Փաստ ինֆո

Ով ասաց, որ Արցախի ժողովրդի իրավունքների պաշտպանությունը չի մտնում ՀՀ-ի մեջ: Ընկալման խնդիր է, մարդիկ մի քիչ պետք է բարձրացնեն իրենց ընկալման հնարավորությունը: Երբ որոշ քաղաքական ուժեր դատապարտում են Գուրգեն Արսենյանի հայտարարությունը և կարծում են, որ Արսենյանը ջուր է լցնում թուրք-ադրբեջանական տանդեմի ջրաղացին, ես խնդրում եմ, որ այդ մարդիկ, այդ մասնագետները ինձ բացատրեն՝ այդ ո՞րն է այդ ջրաղացը, այդ ի՞նչ ջուր է լցվում, ինչքա՞ն ջուր է լցվում, որքա՞ն է այդ ջրաղացի հզորությւոնը: Ես դրա մասնագետը չեմ, ես Հայաստանի պետական շահերի պաշտպանության մասնագետ եմ, կամ և շարունակելու եմ իմ գործը: Այս մասին այսօր՝ փետրվարի 7-ին ԱԺ-ում լրագրողների հետ զրույցում ասաց ԱԺ ՔՊ խմբակցության պատգամավոր Գուրգեն Արսենյանը՝ մեկնաբանելով օրեր առաջ ընդդիմադիրների նախաձեռնած խորհրդարանական լսումների ժամանակ արցախացիների մասին արված իր հայտարարության շուրջ բարձրացած «աղմուկը»:

Դիտարկմանը, թե ինքը պատրաստ է իր հայտարարությունների համար բացատրություն տալ էթիկայի հանձնաժողովում՝ Արսենյանն արձագանքեց, որ եթե էթիկայի հանձնաժողովը կգտնի հարցը քննարկման դնել, ինքն էլ չի խուսափի մեկնաբանություններ տալ:
«Ես իմ արած ոչ մի հայտարարության համար երբեք չեմ ափսոսացել, որովհետև եթե ափսոսալու որևէ բան լիներ, ես հանդես կգայի հերքումով: Սա հստակ քաղաքական դիրքորոշում է, ես պաշտպանել և պաշտպանում եմ ՀՀ պետական շահերը՝ որպես Հայաստանի բնակչության կողմից ընտրված ՀՀ պատգամավոր:

Ցանկացած վարկաբեկման փորձ, իմ հայտարարություններն այլ նպատակների ծառայեցնելու փորձ, ինձ համար էական չէ»,- նշեց Արսենյանը:

Իշխանական պատգամավորի խոսքով՝ լսումների ժամանակ իրեն վրդովվեցրել է այն, որ ընդդիմադիրները Լաչինի միջանցքի հարցը քննարկելու փոխարեն՝ իշխանություններին բռնի ուժով տապալելու կոչեր, մահապարտների ջոկատներ ստեղծելու կոչեր էին հնչեցնում, ինչը, ըստ Արսենյանի, ուղղորդված գործընթաց է և շատ վտանգավոր մեր պետության համար:

«Ե՛վ պետության ներսում, և՛ դրսից որոշակի աղբյուրներից իրականացվում է իշխանության վարկաբեկման որոշակի փորձ, թե, իբր, այս իշխանություններն անճարակ են, այս իշխանություններն անկարող են: Այս իշխանություններն իրականացնում են իրենց գործողություններն՝ իրենց հնարավորությունների սահմաններում»,- հավելեց նա:

Հիշեցնենք, որ իշխանական պատգամավոր Գուրգեն Արսենյանը փետրվարի 3-ին ԱԺ Հայաստան խմբակցության՝ Լաչինի միջանցքի փակման վերաբերյալ նախաձեռնած խորհրդարանական լսումների ժամանակ հայտարարել էր, որ անընդհատ Արցախի ու 120.000 արցախցիների մասին են խոսում, իսկ իրենց քաղաքական թիմը 3 միլիոն հայաստանցիների կյանքի ու անվտանգության համար է պատասխանատու:
Արսենյանի այս հայտարարությունը սուր քննադատությունների առիթ է դարձել:

Աղբյուր` Փաստինֆո