներկայացուցիչներին տրվող պարգևավճարներով կարելի է գյուղեր ծաղկեցնել, բարելավել սահման պահող բնակիչների կենսական պայմանները՝ դրանով թույլ չտալով, որ դատարկվեն սահմանամերձ գյուղերը։

«Գյուղում ոչ խմելու ջուր կա նորմալ, ոչ էլ ոռոգման։ Ահավոր վիճակ է։ Մի՞թե չի կարելի այդ պարգևավճարների գումարներն ուղղել գյուղեր՝ լուծելու առկա բազմաշերտ խնդիրները։ Հողերի կադաստրային գներն էլ ոչ մի աղերս չունեն իրականության հետ։ Հողին տվել են 2-րդ կարգ, բայց իրականում 5-6-րդ կարգի են, բերքատվությունն ահավոր ցածր է»,-ասում է Հովհաննիսյանն ու հավելում՝ կոռուպցիայի դեմ պայքարելուց խոսող ներկա իշխանություններն անձամբ են թաթախված կոռուպցիայի մեջ։

Վերադառնալով պարգևավճարների թեմային՝ Հովհաննիսյանը շեշտում է՝ սրան- նրան պարգևավճար տալու փոխարեն՝ այդ գումարներն առաջնահերթ ուղղել է պետք սահմանի ամրացմանը։

«Այդ գումարներով կարող են 150-200 կմ երկարությամբ դիրքեր կահավորել, բայց չեն անում»,-եզրափակում է Արեգունիի նախկին վարչական ղեկավարը։

Աղբյուր` Փաստինֆո