Փաստ ինֆո

Հայաստանում գործել է մի իշխանություն, որը զբաղված է եղել մասսայական իշխանությունը սեփականաշնորհելով։ Հիմա եկել է հատ-հատ պատասխան տալու ժամանակը, հուսով եմ՝ հատ-հատ պատասխան կտան։ Այս մասին ԱԺ-ում Սեյրան Օհանյանի նկատմամբ քրեական հետապնդում հարուցելու համաձայնություն ստանալու մասին միջնորդագրի քննարկման ժամանակ ասաց ԱԺ «Քաղաքացիական պայմանագիր» խմբակցության պատգամավոր Գուրգեն Արսենյանը՝ դիմելով գլխավոր դատախազ Աննա Վարդապետյանին։

Գուրգեն Արսենյանը հետաքրքրվեց՝ եթե դատարանը դատավճիռ կայացնի, ինչպես է իրականացվելու արդարադատությունը՝ նկատի ունենալով նաև վաղեմության ժամկետն անցած լինելու հանգամանքը, ինչին արձագանքելով գլխավոր դատախազը նշեց՝ կայացվում է վերդիկտ՝ առանց պատիժ նշանակելու, ինչը Քրեական դատավարության օրենսգրքի իմպերատիվ պահանջն է, բայց միայն քրեական վարույթով չէ, որ սահմանափակվում են, զուգահեռ հայց է ներկայացվում նաև՝ պետական պաշտպանության։

«Նպատակը ոչ միայն պատիժն է, այլև՝ հանրային, ազգային հարստությունից դուրս բերված միավորների վերադարձն է։ Եթե նկատեք, ոչ միայն այս գործերով, այլև՝ մի շարք գործերով ևս մշակութային նշանակության շենքեր կան, հողատարածքներ կան, այգիներ կան, որոնք բացի քրեական վարույթներից, նաև պետական շահերի պաշտպանության հայց ենք ներկայացնում, որ այս գործընթացը ունայն, սին չլինի։

Այսինքն՝ հա, մարդուն պատժեցինք, պարսավեցինք, բա գույքը։ Նաև գիտեք, որ ապօրինի ծագման գույքի բռնագանձման վարույթի շրջանակներում է հայց ներկայացվում, եթե նկատեք՝ երբեմն անձինք համընկնում են»,- նշեց Վարդապետյանը՝ հավելելով, որ նաև եթե քրեական վարույթներում լինում են նաև փողերի լվացման դրվագներ, այդ լվացված փողերը նույնպես բռնագանձման ենթակա են։

Թեև Վարդապետյանն արդեն պարզաբանել էր, որ վերդիկտ է կայացվում, Գուրգեն Արսենյանը կրկնեց հարցը՝ եթե դատավճռում կա պատիժ՝ ազատազրկում, վաղեմության ժամկետն ազդու՞մ է ազատազրկումը կրելու կամ չկրելու համար, ինչին Վարդապետյանը պատասխանեց՝ կրկնելով. «Այո, պատիժ չի նշանակվում այդ դեպքում, վերդիկտ կայացվում է, պատիժ՝ չի նշանակվում»։

Աղբյուր` Փաստինֆո