Փաստ ինֆո

Պրոդյուսեր Արմեն Գրիգորյանի մահվան պատճառներն ու հանգամանքները ողբերգական դեպքից ութ ամիս անց շարունակում են մնալ չպարզված։

Հիշեցնենք, որ պրոդյուսեր Արմեն Գրիգորյանը մահացել է՝ 2022թ հուլիսի 15-ին՝ հենց դատական նիստերի դահլիճում՝ իր գործով նախնական դատական լսումների ընթացքում։ Գրիգորյանը կալանքի տակ էր գտնվում մայիսի 17-ից՝ մի արարքի համար, որը ՀՀ քրեական օրենսգրքով հանցագործություն չէր համարվում։ Մասնավորապես, Գրիգորյանին մեղադրանք էր առաջադրվել ՀՀ քրեական օրենսգրքի 226-րդ հոդվածի 2-րդ մասով՝ հրապարակայնորեն ազգային արժանապատվությունը նվաստացնելու համար, իսկ որպես հիմք ներկայացվել է մամուլի ասուլիսի ժամանակ Ա. Գրիգորյանի հայտնած կարծիքը ՀՀ բնակավայրերից մեկի բնակիչների վարքագծի մասին, մինչդեռ, ՀՀ Քրեական արդեն նախկին օրենսգրքի 226-րդ հոդվածում արգելվում է միայն «ազգային արժանապատվությունը նվաստացնելուն ուղղված գործողությունները, ուստի ներազգային սոցիալական խմբերի միջև արժանապատվությունը նվաստացնելուն ուղղված գործողությունն արգելված չէ։

Մահվան պատճառներն ու հանգամանքները պարզելու համար հենց դեպքի օրը քրեական վարույթ է նախաձեռնվել, նշանակվել է դատաբժշկական փորձաքննություն, սակայն այս ամիսների ընթացքում իրավապահներին այդպես էլ չի հաջողվել պարզել՝ մահվան պատճառները։

ՀՀ քննչական կոմիտեից «Փաստինֆո»-ի գրավոր հարցմանն ի պատասխան նշել են, որ ՀՀ ԱՆ «Արմավիր» քրեակատարողական հիմնարկի նախկին կալանավոր Արմեն Գրիգորյանի մահվան դեպքի առթիվ ՀՀ ՔԿ Արմավիրի մարզային քննչական վարչությունում ՀՀ քրեական օրենսգրքի 187-րդ հոդվածի 2-րդ մասով քննվող քրեական վարույթոբ Ա. Գրիգորյանի մահվան պատճառը, վերջինիս մոտ կենդանության օրոք հիվանդությունների առկայությունը և մի շարք այլ հարցեր պարզելու նպատակով 2022թ հուլիսի 15-ին նշանակվել է դատաբժշկական փորձաքննություն, որի եզրակացությունը դեռևս չի ստացվել։ Քրեական վարույթի շրջանակներում որևէ անձի նկատմամբ քրեական հետապնդում չի հարուցվել։

Հեղինակ՝ Իզաբել Սահակյան

Աղբյուր` Փաստինֆո