Փաստ ինֆո

Երևույթ, որ ՍԴ դատավորը կարող է լինել և՛ դատավոր, և՛ փաստաբան, առաջին անգամ եմ լսում և տեսնում։ Այս մասին հրավիրված ասուլիսին ասաց փաստաբան Արսեն Բաբայանը։

Հիշեցնենք, որ Սեդա Սաֆարյանը, զբաղեցնելով ՍԴ դատարանի դատավորի պաշտոնը, փաստաբանական գործունեություն է իրականացրել՝ որպես ներկայացուցիչ դատարան մուտքագրելով բողոքներ։

Թեև դեկտեմբերի 10-ին է լրացել դատավոր Արևիկ Պետրոսյանի պաշտոնավարման ժամկետը, իսկ Սեդա Սաֆարյանը ՍԴ դատավորի պաշտոնում երդվել է դեկտեմբերի 16-ին, միևնույն է, Բաբայանն ընդգծում է՝ Սաֆարյանը ԱԺ-ի կողմից ՍԴ դատավոր է ընտրվել սեպտեմբերի 15-ին, հետևաբար, այդ պահից սկսած ձեռք են բերել դատավորի կարգավիճակ, որոհետև այդ անձին այլևս որևէ մեկը չի կարող հետ կանչել այդ կարգավիճակից։

«Բոլորը գիտեն, որ այդ անձին այլևս որևէ մեկը չի կարող հետ կանչել այդ կարգավիճակից, բոլորը գիտեն, որ երբ գա դեկտեմբերի 10-ը, այդ մարդն ինքնաբերաբար գնալու է նստի ՍԴ շենքում՝ այդ աթոռին։ Բոլորի համար, այդ թվում՝ դատավորների, պատգամավորների, մյուսների համար ակնհայտ է, որ այս անձն ունի դատավորի կարգավիճակ»,- նշեց Բաբայանը՝ արձանագրելով, որ անգամ չեն քննարկում նա երբ է դարձել ՍԴ դատավոր, ընդգծում է՝ ՍԴ դատավորը պարտավոր է հանդես չգալ որպես ներկայացուցիչ կամ չտրամադրել խորհրդատվություն, այդ թվում, անհատույց հիմունքներով, բացառությամբ այն դեպքերի, երբ նա հանդես է գալիս որպես օրինական ներկայացուցիչ կամ անհատույց իրավաբանական խորհրդատվություն է մատուցում իր մերձավոր ազգականներին կամ իր խնամակալության, հոգաբարձության ներքո գտնված անձանց, մինչդեռ, տվյալ դեպքում գործ ունենք դասական փաստաբանության հետ, ինչի իրավունքը ՍԴ դատավորը չունի։

Արսեն Բաբայանն ուշադրություն հրավիրեց այն հանգամանքին, որ ՍԴ մասին օրենքը որոշակի կանոնների խախտումը որակում է որպես էական կարգապահական խախտում, որոնցից մեկը վերաբերում է դատավորի պաշտոնի հեղինակությունը ի շահ իրեն կամ այլ անձի օգտագործելու արգելքին։ Այլ խոսքով՝ ՍԴ դատավորը չպետք է իր կարգավիճակն օգտագործի այլ նպատակներով, դա էական կարգապահական խախտում է։ Բացի այդ, Բաբայանը տեղեկացրեց, որ Սեդա Սաֆարյանը նոյեմբերի 30-ին դիմել է ՓՊ՝ խնդրելով կասեցնել իր արտոնագրի գործունեությունը՝ գիտակցելով, որ այլևս փաստաբանույամբ զբաղվել չի կարող և դիմումին կից ներկայացրել է կառավարության առաջարկությունը՝ իրեն ՍԴ դատավորի պաշտոնում նշանակելու և ԱԺ-ի կողմից իրեն ՍԴ դատավոր ընտրելու մասին որոշումները։ Դիմումների հիման վրա ՓՊ խորհուրդը հենց նույն օրը կասեցրել է Սաֆարյանի արտոնագիրը։

Բաբայանը պնդում է՝ Սեդա Սաֆարյանը թույլ է տվել էական կարգապահական խախտում, քանի որ, եթե նա գիտեր, որ չի կարող զբաղվել փաստաբանությամբ։ Բաբայանը կասկածներ ունի, որ նման պայմաններում Սեդա Սաֆարյանի կողմից դեկտեմբերի 5-ին որպես ներկայացուցիչ բողոքը ստորագրելը և ներկայացնելը դատարան, մեկ նպատակ ուներ՝ դատարանում, դատախազությունում, քննչական մարմնում կամ դատավարական հակառակորդի նկատմամբ՝ օգտագործելով իր հեղինակությունը որպես ՍԴ դատավոր։

Աղբյուր` Փաստինֆո