Փաստ ինֆո

Գեղարքունիքի մարզի Ազատ գյուղի զորամասում տեղակայված ինժեներասակրավորական վաշտի կացարանում 15 զինծառայողի մահվան ելքով հրդեհի գործով մեղադրյալ կապիտան Եղիշե Հակոբյանն այսօր վիրահատվել է, նրա ինքնազգացողությունը լավ է, տեղափոխվել է հիվանդասենյակ։ Այս մասին «Փաստինֆո»-ի հետ զրույցում ասաց փաստաբան Հովսեփ Սարգսյանը։

Նրա փոխանցմամբ՝ Եղիշե Հակոբյանը ցանկություն է հայտնել ցուցմունք տալ եւ վաղը նախատեսված է հարցաքննությունը։ Եթե Եղիշե Հակոբյանի վիճակը չվատթարանա, իսկ քննիչը՝ գա հարցաքննության, ապա կապիտանը վաղն արդեն ցուցմունք կտա։

«Եթե Եղիշեի ցուցմունքը կարևոր նշանակություն ունի, նա բոլոր դետալների վերաբերյալ ցուցմունք է տալու, թեև, օգտվելով իր դատավարական իրավունքներից, կարող էր և չտալ, բայց կտա զուտ այն առումով, որ որևէ մեկի մոտ տարակարծություն և թերհավատություն չլինի, ինքը պատրաստակամ է պատասխանելու բոլոր հարցերին»,- ասաց փաստաբանը։

Անդրադառնալով տուժողների իրավահաջորդների կասկածներին, որ տղաները նախապես արդեն սպանված են եղել, Եղիշե Հակոբյանի պաշտպանը նշեց, որ միայն դիակների դատաբժշկական փորձաքննության եզրակացությամբ կարող է քիչ, թե շատ լույս սփռվել։

«Մարդիկ, բնականաբար, շահագրգիռ են, որ բացահայտվի դեպքը։ Որպես մարդու, որպես իրավաբանի ինձ համար ևս զարմանալի է, որ 15 հոգի չեն կարողացել տանից դուրս գալ, մանավանդ, այնպես չէ, որ բազմահարկ շենք է եղել, իսկ բռնկված կրակն էլ այնքան արագ է տարածվել, որ հնարավոր չէր։ Ցանկացած պարագայում պետք է, որ կարողանային հեռանալ։ Խիստ կասկածների տեղիք է տալիս՝ թե՛ մահացածների քանակը, հատկապես, երբ ԱԻ վարչության պատասխանատու աշխատակիցը մեկ բան ասաց, դատախազը՝ այլ բան, անգամ հայտնեց, որ հարցաքննել են ԱԻ պաշտոնյային, նշել, որ իրականում զինծառայողները տարբեր վայրերում են հայտնաբերվել։ Բացի այդ, համացանցում ինչ-որ տեսագրություն է հայտնաբերվել, որտեղ հրդեհ է երևում, ձայներ են հնչում, պետք է ստուգել, թե արդյո՞ք դա հենց դեպքի վայրից է։ Պետք է քննություն իրականացվի»,- նշեց Հովսեփ Սարգսյանը։

Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։ Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից երկուսը կալանքի տակ են։

4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու գտնվում է հիվանդանոցում։

Տուժող կողմը հայտարարել է, որ չի վստահում պաշտոնական վարկածին ու սկսել են սեփական հետաքննությունն իրականացնել։

Հեղինակ՝ Իզաբել Սահակյան

Աղբյուր` Փաստինֆո