Փաստ ինֆո

Այս օրերին որոշվում է՝ որտեղո՞վ կանցնեն աշխարհաքաղաքական նոր սահմանները` ոչ թե Ռուսաստան-Արևմուտք, այլ Արևելք-Արևմուտք։ Արյունով գծվող սահմանազատման գործընթացում թուրք-ադրբեջանական ոհմակը ջանք չի խնայում ՀՀ տարածքները զավթելու գնով սեփական ցամաքային սահման ձևավորելու համար։ Այն թուրք-ադրբեջանական տանդեմի 100-ամյա երազնանքն է։

«Թուրքիան 1923 թվականից առաջնորդվում է իր հիմնական կոնցեպտով, որը կոչվում է Կարմիր գիրք։ Կարելի է Ալիևին որակել որպես մարդասպան, մարդակեր, տեռորիստ, անգամ Էրդողանին, յուրաքանչյուրը հարիր են իրենց, բայց իրենց երբեք չի կարելի որակել հիմար, այդ մարդիկ հիմար չեն և ձևավորվող նոր աշխարհաքաղաքական սահմանների ներքո ձևավորում են պանօսմանական կամ պանթուրքական ծրագիրը»,- «Փաստինֆո»-ի տաղավարում նշեց ԲՀԿ քաղաքական խորհրդի անդամ, քաղաքական վերլուծաբան Արման Աբովյանը։

Պատահական չէ, որ Մեծ Թուրանի գաղափարը կյանքի կոչելու ճանապարհին իր ատամներն է ցույց տալիս Իրանը; Բարեկամ Իրանում շատ լավ են հասկանում, որ «Զանգեզուրի միջանցքը» բռնազավթելուց հետո Թուրքիան ու Իսրայելը Իրանի հյուսիսային հատվածում մոտ 500 կմ խորությամբ ներխուժելու են Իրանի տարածք։

Աբովյանն արձանագրում է նույնիսկ ավերիչ երկրաշարժը խոչընդոտ չհանդիսացավ, որ Թուրքիան այս օրերին ռմբակոծի Սիրիայի այն տարածքները, որոնք նույնպես երկրաշարժից տուժել են, բացի այդ՝ Թուրքիայում գեթ մեկ ռազմական զորավարժություն չի չեղարկվել։ Իսկ Հայաստանն այսօր հումանիտար օգնության երկրորդ խմբաքանակն է Թուրքիա ուղարկել։

«Չկա գեթ մեկ հայ, որը կուրախանա, որ փլատակներում երեխաներ են մահանում, բայց կներեք, Թուրքիայի վերաբերմունքը Հայաստանի նկատմամբ հուզական չէ, կապ չունի աղետների հետ։ Դա Թուրքիայի առանցքային կոնցեպտն է, պետականաշինության դոկտրինն է, ինչ ուզում եք արեք, այդ մարդիկ խնդիր չունեն ձեզ հետ խաղաղություն հաստատել։ Թուրքական պետական շահից է բխում չեզոքացնել հայկական գործոնը, որի արդյունքում իրենք կունենան ցամաքային սահման, մնացած բոլոր լոլոները, հեքիաթները կարող է մարդկանց դուրը գան, բայց իրենք դրանով մեզ կրկին զինաթափում են ներքուստ»,- ընդգծեց քաղաքական վերլուծաբանը։

Հարցազրույցն ամբաղջությամբ՝ տեսանյութում։

Աղբյուր` Փաստինֆո