Փաստ ինֆո

Մարտական խնդիրների իրականացման, պլանավորման կամ վերահսկման գործառույթներ ունեցող պաշտոններ զբաղեցնող պայմանագրային զինվորական ծառայության սպայական, ենթասպայական և շարքային կազմերի զինծառայողների որակավորման կարգը հաստատվեց Կառավարության այսօրվա նիստում։ Համաձայն ՊՆ հեղինակած նախագծի՝ որակավորման արդյունքներով հաշվարկվելու են նաև զինծառայողներին տրվող հավելավճարների չափերը։

ՀՀ պաշտպանության նախարար Սուրեն Պապիկյանը, ներկայացնելով որոշման նախագիծը, շեշտեց, որ մարտական խնդիրների և դրանց իրականացման, պլանավորման կամ վերահսկման գործառույթների շրջանակը ներառում է համազորային, հատուկ նշանակության, հետախուզական, հրթիռային, հրետանային, հակաօդային պաշտպանության, ռադիացիոն քիմիական պաշտպանության, ռադիոէլեկտրոնային պայքարի, ավիացիոն, անօդաչու թռչող սարքերի, կապի, ինժեներական կամ ռազմատեղագրական մասնագիտական գործունեությունը և այդ գործունեության օպերատիվ, տեխնիկական, թիկունքային կամ բժշկական ապահովմանը, մարտական կամ զորահավաքային կամ բարոյահոգեբանական պատրաստության և զինվորական ծառայության պլանավորմանն ուղղված գործունեությունը։
Նախարարը նաև նշեց, որ ատեստավորումը կիրականացվի պաշտպանության նախարարի հրամանով ստեղծված ատեստավորման 5 կենտրոններում ձևավորված 10 հանձնաժողովների միջոցով։

«Ատեստավորումը ներառում է զինծառայողների մասնագիտական գիտելիքների և ծառայողական պարտականությունների իմացության թեստային գնահատումը, ֆիզիկական, կրակային և շարային պատրաստության աստիճանի գործնական գնահատումը։ Թեստային առաջադրանքը բաղկացած է լինելու 50 հարցից, ատեստավորված են համարվելու առնվազն 35 հարցին ճիշտ պատասխանած և ֆիզիկական, կրակային և շարային պատրաստությունից յուրաքանչյուրից առնվազն «լավ» գնահատական ստացած զինծառայողները»,– ասաց Պապիկյանը։

Ատեստավորման արդյունքում, ըստ Պապիկյանի, շարքային զինծառայողների աշխատավարձը կկրկնապատկվի և մարտական հերթապահության համար վճարվող հավելավճարի հետ կկազմի մինչև 422 000 դրամ։

Նիկոլ Փաշինյանն էլ առաջարկեց ատեստավորման գործընթացն առավել թափանցիկ դարձնելու համար գործընթացին մասնակցելու հնարավորություն տալ նաև կառավարության այլ գերատեսչությունների, կազմակերպությունների ներկայացուցիչներին, ԱԺ պատգամավորներին։

«Քանի որ առողջապահության ապհովագրության համակարգ ենք ներդրել, որոշել ենք այդ առնվազն կրկնապատկվող աշխատավարձից որոշակի չափ, ըստ նախնական հաշվարկի՝ 20-25 հազար դրամ, հատկացնել առոջղապահության ապահովագրության համար։ Մտածեցինք, որ այդպես ավելի ճիշտ կլինի, քան ստացած աշխատավարձից հետ վերցնենք ու հատկացնենք ապահովագրությանը»,-ասաց վարչապետը։

Աղբյուր` Փաստինֆո