Փաստ ինֆո

ԵԱՀԿ-ում ԱՄՆ դեսպան Մայքլ Քարփենթերը  կոչ է արել Ադրբեջանին և Ռուսաստանին՝ անհապաղ վերականգնել անխոչընդոտ տարանցումը` նախկին հանձնառություններին համապատասխան։ Այս մասին նշում է ՀՀ ԱԺ Մարդու իրավունքների պաշտպանության հանձնաժողովի նախագահ Թագուհի Թովմասյանը՝ նշելով, որ  Քարփենթերը պատասխանել է Բերձորի միջանցքի շուրջ ձևավորված իրավիճակի վերաբերյալ իր գրություններին:

«ԵԱՀԿ-ում ԱՄՆ դեսպան Մայքլ Քարփենթերին ուղղված բազմաթիվ նամակներով ահազանգել էի Արցախում հումանիտար արտակարգ իրավիճակի, Ադրբեջանի կողմից շրջափակված 120.000 բնակչության կենսական խնդիրների վերաբերյալ։

Դեսպանին ներկայացրել էի Ադրբեջանի կողմից ստեղծված հավելյալ խնդիրներն առ այն, որ վերջինիս ապակառուցողական վարքագծի հետևանքով հնարավոր չէ մտնել Աղավնո-Բերձոր հատվածում տեղի ունեցած միջադեպի վայր և իրականացնել էլեկտրաէներգիայի մատակարարման վերականգնողական աշխատանքներ, ուստի Արցախին էլեկտրաէներգիայի մատակարարման լրջագույն խնդիրներ են առաջացել ցուրտ ձմռան պայմաններում։

Դեսպան Քարփենթերին տեղեկացրել էի նաև Արցախ տեղափոխվող 19 հայ երեխաների նկատմամբ Ադրբեջանի գործադրած էմոցիոնալ և հոգեբանական բռնության վերաբերյալ և հիմնավորել ադրբեջանցիների հանցավոր գործողություններում «Երեխայի իրավունքների մասին» կոնվենցիայի հիմնարար դրույթների խախտման փաստերի առկայությունը։

Պրն. Քարփենթերին խնդրել էի՝ իր մանդատի/իրավասությունների շրջանակում ձեռնարկել կոնկրետ քայլեր՝ սահմանելու պատժամիջոցներ Ադրբեջանի քաղաքական ղեկավարության նկատմամբ, որը տվել է հրաման ներխուժել Արցախ տեղափոխվող երեխաների ավտոբուս և նրանց նկատմամբ իրականացնել հոգեբանական տեռոր, ձեռնարկել բոլոր հնարավոր քայլերը՝ ապահովելու հայկական կողմի մուտքն Աղավնո-Բերձոր հատված՝ վերականգնելու Արցախին էլեկտրաէներգիայի մատակարարումը»,- նշել է Թովմասյանը։

Դեսպան Քարփենթերը պատասխան գրությամբ հավատացրել է, որ Միացյալ Նահանգները իր դիտարկման ներքո է պահում հարցը։

«Ինչպես Վաշինգտոնում, այնպես էլ Բաքվում և Երևանում իր դեսպանությունների միջոցով, և ես անձամբ ուշադրությամբ հետևում եմ զարգացումներին։ …Կոչ եմ արել Ադրբեջանին և Ռուսաստանին՝ վերականգնել անխոչընդոտ տարանցումը` նախկին հանձնառություններին համապատասխան»,-նշել է դեսպանը։

Նա նաեւ  հավելել է, որ կշարունակեն աշխատել Հայաստանի և Ադրբեջանի հետ ինչպես երկկողմ ձևաչափով, այնպես էլ բազմակողմ ձևաչափով այնպիսի գործընկերների միջոցով, ինչպիսին ԵՄ-ն է և միջազգային կազմակերպությունների միջոցով, ինչպիսին ԵԱՀԿ-ն է՝ հասնելու այս հակամարտության համապարփակ և հաստատուն կարգավորման, որը շարունակվել է չափազանց երկար և խլել չափազանց շատ կյանքեր։

Աղբյուր` Փաստինֆո