Փաստ ինֆո

Այս պահին հայտնի չէ 15 զինվորների մահվան բուն պատճառը։ Զոհված զինծառայողների ծնողները չեն հավատում պաշտոնական վարկածին, չեն վստահում պետական իրավասու մարմինների կողմից արտահայտված որոշակի դիրքորոշումներին, ունեն մտահոգություն, որ փորձ է արվելու ծածկադմփոց անել այս գործը: Այս մասին այսօր՝ փետրվարի 8-ին, տեղի ունեցած մամուլի ասուլիսի ժամանակ նշեց Ազատ գյուղում տեղակայված վաշտի կացարանի հրդեհի հետեւանքով զոհված 15 զինծառայողներից 13-ի ծնողների լիազոր ներկայացուցիչ, փաստաբան Նորայր Նորիկյանը:

Փաստաբանի խոսքերով՝ ծնողները համոզված են, որ իրենց երեխաները հրդեհից առաջ կամ կենդանի չեն եղել, կամ առնվազն անգիտակից են եղել: Իսկ հրդեհը ինչ-որ հետքեր թաքցնելու կամ հասարակության ուշադրությունը շեղելու նպատակ է հետապնդում:

«Ծնողները ճիշտ էլ անում են, որ չեն վստահում պաշտոնական վարկածին, քանի որ դեպքից հետո որոշ շրջանակների դրսեւորած հրապարակային հակասական, ոչ պրոֆեսիոնալ ու հակաօրինական վարքագիծը, դրել են այդ հիմքերը»,-ասաց փաստաբանը՝ ավելացնելով, որ զոհվածների ծնողների հետ պայմանավորվել են, որ իրականացնելու են, պատկերավոր ասած, իրենց սեփական հետաքննությունը։
«Փետրվարի 10-ից սկսվելու է տուժողների հարցաքննությունները: Այսօր կամ վաղը ես գրավոր դիմում եմ ներկայացնելու պաշտպանության նախարարին եւ զինդատախազին՝ պահանջելով հանդիպում տուժողների հետ, որպեսզի ներկայացնեն հաշվետվություններ ու պարզաբանումներ»,-ասել է փաստաբանը:

Նրա փոխանցմամբ՝ դեպքից հետո կառավարության նիստից տպավորություն է ստացել, որ ի դեմս ՀՀ կառավարության գործ ունենք արտակարգ դատարանի հետ, որտեղ տեղի է ունենում դատավարություն, եւ վարչապետ Նիկոլ Փաշինյանը հանդես էր գալիս մեղադրողի ու դատավորի դիրքերից, ներկայացնում՝ ովքեր են մեղավոր, ովքեր պետք է պատասխան տան՝ ներկայացնելով ինչ-որ վարկած:

«ՀՀ վարչապետը անկախ անձից, որեւէ իրավասություն չունի որեւէ քրեական վարույթի վերաբերյալ որեւէ կարծիք հայտնելու, որեւէ տեղեկություն կամ վարկած շրջանառության մեջ դնելու, բացատրություններ ներկայացնելու կամ զեկույցներ ստանալու:

Գլխավոր դատախազի իրավասությունների մեջ չկա որեւէ դրույթ, որ նա պարտավոր է կամ կարող է զեկույցներ ներկայացնել որեւէ քրեական վարույթի վերաբերյալ ՀՀ վարչապետին»,-ասաց Նորիկյանը՝ փաստելով, որ գլխավոր դատախազի, ՔԿ նախագահի կողմից կառավարությանը, վարչապետին որեւէ ձեւով զեկույցներ, հաշվետվություններ ներկայացնելը Սահմանադրության խախտում է:

Նորիկյանը տեղեկացրել է, որ այս պահի դրությամբ դեռևս հայտնի չէ զինծառայողների մահվան բուն պատճառը, այսինքն՝ դեռեւս չկան երեխաների դիակների դատաբժշկական փորձաքննության եզրակացությունները:

«Մենք զոհվածների ծնողների հետ պայմանավորվել ենք, որ իրականացնելու ենք, պատկերավոր ասած, մեր սեփական հետաքննությունը:

Փետրվարի 10-ից սկսվելու է տուժողների հարցաքննությունները: Այսօր կամ վաղը ես գրավոր դիմում եմ ներկայացնելու պաշտպանության նախարարին եւ զինդատախազին՝ պահանջելով հանդիպում տուժողների հետ, որպեսզի ներկայացնեն հաշվետվություններ ու պարզաբանումներ»,-ասաց փաստաբանը:

Աղբյուր` Փաստինֆո