Փաստ ինֆո

Տարիներ կանցնեն, Աննա Վարդապետյանի փոխարեն, օրինակ, կգա Վիշինսկայա ազգանունով ինչ-որ դատախազ ու Սուրեն Պապիկյանին՝ Նիկոլ Փաշինյանի հետ կգամի անարգանքի սյունին և կասի՝ Արշակունյաց պողոտայում գտնվող «Ստալիչնի պոլկը» վաճառվել է, որը թեև անարդար է, բայց տեղավորվում է գործող իշխանության տրամաբանության մեջ: Այս մասին այսօր՝ փետրվարի 7-ին, ԱԺ-ում լրագրողների հետ ճեպազրույցում ասաց «Հայաստան» խմբակցության պատգամավոր Գեղամ Մանուկյանը՝ հիշեցնելով, որ դեռևս 2020 թվականի ապրիլի 15-ին Նիկոլ Փաշինյանը վավերացրել է ՊՆ բալանսում գտնվող 71 անուն գույքը պետական գույքի կառավարման կոմիտեին փոխանցելու, իսկ հետագայում դրանք վաճառելու մասին փաստաթուղթը:

« Հիմնական շեշտը դնում են, թե տեսեք՝ զորամասեր են վաճառվել: ՀՀ դատախազն անկեղծ պատասխանեց, որ դրանք չգործող զորամասեր են եղել: Ես բերել եմ մի փաստաթուղթ, որտեղ 71 զորամասի հասցե է, տարբեր քաղաքների զորամասեր, երևանցիները լավ կհիշեն «Ստալիչնի պոլկն» էլ մեջը: Հիմա ի՞նչ, հայտարարենք՝ զորամասե՞ր են վաճառվում: Ո՛չ, պարզապես այդ զորամասերը չգործող զորամասեր են և նույնիսկ դրանց պահպանությունը ՊՆ համար բեռ է և հանվել է վաճառքի»,- նշեց Մանուկյանը:

Պատգամավորը համոզված է՝ Սեյրան Օհանյանի նկատմամբ հանրային քրեական հետապնդում հարուցելու վերաբերյալ ՀՀ գլխավոր դատախազի միջնորդությունը պարզապես շոու է, շոու, որը հրապարակ բերվեց Գեղարքունիքի մարզի Ազատ գյուղում տեղակայված զորամասի կացարանում տեղի ունեցած ողբերգական հրդեհի հենց հաջորդ օրը, իսկ խորհրդարանն այն քննարկում է այսօր:

«Ինչո՞ւ 2 շաբաթ առաջ եկան. ի՞նչի էին շտապում, բոլորի համար էլ հասկանալի էր՝ հասարակության ուշադրությունը Ազատ գյուղում տեղի ունեցած ողբերգությունից շեղելու համար: Եվս մեկ դրվագ՝ և՛ Օհանյանին, և՛ Չարչյանին մեղսագրվող արարքների դեպքում կա վաղեմության ժամկետ»,- ընդգծեց պատգամավորը:

Հիշեցնենք, որ այսօր ԱԺ-ն քննարկում է «Հայաստան» խմբակցության պատգամավորներ Սեյրան Օհանյանի և Արմեն Չարչյանի նկատմամբ հանրային քրեական հետապնդում հարուցելու մասին ՀՀ գլխավոր դատախազ Աննա Վարդապետյանի միջնորդությունները։
Սեյրան Օհանյանի նկատմամբ ներկայացված 3 միջնորդություններից միայն մեկն է ԱԺ-ն քննարկել բաց ռեժիմով, մյուս երկուսը քննարվում է դռնփակ նիստում:

Առաջին միջնորդությամբ Օհանյանը մեղադրվում է չգործող զորամասի տարածքի ապօրինի օտարման համար, որը ըստ գլխավոր դատախազի, ձեռք է բերել Գրիգորի Խաչատուրովը, սակայն ձեւակերպվել է երրորդ անձի անունով։ Գ. Խաչատուրովն այս պահին գործով անցնում է որպես վկա, սակայն, ինչպես ԱԺ-ում հայտարարեց գլխավոր դատախազը, նրա մասով դեռ քննություն պետք է իրականացվի:

Աղբյուր` Փաստինֆո