Փաստ ինֆո

Վերջին տարիներին ֆինանսական և ոչ ֆինանսական շուկաներում աճել են անորոշությունները, ինչպես նաև արտարժույթի փոխարժեքի տատանողականությունն է մեծացել: Այս մասին ԱԺ նիստում նշեց պատգամավոր Գևորգ Պապոյանը՝ ներկայացնելով «Արժութային կարգավորման և արժութային վերահսկողության մասին» օրենքում փոփոխություններ կատարելու մասին նախագիծը, որով նախատեսվում է Հայաստանում արգելել արտարժույթով վարկավորումը։

Նրա խոսքով՝ արտարժույթով վարկավորումը էական ռիսկեր է առաջացնում ոչ միայն պետության, այլև այն քաղաքացիների համար, որոնք արտարժութային, հատկապես հիփոթեքային վարկեր ունեն:

«Խնդիրը հատկապես ցայտուն է բնակարանային հիփոթեքային կրեդիտների դեպքում, 20 տարվա կտրվածքով քաղաքացին, որի եկամուտները դրամային են եղել, շատ մեծ ռիսկերի է ենթարկվում: Այդ ռիսկերը կարող են նաև կարճաժամկետ լինել։ Սրանից 2 ամիս առաջ եվրոյի փոխարժեքը 392 էր: Այն քաղաքացին, որը եվրոյով հիփոթեքային վարկ էր վերցրել, այսօր 9 տոկոս ավելի փոխարժեքով պետք է վճարի, որովհետև փոխարժեքւ բարձրացել է»,- նշեց պատգամավորը:

Պապոյանը խոսքով՝ օրենսդրական նախաձեռնությունը նվազեցնում է այդ ռիսկերը: Ըստ նախագծի, եթե ռեզիդենտները չունեն արտարժութային եկամուտներ, ապա նրանք չեն կարող ու չպիտի ստանան արտարժութային վարկեր:

«Սա հատկապես տարածված է լինում այն դեպքերում, երբ քաղաքացիները ֆինանսական բարձր գրագիտություն չեն ունենում և տարվում են 1-2 տոկոս հիփոթեքային վարկի ավելի էժան լինելու գայթակղությամբ և հետագայում շատ մեծ խնդիրների առաջ են կանգնում»,- հավելեց Պապոյանը:

Աղբյուր` Փաստինֆո