Փաստ ինֆո

Սեյրան Օհանյանը գործող իշխանության համար ոչ ցանկալի անձ է, քանի որ ռեժիմին առավել սուր և քննադատող ընդդիմադիրներից է և ակնհայտ է, որ նրա նկատմամբ քրեական հետապնդում սկսելու միջնորդությունը ոչ այլ ինչ է, եթե ոչ քաղաքական պատվերի շրջանակում իրականացվող քրեական հետապնդում: Նույն տրամաբանության մեջ է տեղավորվում նաև հայտնի բժիշկ, պրոֆեսոր Արմեն Չարչյանի գործը: Այս մասին «Փաստինֆո»-ի հետ զրույցում ասաց ռազմական փորձագետ Հայկ Նահապետյանը՝ անդրադառնալով ընդդիմադիր «Հայաստան» խմբակցության պատգամավորներ Սեյրան Օհանյանի և Արմեն Չարչյանի նկատմամբ հանրային քրեական հետապնդում հարուցելու ՀՀ գլխավոր դատախազության ներկայացրած միջնորդություններին:

«Քննչական մարմինները ևս պատանդ են Փաշինյանի ձեռքին, որովհետև նրանք օրենքի խախտումով կեղծում են իրականությունը և թաքցնում են իրական մեղավորներին: Օրվա իշխանությունները ցանկաված գործ դիտարկում են քաղաքական նպատակահարմարության տեսանկյունից. եթե մարդը խանգարող գործոն է, այս կամ այն չափով վտանգում է իրենց իշխանությանը, փորձում են անհիշելի ժամանակներից խախտումներ բացահայտել և քրեական հետապնդման ենթարկել»,- նշեց նա:

Նահապետյանը իշխանությանը կոչ է անում անաչառություն դրսևորել և նույն սկզբունքայնությամբ քննության առնել բոլոր ժամանակների թալանը՝ 1991 թվականից սկսած, օրինակ, ուսումնասիրեն, թե Խորհրդային միության լավագույն արդյունաբերական համալիրն ունեցող գործարաններն ինչպես սեփականաշնորհվեցին և թալանվեցին՝ քրեական գործերում ներգրավվելով Լևոն Տեր-Պետրոսյանին և նրա մտերիմ շրջապատին, որի բաղկացուցիչ մասն այսօր, ըստ Նահապետյանի, կարևորագույն պաշտոններ է զբաղեցնում բոլոր ֆինանսական, տնտեսական, օլիգարխիկ, իրավական, օրենսդիր մարմիններում:

«Վրեժխնդրությունը, որը 2008 թվականի հայտնի դեպքերից հետո օրվա իշխանությունները և իրենց հոգևոր հայրերը պահել են իրենց հոգու խորքում հիմա գործնականում կյանքի են կոչում»,- ընդգծեց Նահապետյանը:

Ռազմական փորձագետի կարծիքով՝ այս ամենը տեղի է ունենում արևմտյան տարբեր ուժային կենտրոնների ամենաթողության ու լուռ համաձայնության պայմաններում: Նրա խոսքով՝ Նիկոլ Փաշինյանի ապօրինություների վրա Արևմուտքը աչք է փակում, որովհետև մեկ անձի միջոցով կարողանում է ամբողջ երկիրը կառավարել: Գործող վարչապետի պաշտոնավարումը ձեռնտու է նաև թշնամական Ադրբեջանի ու Թուրքիայի համար:

«Փաշինյան Նիկոլը «երկնային մանանա» է այդ մարդկանց համար, նվեր է, պարգև է, իր ներկայությամբ Հայաստանը առավելագույն կորուստներ է ունենալու, իսկ Ադրբեջանն ու Թուրքիան շտապում են ժամ առաջ օգտվել իրենց համար առավել նպաստավոր իրավիճակից, երբ Հայաստանում կարելի է ասել իրենց շահերը սպասարկող իշխանություններն են և դիմադրության առարկայական որևէ օջախ չկա»,- հավելեց ռազմական փորձագետը:

Փորձագետը չի բացառվում, որ աղմկոտ քրեական գործերը, հրաժարականները բեմականացվում են նաև այսպես կոչված խաղաղության պայմանագիրը ստորագրելու, շրջափակված Արցախից, կամ անվտանգային, սահմանների պաշտպանության հարցերում եղած լրջագույն մարտահրավերներից մարդկանց ուշադրությունը շեղելու նպատակով:

Հիշեցնենք, որ այսօր ԱԺ-ն քննարկում էր «Հայաստան» խմբակցության պատգամավոր Սեյրան Օհանյանի նկատմամբ հանրային քրեական հետապնդում հարուցելու մասին ՀՀ գլխավոր դատախազ Աննա Վարդապետյանի միջնորդությունները։

Սեյրան Օհանյանի նկատմամբ ներկայացված 3 միջնորդություններից միայն մեկն է ԱԺ-ն քննարկել բաց ռեժիմով: Այդ միջնորդությամբ Օհանյանը մեղադրվում է չգործող զորամասի տարածքի ապօրինի օտարման համար, որը ըստ գլխավոր դատախազի, ձեռք է բերել Գրիգորի Խաչատուրովը, սակայն ձեւակերպվել է երրորդ անձի անունով։ Գ. Խաչատուրովն այս պահին գործով անցնում է որպես վկա, սակայն, ինչպես ԱԺ-ում հայտարարեց գլխավոր դատախազը, նրա մասով դեռ քննություն պետք է իրականացվի:

ՀՀ գլխավոր դատախազը միջնորդություն է ներկայացրել նաև «Հայաստան» խմբակցության մեկ այլ պատգամավորի՝ օրոֆեսոր Արմեն Չարչյանի նկատմամբ հանրային քրեական հետապնդում հարուցելու համար: Չարչյանի միջնորդությունը ԱԺ-ն դեռ չի քննարկել:

Աղբյուր` Փաստինֆո