Փաստ ինֆո

Բոլոր այդ գործերը վաղեմության ժամկետներն անցած են և եթե մենք ստորագրեինք, ապա չէին լինի այդ միջնորդագրերը, բայց մենք հրաժարվել ենք ստորագրելուց, քանի որ գտնում ենք, որ մեղավոր չենք։ Այս մասին խորհրդարանական ճեպազրույցների ժամանակ ասաց Սեյրան Օհանյանը՝ անդրադառնալով ԱԺ-ի կողմից իր նկատմամբ քրեական հետապնդում հարուցելու համաձայնություն տալուն և այդ քննարկումներին չմասնակցելուն։

«Որևէ շահ որևէ հարցում մենք չենք ունեցել։ Որևէ շրջանակի հետ պայմանավորվածություններ չենք ունեցել»,- նշեց Օհանյանը՝ հավելելով, որ չեն մասնակցել քննարկմանը, որովհետև գիտեն, որ այս իշխանությունների օրոք անվտանգային խնդիրները գերակա չեն, այլ՝ իրականացվել է մեր հանրության ուշադրությունը շեղելու համար։ Բացի այդ, Օհանյանը նշեց, որ չեն մասնակցել քննարկմանը, քանի որ միևնույն է, մեծամասնությունն այն, ինչպես՝ մնացած բոլոր հարցերը դակելու է և իրենք պատասխանատու չեն այսօրվա իշխանությունների, ՔՊ-ական մեծամասնության առջև։

«Մեղադրանքն առաջադրվել է, գործերը գտնվում են դատաիրավական համակարգում և մեր անմեղությունն այնտեղ կապացուցենք և կներկայացնենք հանրությանը»,- ասաց Օհանյանը։

Նա ուշադրություն հրավիրեց այն հանգամանքին, որ հողատարածքը զորամաս չի եղել, զորամաս ասելով՝ իշխանությունը կրկին փորձում է շեղել հանրությանը, դրանք հին, շահագործումից դուրս գտնվող հողամասեր և ավերված շինություններ են։

«Բանակի ձևավորման սկզբնական ժամանակահատվածում ցանկացած շինություններ օգտագործվել են ժամանակավոր զորանոցների, կացարանների փոխարեն, բայց ԶՈՒ-երի զարգացմանը զուգահեռ ստեղծել ենք ավելի լավ շինություններ, մշտական տեղակայման վայրեր և այդ հողակտորները, քանդված շինությունները դուրս են մնացել։ Դրանք եղել են ավելորդ ծախսերի աղբյուր։ Նրանց պահպանման համար ավելի շատ ծախսեր էր իրականացվում, քան՝ դրանց հիմնական գներն էին»,- նշեց Օհանյանը։

Նրա խոսքով՝ մեղադրանքը չի ընդունում։

Աղբյուր` Փաստինֆո