Փաստ ինֆո

Դատավորներ Դավիթ Գրիգորյանը և Բորիս Բախշիյանը՝ իրենց լիազորությունները դադարեցնելու մասին ԲԴԽ որոշումները դեռևս չեն ստացել, ստանալուց հետո կքննարկեն հետագա անելիքները։

Հիշեցնենք, որ ԲԴԽ-ն այսօր հայտարարություն տարածեց, որ դադարեցրել է կասեցված լիազորություններով վեց դատավորի՝ դատավորներ Արա Կուբանյանի, Գևորգ Նարինյանի, Բորիս Բախշիյանի, Աղվան Պետրոսյանի, Դավիթ Գրիգորյանի ու Արուսյակ Ալեքսանյան լիազորությունները: Նշված որոշումները դեռևս չեն հրապարակել։ Մամուլի հաղորդագրությունից հայտնի է դառնում, որ դատավորների լիազորությունները դադարեցնելու նոր հիմք է ստեղծվել։ Մասնավորապես, օրենսդրական փոփոխություններ են իրականացվել, համաձայն որի՝ այսուհետ 1 ամսից ավելի լիազորությունները կասեցված դատավորների փոխարեն հնարավոր կլինի կատարել նոր նշանակումներ։

«Մինչ կատարված փոփոխությունները՝ լիազորությունները կասեցված դատավորների հաստիքները չէին համարվում թափուր և նրանց փոխարինելու մեխանիզմներ չկային, ինչը դատարանների գերծանրաբեռնվածության պայմաններում հանգեցնում էր մինչև անգամ ճգնաժամային իրավիճակների»,- նշել են ԲԴԽ-ից:

Պրակտիկայում, սակայն, հայտնի չէ որևէ դեպք, երբ լիազորությունները կասեցվում են՝ մեկ ամսից քիչ ժամկետով։ Փաստացի իրավապահները կարող են քրեական գործեր հարուցել անցանկալի դատավորների նկատմամբ, ինչի արդյունքում նրանց լիազորությունները կկասեցվեն, իսկ հետագայում՝ գործերով արդարացման դատավճիռներից կամ կարճվել, բայց դատավորի իրավունքները չեն վերականգնվի։ Հատկանշական է, որ ավելի վաղ օրենսդրական փոփոխություններ էր կատարվել, այսպես ասած, ռեզերվային դատավորների մասին, համաձայն որի՝ մինչդատական վարույթի գործերով դատավորները, ինչպես նաև՝ այն դատավորները, որոնց նկատմամբ կայացվել են արդարացման դատական ակտեր, ձեռք են բերում ռեզերվային դատավորի կարգավիճակ, ինչը ևս խնդրահարույց է։ Նշենք, որ այս պահին առնվազն երկու դատավոր՝ Դավիթ Գրիգորյանը և Բորիս Բախշիյանն ունեն արդարացված դատավորի կարգավիճակ, թեև դատավճիռը դեռևս օրինական ուժի մեջ չի մտել։ Այդուհանդերձ, ԲԴԽ-ն որոշել է, որ անգամ արդարացվածի կարգավիճակ ունեցող դատավորները պետք է ոչ թե լինեն որպես ռեզերվային դատավոր, այլ՝ դադարեն պաշտոնավարել, ըստ այդմ, օրենսդրական նոր փոփոխություններ են իրականացվել։

Դատավոր Դավիթ Գրիգորյանը «Փաստինֆո»-ի հետ զրույցում նշեց, որ ԲԴԽ որոշումը դեռևս չի ստացել, որոշմանը ծանոթանալուց հետո կորոշի, թե ինչ գործիքակազմով կիրացնի իր իրավունքները։ ԲԴԽ որոշումը չի ստացել նաև Բորիս Բախշիյանը, որը «Փաստինֆո»-ի հետ զրույցում նշեց, որ որոշումը ստանալուց և ծանոթանալուց հետո կկարողանան պարզաբանել։

Դիտարկմանը, որ ստացվում է՝ կարող են ցանկացած անցանկալի դատավորի նկատմամբ քրեական գործ հարուցել, լիազորությունները կասեցնել, ապա՝ դադարեցնել և դատավորների իրավունքները որևէ կերպ չեն վերականգնվում, արդյո՞ք սահմանադրականության խնդիր էլ չկա, Բախշիյանն արձագանքեց. «Փաստորեն՝ կարող են՝ ինչպես փորձն է ցույց տալիս։ Սահմանադրականության հետ կապված էլ, գուցե, խնդիրներ կան՝ օրենսդրական փոփոխությունների առումով։ Ժամանակը հարցի պատասխանը կտա, գուցե նաև սահմանադրականության հարց բարձրացվի, փորձենք հարցի լուծումը ստանալ։ Այս պահին դեռևս վաղաժամ է խոսելը։ Որոշումը ստանալուց հետո կհասկանանք, թե կոնկրետ օրենսդրական ինչպիսի նորմերով են ղեկավարվել։ Այս պահին դժվար թե կարողանամ հստակ բան ասել»։

Նշենք, որ մյուս դատավորների վերաբերյալ գործերը դեռևս քննության փուլում են։

Հ.Գ. Հրապարակումն արդեն պատրաստ էր թողարկման, երբ նկատեցինք , որ ԲԴԽ պաշտոնական հաղորդագրությունը խմբագրվել է, համաձայն որի՝ «Բարձրագույն դատական խորհրդի որոշմամբ՝ 6 դատավորների լիազորությունները դադարեցվել են» վերտառությամբ վերնագիրը փոխվել է՝ «Բարձրագույն դատական խորհրդի որոշմամբ՝ 6 դատավորներ դադարել են պաշտոնավարել» վերնագրով։
Հեղինակ՝ Իզաբել Սահակյան

Աղբյուր` Փաստինֆո