Փաստ ինֆո

ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Ռուսաստանը կողջունի Բաքու-Երևան-Թբիլիսի երկխոսությունը, եթե այն կնպաստի տարածաշրջանում կայունության ամրապնդմանը։

«Յուրաքանչյուր պետություն իրավունք ունի մասնակցելու իր շահերին համապատասխանող միջազգային ձևաչափերին, որոնք ուղղված չեն երրորդ երկրների դեմ և որոնք հաշվի են առնում ուժերի՝ գոյություն ունեցող հավասարակշռությունը: Եթե եռակողմ՝ Բաքու-Երևան-Թբիլիսի երկխոսությունը կնպաստի Անդրկովկասում տարաձայնությունների կարգավորմանը, տարածաշրջանում անվտանգության կայունության ամրապնդմանը, ապա մենք միայն կարող ենք ողջունել դա»,- ասել է նա:

Ըստ Զախարովայի, «եթե այս նախաձեռնության հետևում ինչ-որ կերպ տեսանելի են Վաշինգտոնի և Բրյուսելի ուրվագծերը, որոնք ձգտում են խաթարել Ռուսաստանի, Հայաստանի և Ադրբեջանի ղեկավարների եռակողմ պայմանավորվածությունների կատարումը, ապա դա այլ պատմություն է»։

«Ուզում եմ հիշեցնել, որ հենց երեք երկրների՝ Ռուսաստանի, Ադրբեջանի և Հայաստանի ղեկավարների նշված պայմանավորվածություններն են հիմք հանդիսանում Բաքվի և Երևանի միջև հարաբերությունների կարգավորման համար։ Այս ձևաչափով, սկսած 2020թվականից, գործարկվել են առանցքային գործընթացներ՝ ենթակառուցվածքների ապաշրջափակման, հայ-ադրբեջանական սահմանների սահմանազատման, խաղաղության պայմանագրի մշակման, ինչպես նաև հասարակական, փորձագիտական և խորհրդարանական շրջանակների ներկայացուցիչների միջև շփումների հաստատման ուղղությամբ»,- ասել է Զախարովան։

Ինչ վերաբերում է Անդրկովկասում համագործակցության ավելի «բացառիկ-ներառական» ձևաչափերին՝ Զախարովայի խոսքով, կա 3+3 խորհրդատվական տարածաշրջանային հարթակ։

«Այն հենց ներառում է անդրկովկասյան երեք պետություններին, ինչպես նաև Ռուսաստանը, Իրանը և Թուրքիան: Այս մեխանիզմը թույլ է տալիս համատեղել տարածաշրջանի ավելի լայն շրջանակի երկրների շահերը: Սա, ի թիվս այլ բաների, պետք է աշխատի հարթելու հակասությունները, զարգացնել առևտրատնտեսական հարաբերությունները, տրանսպորտային և մշակութային, հումանիտար ն կապերը, պայքարի ընդհանուր մարտահրավերների և սպառնալիքների դեմ: Մենք ընդգծում ենք 3 + 3 հարթակի զգալի ներուժը՝ աջակցելու հայ-ադրբեջանական հարաբերությունների կարգավորման գործընթացին», - ասել է Մարիա Զախարովան։

Աղբյուր` Փաստինֆո