Փաստ ինֆո

ԵՄ առաքելության ժամանման և ՀԱՊԿ խաղաղապահներից հրաժարվելու Փաշինյանի հիմնավորումները չնայած ծիծաղելի էին, բայց նախատեսված են հայ հանրության, այսինքն՝ ներքին սպառման համար։ Այս մասին «Փաստինֆո»-ի հետ զրույցում ասաց քաղաքագետ Երվանդ Բոզոյանը։

«Փաստորեն ինքը խոստովանում է, որ Ադրբեջանը հաջողության է հասել միջազգային հարթակներում և ռուսներին համոզել է, որ Նիկոլ Փաշինյանը Արևմուտքի մարդն է, իսկ Արևմուտքում էլ՝ հիմնավորում են, որ Փաշինյանը ռուսների մարդն է։Ստացվում է, որ Նիկոլ Փաշինյանի՝ արտաքին քաղաքականությունը պրավալի մեջ է և ինքը ստիպված ԵՄ դիտորդներին կանչում է Հայաստան, որ հերքի ադրբեջանցիների վարկածը»,- նշեց Բոզոյանը։

Մինչդեռ իրականում ԵՄ դիտորդների հրավերքը բոլորովին այլ նպատակ է հետապնդում, ինչը Փաշինյանը վարպետորեն թաքցնում է հայ հասարակությունից ու փորձում է աշխարհաքաղաքական փոփոխություն իրականացնել Հայաստանում, թեպետ ԱԺ ամբիոնից հերքեց այդ մասին։

ԵՄ դիտորդների հրավերքը և՛ Ռուսաստանում, և՛ Իրանում խիստ բացասական են գնահատել։ Քաղաքագետի խոսքով՝ այդ քայլը, հիմնահատակ կազմաքանդում է հայ-ռուսական, հայ-իրանական հարաբերությունները, անվստահության մթնոլորտ ստեղծում դաշնակից և բարեկամ պետությունների շրջանում։ Սա էլ իր հերթին մեծացնում է ադրբեջանցիների հարձակման վտանգը։

«Ադրբեջանցիները լկտիանում են այն ժամանակ, երբ տեսնում են, որ հայ-ռուսական հարաբերություննները անվստահելի վիճակում են։ Իսկ Փաշինյանը 4 տարի կազմաքանդել է հայ-ռուսական հարաբերությունները, սկզբում բանակցային գործընթացը, հետո Խաչատուրովին ձերբակալելով ՀԱՊԿ-ի հետ հարաբերությունները կազմաքանդեց, որտեղ ինքը կազմաքանդել է, թույլ օղակ է ստեղծել և Ադրբեջանը հարվածել է այդ թույլ օղակին»,- ընդգծեց Բոզոյանը։

Նրա կարծիքով՝ Փաշինյանը ԵՄ դիտորդներին կանչում է, որ հետագայում հայ-ադրբեջանական հարաբերությունների գործընթացը տեղափոխի Արևմտյան դաշտ, փորձում է գնալ Վրաստանի նախկին նախագահ Միխայիլ Սաակաշվիլիի ճանապարհով ու Փաշինյանին թվում է՝ իր այդ խորամանկությունը չեն նկատում Մոսկվայում և Թեհրանում, բայց ՌԴ-ում և Իրանում այդ ամենին շատ ուշադիր են հետևում։ Փաշինյանի բերած հիմնավորումների փուչիկը կպայթի, երբ Ադրբեջանը ճիշտ պահը որսա և մի նոր հարված հասցնի Հայաստանին։

«Այդ խորամանկությունը շատ թանկ է նստելու հայ ժողովրդի վրա, բայց քանի դեռ հայ ժողովուրդը դա չի տեսնում ֆիզիկապես, վիզուալ, ինքը այդ ամեն ինչի կողքով անցնում է, իր համար դա աղմուկի պես բան է, որոշ մարդիկ նույնիսկ ասում են՝ ինչ խնդիր կա, եթե գալիս են լրացուցիչ անվտանգություն ապահովելու՝ չհասկանալով տարրական քաղաքական դրվագները։ Ժողովուրդը դա զգաց, երբ մենք կորցրինք Արցախի մեծ մասը, կանգնեցինք Արցախի պետականության փլուզման առաջ, եւ վաղը մյուս օրը նույն բանը սպասվում է Հայաստանին»,- հավելեց քաղաքագետը։

Բոզոյանի դիտարկմամբ՝ Հայաստանի քաղաքական դաշտը նույնպես «լղոզված» է, որովհետև նրանց խնդիրն ու գործառույթը հասարակ մարդկանց այդ ամենը և դրանից բխող վտանգները ներկայացնելն է։ Այդ բացատրական աշխատանքների բացակայության պայմաններում մարդիկ հայտնվել են անորոշ վիճակում և չեն հասկանում՝ ինչ է կատարվում; Արդյունքում՝ Հայաստանը հայտնվում է ծանր վիճակում, իսկ հայ ժողովուրդը ոչինչ չի շահում, բացի կորստից։

«Փաշինյանը կարողանում է իր բոլոր ծրագրերն իրականացնել և մեղքը գցում է կամ նախկին իշխանությունների, կամ Ռուսաստանի վրա, վաղը մյուս օրն էլ կարող է ԵՄ-ի վրա գցի, շատ սպասելի է, իսկ ժողովրդին կմատուցեն, որ դրա մեղավորները դրսում են՝ ռուսներն են, եվրոպացիներն են կամ նախկին իշխանություններն են»,- եզրափակեց Բոզոյանը։

Հիշեցնենք, որ երեկ կառավարության հետ հարցուպատասխանի ժամանակ ՀՀ վարչապետ Նիկոլ Փաշինյանը՝ պատասխանալով «Քաղաքացիական պայմանագիր» խմբակցության պատգամավոր Հռիփսիմե Գրիգորյանի հարցին, թե ինչպես է ստացվել, որ ՀԱՊԿ դիտորդական առաքելության փոխարեն Հայաստան է ժամանում ԵՄ առաքելությունը, նշեց, որ Ադրբեջանն իր ագրեսիվ գործողությունները բացատրում էր նրանով, որ Հայաստանն ավելի ու ավելի շատ ռուսական զորքեր է բերում ու տեղակայում հայ-ադրբեջանական սահմանին ու պատրաստվում է հայ-ռուսական համատեղ ագրեսիվ հարձակում Ադրբեջանի դեմ, եւ Ադրբեջանը հարձակումներով պարզապես փորձում է հավասարակշռել իրավիճակը:

Փաշինյանի խոսքով՝ Արեւմուտքում փորձ էր արվում Հայաստանը ներկայացնել որպես Ռուսաստանի ագրեսիվ քաղաքականության մասնակից, իսկ Ռուսաստանում՝ որպես Արեւմտյան դավադրության մասնակից, իրենք էլ ասել են՝ շատ լավ, եկե՛ք, դուք տեղում դիտարկեք՝ այդ ամենն իրականությանը համապատասխանում է, թե չի համապատասխանում:

Աղբյուր` Փաստինֆո